No Panon Kan Nagunggonaan ed Grupo Yo Parad Lawak na Serbisyo
1. Anto ran gunggona ed Panagaral na Kongregasyon ed Libro so wala nin siansia ed saray grupo tayo parad lawak na serbisyo?
1 Antoy nami-miss mod Panagaral na Kongregasyon ed Libro? Melag iray grupo tan mas relaks so panagaral. Kanian mainomay a niwalay pankakaaro ya ontulong pian napabiskeg so pananisia tayo. (Uli. 18:24) Amta na manangasikaso ed panagaral na libro so nanduruman kipapasen tayo tan makapangiter na panamaseseg ed kada sakey. (Uli. 27:23; 1 Ped. 5:2, 3) Say onia ran gunggona et wala nin siansia ed saray grupo tayo parad lawak na serbisyo.
2. Panon itayon makapanggaway paraan pian niwalay pankakaaro ed grupo parad lawak na serbisyo ya ontulong pian napabiskeg so pananisia tayo?
2 Manggaway Paraan: Kaslakan ya say kabaleg na saray grupo parad lawak na serbisyo et parehod saray grupo na panagaral na libro nensaman. Diad pankimey ed ministeryo a “nankakasakey,” niwalay maapit ya pankakaaro. (Fil. 1:27) Pigara lay akaulop mod grupo yo? Sarag mo kasin ‘inatnat so panangarom’ ed arum? (2 Cor. 6:13) Ontan met, nayarin no maminsan et mangimbita tayoy kagrupo tayo ya milad Panagdayew na Pamilya tayo odino pian nakaiba tayon mangan. Diad arum a kongregasyon, mansusublayan iray grupo parad lawak na serbisyo a mamakan ed inimbitaan ya espiker. Diad simban betang day pamakan, maniibay membro na grupo pian mangan tan manpapasesegan anggano agla makapilad satan so espiker.
3. Anto ray pankanawnawan napastolan ka ed grupo yo parad lawak na serbisyo?
3 Anggaman mamidua labat lad sakey simba ya makapanuulop so kongregasyon, agto labay ya ibagan agla masyadon napastolan iray manangipalapag. Tinuro iray manangasikaso diad kada grupo pian kada sakey et pasesegen tan ipasal ed ministeryo. No agka ni naulop na manangasikaso na grupo yo, akin ta no kerewen a miulop kad sikato? Ontan met, say manangasikaso na serbisyo et mipaway ed nanduruman grupo ed sakey a weekend kada bulan. Diad saray melag a kongregasyon ya pigpigaray grupo parad lawak na serbisyo, nayarin iyuksoy ton bisitaen iray grupo ya mamidua legay taon. Kasin iyeeskedyul moy pibiang ed ministeryo no ombisitay manangasikaso na serbisyo ed grupo yo?
4. (a) Panon ya iyuuksoy iray pantitipon parad lawak na serbisyo? (b) Akin ya nepeg tayon ikonsidera so pangiyopresi ed abung tayo ya usaren ed pantitipon parad lawak na serbisyo?
4 Kaslakan et makagunggona no kada grupo et biig ya mantitipon no manpulong ira kada weekend. No walay pigaran pasen ya pambabanaan parad kapapaway diad pareparehon oras, nayarin mas mainomay parad saray manangipalapag so onlad pantitipon parad lawak na serbisyo tan ompan pati diad teritorya. Maples ya naorganisa iray manangipalapag tan makaonlan tampol ed teritorya. Mainomay met parad manangasikaso na grupo ya imanoen iray kaibad grupo to. Balet, wala ray pankanawnawa ya mas maabig ya manulop so duara o mas dakel nin grupo. No manuulop so interon kongregasyon ya manpulong ed unonan Sabado na bulan odino kayari Panagaral na Panag-bantayan, kaslakan et mas maabig no onyurong ya saniiba so kada grupo tan naikdan na pigaran minuto iray manangasikaso na grupo ya uksoyey grupo da antis ya sampotan ed pikakasi so pantitipon parad lawak na serbisyo.—Nengnengen so kahon ya “Kasin Niyopresim so Abung Mo?”
5. Anggano anggapo lay Panagaral na Kongregasyon ed Libro, antoy nailaloan tayo?
5 Anggano anggapo lay Panagaral na Kongregasyon ed Libro, itatarya nin siansia nen Jehova so amin ya kaukolan tayo pian nagawaay linawa to. (Heb. 13:20, 21) Lapud aasikasoen itayo nen Jehova, agtayo onkulang na antokaman. (Sal. 23:1) Dakel iran bendisyon so nagamoran panamegley na grupo tayo parad lawak na serbisyo. No manggawa tayoy paraan tan ‘mantanem na dakel’ seguradon ‘manani tayoy dakel.’—2 Cor. 9:6.
[Kahon ed pahina 6]
Kasin Niyopresim so Abung Mo?
Wala ray kongregasyon ya manuulop iray grupo parad lawak na serbisyo diad weekend ta kulang so abung ya nayarin pambabanaan. Saray pantitipon parad lawak na serbisyo et kabiangan met ed uksoyan na kongregasyon, kanian talagan pribilehyo no nausar so abung tayo parad satan. Kasin niyopresim so abung mo? Agka nababaingan no melag so abung mo. Ikonsidera na saray elder so lokasyon na abung mo tan arum ni ya ikokonsidera da, singa nen manpipili ray pasen parad panagaral na libro. No labay mon iyopresi abung mo, ipaamtam itan ed manangasikaso na grupo yo.