Ontulong so 2015 Teokratikon Eskuelaan Parad Ministeryo ya Napaaligwas so Panagbangat Tayo

¹ Insulat nen salmistan David: “Abuloyan mo so saray salitak, tan say dalepdep na pusok naako ra ed pakanengneng mo, O Jehova, dampay ko, tan mananondon ko.” (Sal. 19:14) Labay tayo met ya naliketan si Jehova ed saray ibabaga tayo lapud papablien tayoy pribilehyo tayon salitaen so katuaan ed kongregasyon tan ed ministeryo. Say Teokratikon Eskuelaan Parad Ministeryo et sakey a paraan nen Jehova pian ipasal tayod ministeryo. Sinimba ya gagawaen iyan panangipasal ed masulok ya 111,000 a kongregasyon diad interon mundo. Atulongan iray agagi ed interon mundo ya nandurumay kipapasen da pian magmaliw a kualipikadon ministro na maong a balita, tan makapanbangat irad makakombinse, makpel, tan mataktikan paraan.​—Gawa 19:8; Col. 4:6.

² Kaiba ed eskedyul na eskuelaan parad 2015 iray topic ed “An Introduction to God’s Word” tan say “Glossary of Bible Terms” ya walad New World Translation. Wala met iray usaren manlapud Insight on the Scriptures, Volume 1. Kaaruman ni, wala ray pananguman ed niiter ya oras parad saray pabitar ed Biblia tan Asainmin No. 1. Saratan a pananguman tan saray instruksion no panon ya ipresenta iray parte ed eskuelaan et konsideraen ed ontumbok iran parapo.

³ Saray Pabitar ed Biblia: Walay duaran minuto na brother ya akanparte ed saya pian ipaliwawa so sakey a makapainteres tan praktikal a punto ed sinimban babasaen ed Biblia. Kaukolan so pamparaan ya maong pian makapanginabang na makagunggonan punto ed kongregasyon diad loob na duaran minuto. Insan singa dati, walay anemiran minuto pian makapankomento so kongregasyon na naaralan dan makapainteres ya punto diad sinimban babasaen ed Biblia ya asan-30 segundo o mas antikey ni. Tua, kaukolan so pamparaan tan disiplina ed sarili pian makapangiter na balibalin komento diad 30 segundo, balet maong itan ya panangipasal ed sikatayo. Naikdan met so arum na pankanawnawa ya ikomento so naaralan dad impan-research da.

⁴ Asainmin No. 1: Say pambasay Biblia et ginawa lan taloran minuto o mas antikey ni tan mas daiset lay basaen. Nepeg ya maminpigan ipasal na saramay inyasain ed saya so parte da diad pambasan maksil, tan aralen dan maong so duga tan marlas ya pangibalikas pian natalosan so mensahe na basaen da. Amin ya lingkor nen Jehova et nepeg ya mansagpot pian magmaliw a marundunong ya manbasa, lapud importante itan ed panagdayew tayo. Makapalikliket ta dakel ed saray ananak tayo so marundunong a manbasa! Nakomendaan iray atateng ed maaron pansasagpot dan tulongan iray ananak dan magmaliw a maong ya manbasa.

⁵ Asainmin No. 2: Limaran minuto iyan presentasyon ya iyasain ed saray sister. Usaren so tema ya inyasain. No say asainmin et base ed topic ya walad New World Translation, iyaplika itan ed sakey ya aspekto na panagpulong ya realistiko tan praktikal ed teritorya tayo. No say asainmin et base ed sakey a karakter ed Biblia diad Insight on the Scriptures, Volume 1, nepeg ya aralen na estudyante so impormasyon ya walad libro nipaakar ed satan ya karakter ed Biblia, manpili na matukoy iran teksto ya usaren, tan ipaliwawa no anto ray naaralan ed satan ya karakter. Nayari met so mangusar na arum a teksto ya onsuportad tema. Mangiyasain so manangasikaso na eskuelaan na sakey ya assistant.

⁶ Asainmin No. 3: Limaran minuto iyan presentasyon ya iyasain ed sakey a brother odino sister. No niyasain ed sister, ipresenta iya a singa ed pangipresenta na Asainmin No. 2. No niyasain ed brother, say topic ya base ed Insight et nepeg ya ipresenta bilang paliwawa ya ikonsideray pankaukolan na saray dumerengel. Nepeg ya gawaen na estudyante so asainmin to base ed niyasain ya tema, manpili na matukoy iran teksto ya usaren, tan ipaliwawa to no anto ray naaralan ed ehemplo na karakter ed Biblia.

⁷ Say Balo ed Asainmin No. 3 Parad Saray Brother: No say asainmin et base ed topic ya walad New World Translation, gawaen itan ya demostrasyon na panagdayew na pamilya odino panagpulong. Kaslakan et say manangasikaso na eskuelaan so mangiyasain na assistant tan eksenan gawaen. Say assistant et nayarin kapamilya na estudyante odino sakey a brother ed kongregasyon. Nayari met so mangusar na arum a teksto ya mangidanet na saray prinsipyod Biblia ya onsuportad tema. No maminsan et nayarin iyasain iyan parte ed sakey ya elder. Nayarin say elder ya akanparte so manpili na assistant to tan say eksenan gawaen. Seguradon makapaseseg ed kongregasyon a nanengneng da ray elder ya mangidedemostra na dunong ed panagbangat kaiba na sakey a kapamilya odino na sananey ya brother.

⁸ Konseho: Kayari presentasyon na kada estudyante, naikdan so manangasikaso na eskuelaan na duaran minuto pian mangiter na komendasyon tan makatulong a konseho base ed Minabang ed Edukasyon na Teokratikon Eskuelaan Parad Ministeryo. No ipakabat na manangasikaso na eskuelaan so parte na estudyante, agto bitlaen no antoy pangobserbaan ed sikato. Kada kayari na presentasyon, nepeg ya impapuson komendaan na manangasikaso so estudyante, ibaga to no antoy inobserbaan to ed estudyante tan no antoy espisipikon agawaan na estudyante ed satan, odino maaron ipaliwawa no akin ya makatulong ed estudyante no ikdan to nin maong na imano itan.

⁹ Say form a pangonsehoan ed saray estudyante et walad pahina 79 anggad 81 na libro da ya Eskuelaan Parad Ministeryo. Kayari betang na estudyante, sulatan na manangasikaso na eskuelaan so libro na estudyante tan tepetan to ed pribado no kasin agawaan to so panagpasal ya mitukoyan ed pangonsehoan ed sikato. Nayarin komendaan odino mangiter na kaaruman iran makatulong a suhestion ed estudyante kayari aral odino diad arum a pankanawnawa. Say personal a tulong ya naawat na kada estudyante ed eskuelaan et nepeg ya ipasen ya pankanawnawa pian natulongan ya onaligwas ed espiritual.​—1 Tim. 4:15.

¹⁰ No linmampas lad oras so betang na estudyante, nepeg ya say manangasikaso na eskuelaan o say assistant et aliston mangiter na sinyales pian mataktikan ipaamtad estudyante ya asumpal lay oras to. Nepeg ya imanoen iya na estudyante tan sampotan to lay ibabaga to insan onepas la ed stage.​—Nengnengen so libron Eskuelaan Parad Ministeryo, p. 282, par. 4.

¹¹ Amin ya makakagawa lad saray kakaukolanen et papasesegen ya manpa-enroll ed Teokratikon Eskuelaan Parad Ministeryo. (Nengnengen so libron Eskuelaan Parad Ministeryo, p. 282, par. 6.) Say edukasyon ya itatarya na sayan eskuelaan et tinmulong ed saray lingkor nen Jehova pian mapekder, marespeto, tan maaron ipulong tan ibangat ed totoo so maong a balita na Panarian. Seguradon naliliketan si Jehova ed panangidayew na saramay nipapasal ed teokratikon edukasyon!​—Sal. 148:12, 13; Isa. 50:4.