Paaligwasen Iray Abilidad Tayod Ministeryo—No Antoy Gawaen no Mamapasnok so Unabung

No Akin ya Importante: Dakel so napupulongan tayon marespeto tan maomaong. Balet impropesiya nen Jesus ya wala ray totoon mamusol ed sikatayo. (Juan 17:14) Kanian agti la pankelawan no walay unabung ya mamasnok ed sikatayo. No nagawa itan, labay tayon gawaen no antoy makapaliket ed si Jehova, say irerepresenta tayo. (Roma 12:17-21; 1 Ped. 3:15) Makatulong iya pian agla onloor so situasyon. Makapantasi tayo met ed unabung tan ed siopaman a makanengneng. Ompan ondengel la ra no onsublay ya walay Tasin manpulong ed sikara.—2 Cor. 6:3.

No Panon Iyan Nagawaan:

Mansiansian kalmado tan makaaro. Ontulong iya pian napakepay pasnok na unabung. Agmo pepersonalen so pamapasnok to. (Ecl. 7:9) Ompan wala met so problema to odino nibanbanan aliway timing na inyakar mo. Anggan say pakakapasnokan na unabung et say ipupulong tayo, maslak et apalikdo labat irad ibabaga na arum.—2 Cor. 4:4.
Mauyamo tan marespeton onebat. (Uli. 15:1) Kasin abangon mo odino naisturbom ed gagawaen to? Tua ya agtayo onkekerew na dispensa lapud pampupulong tayo, balet onkerew tayoy pasensia ta aliway timing na inyakar tayo. Kasin mamapasnok so unabung lapud lingon impormasyon ya nadngel to nipaakar ed sikatayo? No ontan, nayarin ibagam: “Natatalosan ko no akin ya agyo agustoan iman. Balet aliwa amoy impormasyon ya akasabid sikayo. Sarag ton ipaliwawak ed sikayo?” Kasin agto onabobon ed sakey ed saray papanisiaan tayo, singa bilang say panagdispelo tan agpampasaksak na dala? Nayarin ibagam: “Natatalosan ta kayo. Ontan met so ibabaga na arum. Labay kon ipanengneng diad Biblia, no antoy basiyan mid satan. Sarag to?”
No mamapasnok ya maong so unabung, ompan mas maabig no agla oneebat tan onalis la. No ibaga ton agtayo la ompapawil, ipasegurom ya respetoen tayoy labay to.

Gawaen Iya Legan na Sayan Bulan:

Ipasal iya diad panagdayew na pamilya yo.
Kaalis yod mamapasnok ya unabung, pantongtongan yo na kaulop mo no anto ni ray mas maabig ya paraan na pangebat.