Usaren so jw.org Diad Ministeryom​—“Become Jehovah’s Friend”

Diad seksion ya “Bible Teachings” diad [English odino Tagalog] ed jw.org et walay partin parad ugugaw ya “Become Jehovah’s Friend.” Wala ray kansion, video, tan activity ditan. (Say arum ed sarayan video et wala met ed Pangasinan ya website.) Asalim la yan inusar ed ministeryom? No walay iyaaralan mon ateng ya walay angkelag nin ananak to, anto kasi no ipanengneng mod sikato? Ompan lapud satan et nasagyat ya nengnengen ni arum ya walad Web site tayo.

Legan na panangibunog na Kingdom News No. 38, naikdan na sakey a brother so sakey a bii tan binasa ton tampol so tract kapangawat to. Wala ray ugugaw nin anak to ya labay dan nengnengen no antoy walad tract. Impaliwawan magano na brother so karga na satan, insan impaimano toy Web site tayo diad beneg na tract. Lapud interesado so bii, impabantay na brother ed cell phone to so sakey a video nen Caleb ed samay ina tan ananak to.

Imbaga na sakey a sister ed katrabaho ton walay angkelag nin ananak so Web site tayo tan saray nabasan impormasyon ditan ya parad pamilya. Ninengneng na bii tan saray anak to so jw.org. Insan imbaga tod samay sister ya kakakkansionen na ananak to so “Preach the Word,” sakey ed saray kansion diad “Become Jehovah’s Friend.”

Kabisadoen iyan parte na jw.org tan man-download na sakey ed saray video, kansion, o activity diad cell phone o tablet mo. Diad ontan et akaparaan kan usaren iyan seksion na jw.org diad ministeryom. Talagan mausausar iya pian natulongan itayon manpaaripen ed Katawan!​—Gawa 20:19.