Panon ya Tratratoen na Saray Tasi nen Jehova Iray Datin Kabiangan na Relihyon Da?

Pansasagpotan mi ya ipanengneng so panangaro, kamaongan, tan respeto ed amin. No say sakey ya Tasi nen Jehova et kinmapuy odino tinmunda ed pandadayew to, manggagawa kami paraan pian napaseseg mi, nipalikna min inaro mi, tan natulongan min onapit lamet ed Dios.—Lucas 15:4-7.

Diad arum ya situasyon, ompan makagawa so sakey ya Tasi na bengatla ya lapud satan et naekal ed kongregasyon. (1 Corinto 5:13) Pero lapud talagan inar-aro mi ray kaagian mi, tutulongan mi lan tampol itan ya agi mi pian agla onsabid punto ya kaukolan lan ekalen ed kongregasyon. Balet no bilang ta talagan naekal, ipanengneng mi nin siansia ya inar-aro tan rerespetoen mi ya singa ipapaseseg na Biblia ya gawaen mi.—Marcos 12:31; 1 Pedro 2:17.

Antoy nayarin pakaekalan na sakey Tasi ed kongregasyon?

Malinew ya ibabaga na Biblia ya no makagaway seryoson kasalanan so sakey ya Kristiano tan agto labay so manguman, kaukolan ya ekalen ed kongregasyon.a (1 Corinto 5:11-13) Nabasa tayod Biblia iray seryoson kasalanan ya nayarin pakaekalan na sakey ya Tasi ed kongregasyon. Kaibad satan so pikakalugoran, panagbuanges, panagpatey, panagmaltrato ed kapamilya, tan panagtakew.—1 Corinto 6:9, 10; Galacia 5:19-21; 1 Timoteo 1:9, 10.

Pero agmi basta-basta eekalen ed kongregasyon so sakey ya Tasin akagawa na seryoson kasalanan. Salien nin tulongan na saray elderb ed kongregasyon iyan too pian manguman. (Roma 2:4) Pansagpotan da ya sabien so puso to kanian maulimek, mauyamo, tan maomaong ira no mitongtong irad sikato. (Galacia 6:1) No gawaen da itan, nayarin naisip na samay nankasalanan ya aliwa iray ginawa to tan napakiwas ya manguman. (2 Timoteo 2:24-26) Pero no agmagbabawi tan gagagalaen to lay mankasalanan anggano aminpigapiga lan tutulongan na saray elder, kaukolan lan ekalen ed kongregasyon. Say gawaen na saray elder et iyanunsio da ed kongregasyon ya aliwa lan Tasi nen Jehova iyan too.

Maaron sisimbawaen na duaran elder so sakey ya kabataan ya brother panamegley na Biblia. Tatapoken na sakey ed sikara so takeb na brother legan ya mitotongtong ed sikato. — Pansasagpotan na saray elder ya sabien so puso na nankasalanan kanian maulimek, mauyamo, tan maomaong ira no mitotongtong irad sikato

Antoy maabig ya epekto no ekalen ed kongregasyon so sakey ya Tasin tuloytuloy nin manggagaway seryoson kasalanan? Say sakey et nipanengneng na kongregasyon ya susuportaan day estandarte na Dios ed moral tan agmet itan naimpluensyaan ed mauges ya kagagawa na samay nankasalanan. (1 Corinto 5:6; 15:33; 1 Pedro 1:16) Sakey ni, nayarin napakiwas iman ya too ya itunda so gagawaen ton kasalanan tan pansagpotan toy manguman.—Hebreo 12:11.

Panon so pantrato na saray Tasi nen Jehova ed saray nakal ed kongregasyon?

Ibabaga na Biblia ya kaukolan ya “tundaan” na saray Kristiano so “miulop” ed sakey ya nakal ed kongregasyon, tan ‘ag-ira anggan midudungo ed ontan ya too.’ (1 Corinto 5:11) Kanian agkami miuulop ed saray nakal ed kongregasyon. Pero agto labay ya ibagan agmi la ran balot ibano. Diad tua, rerespetoen mi ni ran siansia. Welcome ni ran siansia ya onatendi ed pantitipon mi tan sarag mi ran ibano no onatendi ira.c Tan no labay da lay makapawil ya Tasi, sarag day manpatulong ed saray elder.

Maar-aron in-welcome na sanasawan Tasi so sakey ya biin nakal ed kongregasyon. — Anggano nakal so sakey ya Tasi, sarag to nin siansia so onatendi ed saray Kristianon pantitipon mi

Panon to no Tasi so asawa tan ananak na sakey ya nakal ed kongregasyon? Agnapultot so relasyon tod asawa tan ananak to, pamilya ni ran siansia. Tan lapud wala rad saksakey ya abung, ag-ira nabawalan ya ipanengneng so panangaro dad sakey tan sakey. Say manguman labat et say espiritual ya relasyon da.

No labay na sakey ya nakal ed kongregasyon ya bisitaen na saray elder, sarag to itan ya ibagad sikara. No pasyaren na saray elder, maaro dan bilinen panamegley na Biblia tan pasesegen dan magbabawi tan ompawil ed si Jehova. (Zacarias 1:3) No intunda to lay mauges ya gagawaen to tan napatnagan lad kabibilay to ya tutumboken to la ray ganggan na Biblia ed moral, makapawil lamet ya Tasi. No akapawil la, ‘mapangasin perdonaen tan ligliwaen’ na kongregasyon ya singa samay impangawat na saray Kristiano ed Corinto nen akapawil so sakey ya lakin datin nakal ed kongregasyon.—2 Corinto 2:6-8.

Antoy nalilikna na saramay datin nakal ya Tasi?

Imano yoy imbaga na pigaran Tasi nen Jehova ya datin nakal tan natan et akapawil lad kongregasyon.

“Nen labay ko lay ompawil ed kongregasyon, say amtak et ungkaten ni na saray elder so amin ya ginawak manlapu la nen nakal ak ed kongregasyon. Pero andi. Say kuan dad siak, ‘Agmo la nononoten so apalabas. Manpokus ka la ed saray sarag mon gawaen natan.’ Kanian, akakkainawa ak!”—Maria, United States.

“Nen anengneng ko ya tatalaranan la na saray agagi so ipawil ko, alikliknak ya importante ak ed sikara. Impalikna dad siak ya aperdona da ak la tan aperdona ak met la nen Jehova. Baleg so nitulong to itan pian agko la sankanonot so apalabas. Lanang ya wadtan iray elder ya ontulong ed siak pian ombiskeg lamet so relasyon kod si Jehova. Tinulongan da ak pian nanengneng ko ya talagan inaro tan importante ak nin siansia ed si Jehova.”—Malcom, Sierra Leone.

“Atalosan ko ya inaro nen Jehova iray totoo to ta labay ton mansiansian malinis so organisasyon to. Anggano parad arum et masyadon istrikto tan anggapoy panangasi na saray Tasi, amtak ya atan so duga tan pangipanengneng itan na panangaro nen Jehova. Misatsalamat ak ta maar-aro tan mapangasin Dios si Jehova.”—Sandi, United States.

No antoy ibabaga na saray aliwan Tasi nen Jehova ya eksperto ed batas

Antoy ibabaga na saray korte tan saray eksperto ed batas nipaakar ed pangeekal na saray Tasi nen Jehova ed saray kabiangan na relihyon da ya tuloy-tuloy nin manggaway seryoson kasalanan? Nia ray komento da:

“Duga labat ya ekalen na sakey ya relihyon ya manguunor ed saray prinsipyo na Biblia so siopaman ya ag-ontutumbok ed saratan ya prinsipyo. No isipen tayo, duga met labat itan. Ta no say sakey et agto lanlamang labay ya tumboken iray prinsipyo na Biblia, agsirin makanepegan ya magmaliw ya kabiangan na satan ya relihyon. Sakey ni, no agnaekal ompan naimpluensiaan to iramay matoor ya manguunor ed saray prinsipyo na Biblia.”—The High Court of Justice, England and Wales, Hunyo 7, 2019.
“Imbaga na saray korte ed Europe tan ed arum nin lugar ya walay kanepegan na saray Tasi nen Jehova ya . . . ekalen so sakey ya kabiangan na relihyon da no walay agto nauunor ed saray prinsipyon tutumboken na relihyon da ta walay tatawagen ya freedom of religion . . . Tan agmet itan nepeg ya pibabalian na korte.”—Professor Paulo Pinto de Albuquerque, datin judge na European Court of Human Rights.

a Dati, adispelo so tawag mi ed saramay agmagbabawin nankasalanan. Pero say ibabaga mi la natan et nakal ed kongregasyon bilang pangalig ed terminon inusar na Biblia.

b Saray elder et matoor ya Kristianon lalaki ya saray ibabangat da et manlalapud Biblia tan tutulongan tan papasesegen da ray totoo nen Jehova panamegley na pan-shepherding ed sikara. Anggapoy sueldo da ed saray gagawaen da.—1 Pedro 5:1-3.

c Wala ray situasyon ya aglabat basta onekal ed kongregasyon so sakey ya nankasalanan, ompan salien to met ya deralan so kongregasyon odino impluensyaan toy arum ya manggawa met na mauges. No ontan so nagawa, tumboken mi may ganggan na Biblia ya ‘ag-ibano’ so ontan ya too.—2 Juan 9-11.