Antoy Ibabaga na Biblia Nipaakar ed Kawayangan Tayon Mandesisyon? Kontrolado Kasi na Dios so Kapalaran Tayo?
Say ebat na Biblia
Sarag komon ya kontrolen na Dios so kapalaran tayo, pero agto itan ginawa ta rerespetoen toy kawayangan o kalayaan tayon mandesisyon. Imanoen tayoy ibabangat na Biblia.
Pinalsa itayo na Dios base ed indengan to. (Genesis 1:26) Labay ton ibaga, sarag tayon ipanengneng iray balibalin kualidad na Dios singa say aro tan hustisya. Sakey ni, inikdan itayo na Dios na kawayangan ya mandesisyon. Aliwa tayon singa saray ayayep ya no anto labat so impakapalsa o instinct da et aman labat lay gawaen da.
Walad sikatayo no labay tayon magmaliw ya balibali bilay tayo diad arapen. Diad tua, nabasa tayo ed Biblia ya labay na Dios ya ‘pilien tayo so bilay diad idengel tayo ed sikato,’ nagawaan tayo ’tan no unoren tayo ray ganggan to. (Deuteronomio 30:19, 20) Pero nagawaan tayo ’tan kasi no anggapoy kawayangan tayo? Tandaan tayo met ya ag-itayo pipiliten odino puepuersaen na Dios. Diad tua, onia ni ingen so maaron kerew to: “No dengelen mo labat komon iray ganggan ko! Diad ontan, say kareenan mo et magmaliw a singa ilog.”—Isaias 48:18.
Balanglan balibali o andi so nagagawad bilay tayo, aliwan atan so kapalaran tayo. No labay tayoy ontalona o man-success ed amin ya gagawaen tayo, kaukolan tayoy mankuli tan panirapan itan. Oniay bilin na Biblia: “Antokaman a nayarin gawaen na limam, gawam ed amin a biskeg mo.” (Eclesiastes 9:10) Nia ni sakey ya bilin na Biblia: “Saray plano na makuli et seguradon ontalona.”—Proverbio 21:5.
Say kawayangan tayon manpili o mandesisyon et mabmablin regalo na Dios. Atan so ontulong ed sikatayo pian aroen tayoy Jehova diad ‘interon puso tayo.’ Gawaen tayo ’tan lapud atan so labay tayo, aliwan lapud atan so aka-program ed sikatayo.—Mateo 22:37.
Diba kontrolado na Dios so amin a bengatla?
Ibabangat na Biblia ya say Dios so Makapanyarin-amin, tan anggapoy limitasyon na pakapanyari to. (Job 37:23; Isaias 40:26) Pero agto itan uusaren ed amin ya panaon. Singa bilang, nabasad Biblia ya “pinokpokan” o pinigilan na Dios so sarili to kontrad Babilonia, say bansan kalaban na saray totoo to nensaman. (Isaias 42:14) Ontan met natan, itetepel ni na Dios iramay totoon aabusoen day kalayaan da pian sakitan day arum. Pero onsabi panaon et onaksion lanlamang so Dios tan panganggaen to itan.—Salmo 37:10, 11.