Atangguyor Koy Asawak ‘Anggano Agak Nansalita’

Inyanak ak ed Romania nen 1952. Tasi si nanay ko pero binmetel ira kanian agkon balot asali so miaral ed saray Kristianon pantitipon. Tan diad saman, komunistan bansa so Romania kanian sebel so panag-imprinta tan panagpulong a kimey na saray Tasi. Kanian diad loob na 36 ya taon ya impanbilay ko, agko kabat si Jehova tan agko amta no antoy ibabangat na Biblia. Pero nen 1988, nen manaayam kami nen asawak ya si István diad syudad na Satu-Mare, walay agawan akapanguman na bilay ko.

Inawat Kon Tampol Iman ya Imbitasyon

Aminsan, binisita ak nen nanay ko tan kuan to, “Ga, mila kad siak ta pasyaren tay auntie’m insan ta man-shopping.” Anggapo met so importantin gawaen kod saman kanian akila ak.

Kasabi mid abung nen auntie’k naamtaan ko ya diad saman et wala dimay nagagawan aral na saray Tasi nen Jehova, manga siamera iran wadman. Naamtaan ko met ya mimiaral lay nanay ko tan sinmeseg lamet. Alabayan kon maong iramay arengel ko ed saman ya kabuasan.

Kayari na aral, dinago to ak may sakey ya lakin nansalita ed arap tan nampakabat ed siak, kuan to: “Siak si János. Naimanok ya madengedengel ka. Kumusta ey, agustoan mo ray arengel mo nen niman?” Imbagak ed sikato ya first-time koy akiaral ya singa onman tan labay ko lamet so ompawil. Kanian tinepetan to ak, “Labay moy manaral na Biblia?” Inawat kon tampol iman ya imbitasyon. Aliknak ya say Dios so nanggaway paraan pian nakabat ko irayan totoo.

Kaimbuasan to, impakabat nen János ed siak si Ida, tan sikatoy angiyaral ed siak na Biblia. Balet natatakot ak ed ibaga nen asawak no naamtaan ton iyaaralan ak na Biblia na saray Tasi nen Jehova. Aminpigak ya sinalin ibagad si István balet aga interesado ed ibabagak. Tan nalilikas ko ya agnaliliketan ed panaaral ko na Biblia.

Anggaman ontan, intuloy koy panaaral koy Biblia tan abautismoan ak nen Agosto 1989. Kalabas na apatiran bulan, aliwa lan Komunistan bansa so Romania ta walay amatey ed lider da.

Mas Lalon Apasegsegang Ak

Lapud asalatan lay gobierno, bulos lan nagawaan na saray Tasi nen Jehova iray kimey da kanian makapantitipon tan makapampulong kami la ed publiko. Pero lapud satan met ya pananguman, seguradon mas pasegsegangen ak nen asawak. Impurpurek tod siak, “Agtaka la pibabalian ed satay papanisiaan mo, basta agtaka labay ya nanengneng ya manpulong ed kaabungan.”

Pero siempre, agak ontunda ya manpulong. (Gawa 4:20) Kanian inyamot koy pampupulong ko. Balet aminsan, anengneng ak na saray kakaaro nen István ya manpupulong tan indalem da ak ed sikato. Kasempet kod abung, ineyagan to ak! Tan say kuan to: “Agmo ak la nirespeto, tan inyan mod kababaingan so pamilya tayo!” Tinutokan to ak na yuro ed beklew tan tinaktakot to ak ya pateyen to ak kuno no agak ontundan manpulong.

Sinalik ya ipaliwawad si István so situasyon ko tan impasegurok ya agmanguman so panangarok ed sikato. Kinmalmay asawak nen imbagak itan, pero wala tay inkagawa ya nampasnok lamet ya maong ed siak ta agak inmatendi ed kasal na sakey ya maapit ya kanayon mi ya dumay relihyon to. Manlapud saman et mas lalon ansasakit so panagsalita tod siak.

Makapaermen ta 13 ya taon kon inanosan itan ya ugali nen István. Diad saraman ya taon, aminpigapiga to ak ya tinaktakot ya isian to ak kuno. No maminsan, italakan to ak na puerta tan agto ak palooben ed abung mi. Tan wala ray panaon ya ipapabalkot to la ray gamit ko tan papalayasen to ak.

Amta yo no antoy akatulong ed siak ed saratan ya mair-irap ya situasyon? Lanang kon ipipikasi ed si Aman Jehova ya pakalmaen to ak tan talagan alikliknak ya tutulongan to ak. (Salmo 55:22) Agak met tinaynan na saray agagi ed kongregasyon mi, wadtan iran lanang ya onsuportad siak. Pinaseseg ak na saray elder tan saray eksperiensyadon sister ya agak ontutunda ed panaglingkor ko. Lanang dan ipapanonot ed siak may ibabaga na Biblia ya sarag ya natangguyor na saray asawan bibii iray kaasawaan da ‘anggano ag-ira mansalita’ basta mansiansia ran mapekder tan matoor ed si Jehova. (1 Pedro 3:1) Tan apaneknekan kon mismo ya tua iman.

Anguman so Situasyon

Nen 2001 na-stroke si István kanian agla makaakar. Sakey bulan ya walad ospital tan pigaran simba ya nampa-therapy. Legan na saman ya panaon agkon balot tinaynan. Kada no mangan, susuboan ko tan iistoryaan ko, tan seseguroen ko ya niiter koy amin ya kaukolan to.

Binisita kami met na saray kakongregasyon ko ta labay dan nanengneng si István. Alikna ya mismo nen István so panangaro tan malasakit na saray agagi. Dakel so angibagan tulongan da kami ed saray kimey mi ed abung. Lanang met ya wadtan iray elder ya manligliwa tan mamaseseg ed sikami.

Lapud saraman ya imbisita da, nababaingan ya maong si István ed saray aliwliwan impantrato to ed siak. Insan to met naimano ya anggapoy anggan sakey ya kaaro to ya binmisitad sikato. Kanian kapaway tod ospital kuan to, “Labay koy manaral na Biblia tan magmaliw ya Tasi nen Jehova.” Akaakis ak lapud liket ko!

Nen Mayo 2005 abautismoan si István. Pero lapud agmakaakar, inyasingger na saray agagi so wheelchair to ed gilig na pambautismoan ed sikato, insan da inalwaran ya inalsa ya anggad danum pian nipalseb da. Nagmaliw ya maseseg ya managpulong na Panarian si István. Dakel so nanonotan kon balibalin eksperiensya mi diad ministeryo. Agak makapanisia! Agkon balot naimadyin ya amay toon amasegsegang ed siak lapud ipupulong koy katuaan ed Salita na Dios et kaibak lan mangipupulong na maong a balita ed arum!

Inar-aro nen István si Jehova tan inusar toy panaon to ya aralen tan i-memorize iray bersikulo na Biblia. Labalabay ton pantongtongan iratan ya bersikulo no kaiba mi ray kakongregasyon mi. Tan sasamboten to iratan ya pankanawnawa pian pasesegen ira.

Pero mas linmoor so sakit nen István. Aminpigan a-mild stroke kanian agmakasalita tan nagmaliw ya bedridden. Pero amta yo, agkinmapuy so seseg to! Manbilib ak ed sikato ta anggano nanairapan, agtinmundan manbasa tan manaral na Biblia. No wala ray ombibisitan agagi, walay uusaren ton gadyet pian makapitongtong nin siansia ed sikara tan napabiskeg toy pananisia ra. Kuan na sakey ya brother: “Labalabay kon nanengneng si István ta naliligliwa tan napapaseseg ak ed sikato.”

Makapaermen balet ta nen Disyembre 2015 nampainawa lay István. Maer-ermen ak ya maong lapud impatey to. Pero aminen ko ya talagan dinmeen met so nonot ko ta amtak ya antis nin inatey si István et nagmaliw lan kaaro nen Jehova. Sakey itan ed saray talagan panliliketan ko. Amtak ya wala lad memorya nen Aman Jehova si István tan si nanay ko. Labalabay ko la ran nanengneng tan nalakap lamet diad itatarya nen Jehova ya balon mundo.

Masulok lan 35 ya taon so linmabas manlapu lad samay imbisita mi nen nanay ko ed si auntie’k, agko man nalinglingwanan! Natan et masulok lan 70 so taon ko tan manlilingkor ak bilang regular payunir. Diad amin ya ginawa nen Jehova parad siak, agko amta no panon ak ya makabales ed sikato. (Salmo 116:12) Tinulongan to ak ya mansiansian matoor tan kalmado diad saramay panaon ya napapasegsegang ak. Tan naaralan kod saman ya nayari ni manayan manguman so situasyon diad paraan ya agtin balot iilaloan. On, agko inilaloan pero atangguyor koy asawak anggano agak nansalita.