Kugip nen Faraon

KAYARI duay taon, siansia nin walad prisoan si Jose. Sikatoy alingwanan la na managserbi na alak. Sakey ya labi, walay duaran kugip nen Faraon tan sankanonot to no antoy labay ya ibaga na saratan. Sikato tay nanaugip. Kaimbuasan, tinawag nen Faraon iray marunong ya lalaki tan imbaga tod sikaray kugip to. Balet, anggapoy makapangipatalos ed sikara.

Anonotan a siansia na managserbi na alak si Jose. Imbaga tod si Faraon: ‘Nen wala ak ed prisoan, walay laki diman ya makapangipatalos na kugip.’ Impatawag a tampol nen Faraon si Jose.

Imbaga nen Faraon so kugip tod si Jose: ‘Akanengneng ak na pitoran mararakep tan matataban baka. Insan akanengneng ak met na pitoran aliliwa tan mapmabeng ya baka. Tan kinan na saray mapmabeng ya baka iramay matataba.

‘Diad komaduan kugip ko, akanengneng ak na pitoran dawa na ilik a maiiyan tan matatakken. Insan akanengneng ak met na pitoran mapmabeng tan amagaan ya dawa na ilik. Et kinan na mapmabeng ya dawa na ilik iramay matataba.’

Imbaga nen Jose ed si Faraon: ‘Parehoy labay ya ibaga na duaran kugip. Saray pitoran matataban baka tan pitoran matataban dawa na ilik et kabaliksan toy pitoran taon, tan saray pitoran mapmabeng ya baka tan pitoran mapmabeng ya dawa na ilik et kabaliksan toy pitoran taon met. Pitoy taon ya dakel so naakan ed Ehipto. Insan onsabi so pitoy taon ya eras.’

Kanian imbaga nen Jose ed si Faraon: ‘Mamili ka na maisip ya laki tan gawam ya mangasikaso ed pantipon na kakanen legan na pitoy taon ya dakel so naakan. Pian agnaerasan iray totoo ed pitoy taon ya eras.’

Agustoan nen Faraon so imbaga nen Jose. Kanian pinili toy Jose ya mantipon na naakan. Si Jose so onkokomaduad si Faraon ya sankaimportantian ya too ed Ehipto.

Kayari waloy taon, nen ginmapo lay eras, anengneng nen Jose ya onsasabi so pigaran lalaki. Antam no siopa ra? Saray 10 ya kuya to! Imbaki ira na tatay dan si Jacob ta anggapo lay naakan da ed Canaan. Abidbir nen Jose iray kuya to, balet sikatoy agda abidbir. Antam no akin? Ta binmaleg lay Jose, tan duma lay panangawes to.

Anonotan nen Jose imay kugip to nen ugaw ni, ya tinmuek iray kuya to ed sikato. Nanonotan mo ni iman ya binasa tayo? Atalosan nen Jose ya say Dios so angibaki ed sikato diad Ehipto, tan walay maong ya rason. Anto kasi gawaen nen Jose? Nengnengen tayo.