Leksion 11
Saray Sisiaen tan Kustombre ya Agmamaliket ed Dios
Antoran nengneng na sisiaen tan kustombre so mauges? (1)
Nepeg ta a sisiaen na Kristianos a say Dios et sakey a Trinidad? (2)
Akin a saray tuan Kristiano so agmanseselebra ed Krismas, Easter, odino saray agew-na-inkianak? (3, 4)
Nayari ta a pasakitan na inaatey iray mabilay? (5)
Kasin inatey si Jesus ed sakey a krus? (6)
Panon kaimportanti so pamaliket ed Dios? (7)
1. Aliwan amin a sisiaen tan kustombre so mauges. Balet saratan so ag-aabobonan na Dios no saratan so manlalapud palson relihyon odino sumpad saray bangat na Biblia.—Mateo 15:6.
2. Trinidad: Kasin si Jehova so sakey a Trinidad—taloran persona ed sakey a Dios? Andi! Si Jehova, say Ama, so “say saksakey a tuan Dios.” (Juan 17:3; Marcos 12:29) Si Jesus so panguloan ya Anak To, tan sikato so pauleyan ed Dios. (1 Corinto 11:3) Say ama so babaleg nen say Anak. (Juan 14:28) Say masanton espiritu so aliwan sakey a persona; satan so aktibon puersa na Dios.—Genesis 1:2; Gawa 2:18.
3. Krismas tan Easter: Agniyanak si Jesus ed Disyembre 25. Sikato so niyanak ed manga Oktubre 1, tiempo na taon sano saray managpastol so manpapastol ed saray pulok da ed paway diad labi. (Lucas 2:8-12) Agbalot ingganggan nen Jesus ed saray Kristiano a selebraan so agew-na-inkianak to. Imbes, imbaga to ed saray babangatan to a nodnonoten, odino tandaan, so impatey to. (Lucas 22:19, 20) Say Krismas tan saray kustombre to so nanlapud kadaanan iran palson relihyon. Ontan met ed saray kustombre ed Easter, a singa say panangusar ed saray iknol tan koneho. Agsenelebraan na inmunan Kristianos so Krismas tan Easter, nisay seselebraan na saray Kristiano natan.
4. Agew-na-Inkianak: Say alenleneg a duaran selebrasyon na agew-na-inkianak ya asaglawi ed Biblia so ginawa na totoon agnandayew ed si Jehova. (Genesis 40:20-22; Marcos 6:21, 22, 24-27) Saray inmunan Kristiano so agnanselebra ed saray agew-na-inkianak. Say kustombre na panagselebra ed saray agew-na-inkianak so nanlapud saray kadaanan a palson relihyon. Mangiiter iray tuan Kristiano na saray regalo tan mankakasakey a manliliket ed arum a panaon legan na taon.
5. Takot ed Inaatey: Saray inaatey so agmakagawa na antokaman odino makalikna na antokaman. Agtayo ira natulongan, tan sikaray agmakayarin mamasakit ed sikatayo. (Salmo 146:4; Eclesiastes 9:5, 10) Say kamarerwa so ompatey; ag-itan manbilay kayari na ipapatey. (Ezequiel 18:4) Balet no maminsan saray marelmeng ya anghel, a natatawag a dedemonyo, so mankuankuanan a sikaray espiritu na inaatey. Dinanman a kustombren nisisiglaot ed itakot odino pandayew ed inaatey so agmanepeg.—Isaias 8:19.
6. Krus: Ag-inatey si Jesus ed krus. Sikato so inatey ed sakey a lusek, odino sakey a kiew. Say Griegon salita a nipatalos a “krus” ed dakel a Biblia so mankabaliksan na sakey labat a piraso na tabla. Say simbolo na krus so nanlapud kadaanan iran palson relihyon. Say krus so ag-inusar odino dinayew na inmunan Kristianos. Sirin, kasin isipen mon duga so pangusar ed krus diad panagdayew?—Deuteronomio 7:26; 1 Corinto 10:14.
7. Nayarin mairap so pangitalirak na pigara ed sarayan sisiaen tan kustombre. Saray kakanayon tan kakaaro so nayarin manggunaet a mangombensi ed sika ya agsasalatan iray sisiaen mo. Balet say pamaliket ed Dios so mas importanti nen say pamaliket ed totoo.—Uliran 29:25; Mateo 10:36, 37.
[Litrato ed pahina 22]
Say Dios so aliwan sakey a Trinidad
[Litrato ed pahina 23]
Say Krismas tan Easter so nanlapud kadaanan iran palson relihyon
[Litrato ed pahina 23]
Anggapoy rason a dayewen so inaatey odino takotan ira