Libron Sankalaknaban so Inkibunog To’d Mundo
“Say Biblia so sankalaknaban a babasaen a libro ed awaran. . . . Mas dakel a kopya na Biblia so nibunog la nen say dinanman a libro. Say Biblia so nipapatalos met la ed mas dakel a danay, tan ed mas dakel a lenguahe, nen say dinanman a libro.” —“The World Book Encyclopedia.”1
DIAD arum a pamaakaran, maslak a libro so mipara’d totoo. Niwala ra, onbantog ira, tan—nilikud ed pigaran klasika—ondaan tan agla makabaliksan. Mabetbet ya onkakanan pinagka-sementeryo iray librarya parad agnabilang a liblibron laos la, agnababasa tan, bilang resulta et inaatey la.
Anggaman ontan, midumaan a tuloy so Biblia anggan diad saray libron klasika. Anggaman 3,500 lan taon so apalabas manlapud inkisulat to, siansian mabilabilay ni. Satan labat so libron sankalaknaban a nibubunog ed dalin.a Kada taon, onliligada’d 60 milyon a kopya na kompleton Biblia odino kabiangan to so nibubunog. Naimprinta nen ngalngalin 1455 so inmunan edisyon manlapud niyalis-alis a panag-imprinta nen Aleman ya imbentor a si Johannes Gutenberg. Nanlapulad saman et walay akalkulan apatiran bilyon a Biblia (kompleto odino kabiangan labat) so niimprinta la. Anggapo lay arum a libro, relihyoso man odino andi, so akaabot ed ontan a kinarakel.
Say Biblia so sankalaknaban met a nipatalos a libro ed awaran. Say kompleton Biblia odino kabiangan to et nipatalos la ed masulok a 2,100 a lenguahe tan dialekto.b Nabasa la na masulok a 90 porsiento ed atooan a pamilya so kabiangan na Biblia ed dili ran lenguahe.2 Sayan libro sirin so akabeltang la’d saray ketegan na nasyon tan tinatalonaan toray babeng ed rasa tan tribu.
Aliwan say estatistika labat so mapuersan rason pian usisaen mo so Biblia. Anggaman ontan, say dagup na sirkulasyon tan patalos et makapadinayew, a papamintuaan day sankatalbaan a pakasagyat ed Biblia. Maseguron makana labat a sukimaten yo so sankasaliwan tan sankalaknaban a nipatalos a libro ed amin ya awaran na too.
[Saray paimano ed leksab]
a Impasen a say ontumbok a sankalaknaban a nibubunog a publikasyon et say ambalangay-apis a bokletan Quotations From the Works of Mao Tse-tung, ya akalkulan 800 milyon so kopyan nilako odino nibunog la.
b Say estatistika ed bilang na saray lenguahe et nibasi ed saray numeron impalapag na United Bible Societies.
[Litrato ed pahina 6]
Say Gutenberg a Biblia, ed Latin, so sankaunaan a kompleton libron inimprinta ed niyalis-alis a panag-imprinta