Panangulit Pian Idanet

LAKTIPEN na epektibon panagbangat so panangusar ed panangulit. Sano nibagan maminpiga so sakey ya importantin punto, satan so nayarin lalon natandaan na saray onderengel. No naulit ya imbaga so ideya ed paraan a miduma na daiset, nayarin nasarag da ni ingen a talosan itan a maong.

No agnatandaan na saray dumerengel mo so ibagam, saray salitam so agmangimpluensya ed walan sisisiaen da odino ed say panagbilay da. Nayarin itultuloy dan nonoten iray punto a kaukolan mo nin idanet a maong.

Si Jehova, say Engranden Instruktor tayo, so angiletneg na ehemplo ed sikatayo diad panangusar to ed panangulit. Inter to so Samploran Ganggan ed nasyon na Israel. Diad panamegley na pinagkasangiyan ya anghel, tinenyeg to so nasyon ya ondengel ed saratan a ganggan diad Palandey Sinai. Saginonor et saratan so inter to ed si Moises diad porman insulat. (Exo. 20:1-17; 31:18; Deut. 5:22) Diad panangiwanwan nen Jehova, saratan so inulit ya imbaga nen Moises ed nasyon sakbay na inloob da ed Insipan a Dalin, tan diad panamegley na masanton espiritu, satan so inkurit nen Moises, a singa naromog ed Deuteronomio 5:6-21. Sakey ed saray ganggan a niiter ed Israel et say kakaukolanen ya aroen tan lingkoran da si Jehova ed interon puso, kamarerwa, tan biskeg da. Saya met so naulit-ulit a nibaga. (Deut. 6:5; 10:12; 11:13; 30:6) Akin? Lapud, singa imbaga nen Jesus, satan ‘so sankabalgan tan unonan ganggan.’ (Mat. 22:34-38) Diad panamegley nen propeta Jeremias, pinanonotan nen Jehova so totoo na Juda ed masulok a 20 danay nipaakar ed inkaseryoso na katutulok ed sikato diad amin a bengatlan ingganggan to ed sikara. (Jer. 7:23; 11:4; 12:17; 19:15) Tan diad panamegley nen Ezequiel, imbaga na Dios ed masulok ya 60 danay a saray nasyon “et naamtaan da ak a siak si Jehova.”​—Eze. 6:10; 38:23.

Diad rekord na ministeryo nen Jesus, naimano tayo met so epektibon usar na panangulit. Alimbawa, walay apatiran Ebanghelyo​—kada sakey so mangisasalaysay ed saray importantin agawgawa a nireport ed sakey odino onsulok ni ed arum ya Ebanghelyo balet minoria irayan agawgawa ed medyo mandurumaan a punto de bista. Diad mismon impanbangat to, kinobrian nen Jesus so parehon manunan punto na panagbangat ed aminpigan inkagawa balet ta diad nanduruma iran paraan. (Mar. 9:34-37; 10:35-45; Juan 13:2-17) Tan legan a walad Palandey na Olibo pigaran agew sakbay na impatey to, inusar nen Jesus so panangulit pian idanet iyan makanan simbawa: “Manpuyat kayo sirin, . . . ta agyo amta no anton agew so isabi Katawan yo.”​—Mat. 24:42; 25:13.

Diad Lawak na Ministeryo. Sano manpulong ka ed totoo, ilaloan mon natandaan da komon so ibagam. Say epektibon panangusar ed panangulit so makatulong pian nagegemtan itan a kalat.

Mabetbet, say panangulit diad bektan nasisingbat so sakey a pamaakaran so ontulong ed kipaslep na satan diad nonot na too. Kanian, kayari na pamasa ed sakey a teksto, nidanet mo itan diad pangipabitar ed manunan kabiangan na satan insan itepet, “Kasin naimano yo so inkisalita na satan a teksto?”

Nayarin nausar met ya epektibo so unor iran estansa diad pantotongtong. Alimbawa, nayarin ibagam: “Say manunan punton ilaloan kon natandaan yo ed impantongtong tayo et say . . .” Insan basta labat uliten itan. Nayarin singa onia: “Gagala na Dios a say dalin so magmaliw a paraiso. Seguradon nasumpal itan a gagala.” Odino ikuan: “Malinlinew ya ipapanengneng na Biblia a manbibilay itayo la ed kaunoran iran agew na sayan sistema na bengabengatla. Pian makaliktar itayo ed anggaan na satan, nepeg tayon aralen so kakaukolanen na Dios ed sikatayo.” Odino nayarin onia: “Singa naimano tayo la, iyoopresi na Biblia so praktikal a simbawa ed no panon ya arapen iray problema ed bilay na pamilya.” Diad arum a kipapasen nayarin basta labat uliten so sakey ya inaon ed Biblia bilang punton tandaan. Siempre, kaukolan so masakbay a pannonot pian saya so epektibon nagawaan.

Diad saray panagpawil, pati ed saray panangiyaral ed Biblia, say pangusar mo ed panangulit so nayarin managlawi ed saray tepetepet ed repaso.

No nairapan so sakey a toon mantalos odino mangiyaplika ed simbawa na Biblia, nayarin kaukolan mon ibangon so suheto a maminpiga. Panggunaetan a singbaten itan diad nanduruman anggulo. Agkaukolan ya andukerukey iray singbatan noagta nepeg a managyat ed iyaaralan a pirmin manmorekdek ed pamaakaran. Tandaan, inusar nen Jesus so onian panangulit diad panulong ed saray babangatan to a talonaan so pilalek ya ompasen ed unaan.​—Mat. 18:1-6; 20:20-28; Luc. 22:24-27.

Sano Manpapaliwawa. No manpapaliwawa ka ed plataporma, say gagalam et aglabat la basta ipresenta so impormasyon. Labay mon natalosan itan, natandaan itan, tan iyaplika itan na saray dumerengel mo. Pian nagawaan itan, epektibon gawaen so panangulit.

Anggaman ontan, no mabetbet lay pangulit mo ed saray manunan punto, ompan naandi so imano na saray dumerengel mo. Maalwar a pilien iray punton mankaukolan na nikaduman danet. Kaslakan a saraya so manunan punto ya akabasiyan na paliwawam, balet nayarin ilaktip da met so arum a punton walaan na nikaduman kablian ed saray dumerengel mo.

Pian nausar so panangulit, nayarin idatak mo nin unona iray manunan puntom diad introduksion. Gawaen mo itan diad antikey iran balikas a mangiter na malaknab a punto ed no anto so kobrian mo, tekep na tepetepet, odino antikey iran alimbawan mangiyarap na saray problema a solbaren. Nayarin ibagam no kaunongan karakel so manunan punto tan saratan so ilista. Insan tibukelen so kada sakey ed saratan a punto diad lugan na paliwawam. Napabiskeg so danet ed lugan na paliwawam diad pangulit ed kada manunan punto sakbay ya onla ed ontumbok. Odino nayarin nagawaan itan diad pangusar na sakey ya alimbawa a manasaglawi ed kiyaplikaan na manunan punto. Nayarin nidanet ni a nagkalalo iray manunan puntom diad pangusar na konklusyon a mangulit ed saratan, mangipabitar ed saratan diad pangusar na pandurumaan, mangebat ed saray pinalesan tepet, odino mangidatak a magano na saray solusyon ed saray probleman inyarap.

Niarum ed tagey, say sakey ya atalitalin managpaliwawa so mangimanon maong ed saray sinansakey ed dumerengel to. No arum ed sikara so anengneng ton mairap dan tebeken so sakey ya ideya, say managpaliwawa so sikakabat ed satan. No importante so punto, satan so saglawien to lamet. Anggaman ontan, say pangulit ed parehon salita so nayarin agmanumpal ed gagala to. Wala ni nagkalalo ed panagbangat nen say satan. Nepeg a sikato so manangitukoy-tukoy. Nayarin kaukolan ton kalimbuatan ya aruman so paliwawa to. Say pakaaral mon mangimano ed saray pankaukolan na saray dumerengel ed onian paraan so maneterminan maong ed inkaepektibom bilang sakey a managbangat.