Inkatibukel na Tema

AMTA na saray atalitalin managpaliwawa so kablian na pakawalaay sakey a tema. Sano ipaparaan da so sakey a paliwawa, ontulong ed sikara so tema a mangiyapasakey na imano ed espesipikon lawak na impormasyon tan manmorekdek a maong ed satan. Say resulta et imbes a palawpaw dan saglawien so dakerakel a punto, idatak day materyal diad paraan a lalon makagunggona ed saray dumerengel da. No kada manunan punto so direktan nisiglaot ed tema tan ontulong ed kilaknab na satan, natulongan met iray dumerengel pian natandaan da iratan a punto tan apresyaen da so kabaliksan na saratan.

Anggaman nibaga a say temam so suheto na paliwawam, naromog mon onaligwas so kalidad na saray paliwawam no gawaen mon say temam et magmaliw a partikular a punto-de-bista a panibukelan mo ed suhetom. Say Panarian, say Biblia, tan say kioli so malaknab iran suheto. Walaray nanduruman tema a nayarin panibukelan ed sarayan suheto. Niraya so pigaran alimbawa: “Say Panarian, Sakey a Peteg a Gobierno,” “Gawaen na Panarian na Dios so Dalin a Paraiso,” “Say Biblia so Impuyan na Dios,” “Say Biblia so Praktikal a Giya Para ed Agew Tayo,” “Iyoopresi na Kikioli so Ilalo ed Saray Maneermen,” tan “Tulongan Itayo na Ilalo ed Kikioli a Mansiansian Malet Sano Nidunget ed Panamasegsegang.” Amin na sarayan tema so mankaukolan na panibukel tekep na nanduruman tuloy a punto.

Mitukoyan ed matalonan tema na Biblia, say impanpulong nen Jesu-Kristo legan na mangaraldalin a ministeryo to so angipabitar ed teman: “Asingger la so panarian na tawen.” (Mat. 4:17) Panon so inkatibukel na satan a tema? Masulok a 110 danay ed apatiran Ebanghelyo, ya atukoy itan a Panarian. Balet mas ni so ginawa nen Jesus nen say aminpigapigan impangusar ed terminon “panarian.” Namparan diad imbangat to tan diad saray milagron ginawa to, impalinew nen Jesus a sikato, a kaarap da, so Anak na Dios, say Mesias, say sakey a pangiteran nen Jehova na Panarian. Impanengneng met nen Jesus a diad panamegley to et alukasan so dalan pian arum so mibiang ed satan a Panarian. Impabidbir to iray kalidad a nepeg ya ipatnag na saramay naikdan na satan a pribilehyo. Diad saray bangat to tan saray makapanyarin gawa to, impalinew to so kabaliksan na Panarian na Dios ed bilay na totoo tan impabitar to a say impamataynan to ed saray demonyo diad panamegley na espiritu na Dios so ebidensyan ‘say panarian na Dios so peteg a sinmabi’ ed saray onderengel ed sikato. (Luc. 11:20) Nipaakar ed satan a Panarian so impangigangganan nen Jesus a pantasian na saray patumbok to.​—Mat. 10:7; 24:14.

Panangusar ed Matukoy a Tema. Agkakaukolanen ed sika so panibukel na sakey a teman mipara ed kalaknab na inkatibukel na Biblia, balet ontan la kaimportante so pakawalaan na matukoy a tema.

No makauley ka lan manpili na tema, konsideraen ya unona so gagala na presentasyon mo. Insan, legan a pipilien moray manunan punto a manibukel na outline mo, seguroen a saraya so peteg a manuporta ed teman pinilim.

No nipabtang so tema, analisaen a maong so ipapabitar na satan no nipaakar ed paraan a katibukelan na materyal mo. Nayarin kaukolan so sagpot diad pangapresya ed kablian tan potensyal na ontan a tema. No pilien mo so materyal a panibukelan mo ed nipabtang a tema, maalwar a pilien itan ta pian say tema so mansiansian niyapasakey. Diad biek a dapag, no niiter so materyal, siansia nin kaukolan mon analisaen no panon so pangusar mo ed satan a mitukoyan ed tema. Kaukolan mo met a konsideraen no akin a say materyal so importante ed saray dumerengel mo tan no anto so nepeg a gagalam diad pangipaliwawa ed satan. Saya so ontulong ed sika a manetermina ed no anto so idanet diad pangipaliwawam.

No Panon ya Idanet so Tema. Ta pian dugan nidanet so tema, nepeg mon iletneg so basiyan sano pilien tan uksoyen mo so materyal mo. No usaren mo lambengat so manuporta ed temam tan no tumboken moray prinsipyon nasasaglawi diad pangipaparaan ed maabig ya outline, ngalngalin automatikon nidanet mo so tema.

Makatulong so panangulit pian nidanet so tema. Diad klasikal a musika, say tema so sakey a tonadan maminpigan uliten ta pian napabitar ed interon komposisyon. Say tonada so agnaynay ya ompatnag ed parehon porma. No maminsan et sakey labat a balikas odino duara, sagpaminsan et nausar so panduruma ed tema, balet diad nandumaan a paraan, agaylan abig ya iparungtal na kompositor so tonada a manpawilpawil ya anggad walaan na epekto ed interon komposisyon. Ontan so nepeg ed tema na sakey a paliwawa. Say panangulit ed saray manunan salita ed tema so singa pawil-pawil a tonada na sakey a komposisyon ed musika. Saray kaulibay na sarayan salita odino say teman naulit ya imbaga so onkanan pandurumaan ed tema. Say pangusar ed ontan a paraan et manggawan say tema so magmaliw a manunan punto a natandaan na saray dumerengel mo.

Sarayan prinsipyo so aglabat onaplika ed saray paliwawa ed plataporma noagta ontan met ed pitotongtong ed lawak na ministeryo. Say medyo antikey a pantotongtong so magmaliw a lalon makatantanda no nipabitar so tema. Say niiter a bangat diad panagaral ed Biblia so lalon mainomay a nanonotan no nidanet so sakey a tema. Baleg so nagawaan na pansagpot mo ed pampili tan panibukel na matukoy iran tema pian onaligwas so inkaepektibom bilang managpaliwawa tan bilang managbangat ed Salita na Dios.