Akin ya Agnan-ayunal Iray Disipulo nen Jesus?

Akapriso si Juan Bautista manlapud samay kayari na inyatendi nen Jesus ed Paskua nen 30 C.E. Labay nen Juan ya saray disipulo to et magmaliw ya patumbok nen Jesus. Balet aliwan amin et kinmiwas kayari na pigaran bulan manlapu nen aprisoy Juan.

Nen manasingger so Paskua nen 31 C.E., linmad si Jesus so pigaran disipulo nen Juan tan intepet da: “Naynay kamin manaayunal, ontan met ed saray Fariseo, akin balet et agmanaayunal iray disipulom?” (Mateo 9:14) Manaayunal iray Fariseo bilang relihyoson ritual. Inusar ni ingen nen Jesus ed ilustrasyon to so nipaakar ed Fariseon mantutunongtunongan ed pikakasi to: “O Dios, misalamat ak ed sika ta aliwa ak a singa saray arum . . . Mamidua ak a manaayunal ed sakey simba.” (Lucas 18:11, 12) Nayarin manaayunal met iray disipulo nen Juan lapud kustombre itan. Odino nayarin lapud paneermen dad inkapriso nen Juan. Mankelaw met iray makakaimano no akin ya agmanaayunal iray disipulo nen Jesus, a singa say pibiang ed panermen lapud agawad si Juan.

Inmebat si Jesus panamegley na alimbawa: “Wala tay rason a manermen iray kaaro na nobyo no sikatoy kaiba da ni? Balet onsabi agew sano alaen lad sikara so nobyo, insan manayunal la rad satan.”​—Mateo 9:15.

Tinukoy nen Juan si Jesus bilang nobyo. (Juan 3:28, 29) Asumpal iya ta nen wadia nid dalin si Jesus, agnan-ayunal iray disipulo to. Balet no ompatey lay Jesus, manermen tan agmakapangan iray disipulo to. Manguman balet itan no sikatoy onoli lad bilay! Tan manlapud satan et anggapo lay rason da pian manayunal lapud ermen da.

Insan imbaga nen Jesus irayan duaran ilustrasyon: “Anggapoy siopaman a mangisakab na balon abel diad daan ya ilalatop a kawes, ta guyoren na balon abel imay ilalatop a kawes tan mas napilat laingen. Agmet iyan na totoo so balon alak diad saray daan a katat a panagkargaan; no gawaen da itan et ompilat iray katat a panagkargaan tan naibung so alak tan naderal iray katat a panagkargaan. Balet iiyan na totoo so balon alak diad saray balon katat a panagkargaan.” (Mateo 9:16, 17) Antoy labay ya ibaga nen Jesus?

Tutulongan nen Jesus iray disipulo nen Juan Bautista ya natalosan a saray papatumbok nen Jesus et agnaynay ya ontumbok ed kadaanan iran kustombre na Judaismo, singa say ritual ya panag-ayunal. Sikatoy aglinmad dalin pian sakaban tan pansiansiaey dagdaan lan paraan na panagdayew ya magano lan manampot. Say panagdayew ya ipapaseseg nen Jesus et agmitunosan ed Judaismo ed saman ya panaon, ya napnoy tradisyon na totoo. Agto sasalien ya sakaban na balon abel so daan ya kawes odino ikargay balon alak ed daan ya katat a panagkargaan.