Kakaukolanen ta na Dios so Panag-ayunal?

KAKAUKOLANEN na Ganggan na Dios a niiter ed panamegley nen Moises so panag-ayunal ed sakey ya okasyon lambengat​—diad tinaon ya Agew na Pananakbong. Inganggan na Ganggan a diad saman ya agew et saray Israelita so kaukolan a ‘mamaermen ed saray kamarerwa ra,’ a no talosan et kabaliksan ton sikaray nanayunal. (Levitico 16:29-31; 23:27; Salmo 35:13) Balet, sayan panag-ayunal so aliwa lambengat a pormalismo. Say panngilin ed Agew na Pananakbong so amakiwas ed totoo na Israel pian lalon sinononot ed babaleg a pakaamta ed inkamakasalanan da tan ed pankaukolan na pakadondon. Sikaray nanayunal ed satan met ya agew pian ibalikas so kaermenan da ed saray kasalanan da tan magbabawi ed arap na Dios.

Anggaman saya so obligado lambengat ed silong na Mosaikon Ganggan, saray Israelita so nanaayunal diad arum ya okasyon. (Exodo 34:28; 1 Samuel 7:6; 2 Awaran 20:3; Esdras 8:21; Ester 4:3, 16) Kalaktip ed saraya so boluntaryon panag-ayunal pian ipatnag so panagbabawi. Pinaseseg nen Jehova so nankasalanan a totoo na Juda: “Ompawil kayo ed siak, ed simoon a puso yo, tan tekep na panayunal, tan pannangis, tan paningel.” Nepeg a saya so aliwan akinpaway labat a panangipanengneng, lapud intuloy ya inkuan na Dios: “Mesmesen yo so puso yo, ya aliwa a saray kawes yo.”​—Joel 2:12-15.

Asabi panaon, dakel so nanayunal bilang pormalismo labat. Kadimla nen Jehova so ontan ya agmasimoon a panag-ayunal kanian tinepetan toray mansimpisimpitan ya Israelita: “Ontan ta so panayunal a pinilik? Say agew ta nipaakar ed too a pamairap to ed kamarerwa to? Ituek to ta so ulo to a singa sakey a talaib, tan ibuskag to ta so abel a magaspang tan dapodapol ed lepsag to? Tawagen mo naani so saya a nanayunal tan sakey ya agew a naawat ed kinen Jehova?” (Isaias 58:5) Imbes ya iparayag so panag-ayunal da, sarayan bangar a totoo so kinerewan a mangipatnag na kimkimey a matukoy ed panagbabawi.

Arum a panag-ayunal ya inletneg na saray Judio so agla inabobonan na Dios nanlapulad gapo. Alimbawa, walay panaon a saray totoo na Juda so walaan na apatiran tinaon a panag-ayunal pian nodnonoten so makadesyang iran ebento a nisiglaot ed inkakobkob tan impankibalatar na Jerusalem nen koma-piton siglo K.K.P. (2 Arari 25:1-4, 8, 9, 22-26; Zacarias 8:19) Kayarin nibulos iray Judio manlapud inkakautibo ed Babilonia, inkuan nen Jehova ed panamegley nen propetan Zacarias: “Sanen saman sikayoy nanayunal . . . , dia ed saraya lanlamang a pitomplo a taon sikayo ginawa yo ta so bengatla a panayunal ed siak, ed siak lanlamang?” Ag-inabobonan na Dios irayan panag-ayunal lapud saray Judio et nanayunal tan nanagogol lapud panangukom a nanlapud si Jehova a mismo. Sikaray nanayunal lapud kalamidad ya agawa ed sikara, aliwan lapud dilin kasalanan da ya angitonton ed satan. Kayarin nipawil lara ed binalegan dan dalin, panaon iman pian sikara so manggayaga imbes a manermen ed apalabas.​—Zacarias 7:5.

Para Ta ed Kristianos so Panag-ayunal?

Anggaman agbalot ginanggan nen Jesu-Kristo iray babangatan to a manayunal, sikato tan saray patumbok to so nanayunal ed Agew na Pananakbong lapud sikaray walad silong na Mosaikon Ganggan. Niarum ni, arum ed saray babangatan to so boluntaryon nanayunal ed arum niran okasyon, lapud ag-ira indirihi nen Jesus ya interamintin paliisan iyan kaugalian. (Gawa 13:2, 3; 14:23) Ingen, agbalot ‘balbaliwen day nengneng na kalupaan da pian nanengneng ira na totoo a manayunal.’ (Mateo 6:16) Say ontan ya akinpaway a panangipatnag na inkasimoon so nayarin mangitarok na pandinayew tan panangabobon na arum a totoo. Anggaman kuan, agnapapaliket so Dios ed ontan a panangiparayag.​—Mateo 6:17, 18.

Sinalita met nen Jesus so panag-ayunal na saray patumbok to diad panaon na ipapatey to. Sirin et agto ileletneg so ritual a panag-ayunal. Imbes, ipapatnag to so reaksion ed pirmin ermen a naeksperiensia ra. Bektaman a sikatoy napaoli, sikatoy nakaiba ra lamet, tan anggapo lan balot so rason pian manayunal ira.​—Lucas 5:34, 35.

Angangga so Mosaikon Ganggan sanen “si Kristo nisaklang ed aminpinsan pian awiten to so saray kasalanan na saray dakel.” (Hebreos 9:24-28) Tan diad impangangga na Ganggan, say ganggan a manayunal ed Agew na Pananakbong so angangga la. Kanian, say alenleneg ya obligadon panag-ayunal ya asalambit ed Biblia so nakal la.

Komusta Met so Kuwarisma?

Anto sirin so basiyan parad panag-ayunal na Kakristianoan legan na Kuwarisma? Bidbiren na namparan iglesia na Katoliko tan Protestanti so Kuwarisma, anggaman say pamaakaran na panag-ngilin ed satan so nanduruma diad saray iglesia. Arum so mangan a maminsan labat ed sanagew legan na sigpot a 40-agew a peryodo sakbay na Easter. Arum so sigpot a manaayunal ed Mierkoles Santo tan ed Biernes Santo. Parad arum, kakaukolanen na Kuwarisma so ipaliis ed karne, sira, iknol, tan saray produkto na gatas.

Ipapasen so Kuwarisma a nibase’d 40-agew ya impanayunal nen Jesus kayari na bautismo to. Diad saman, kasin sikatoy mangileletneg na ritual a kaukolan a tinaon a tumboken? Andin balot. Saya so mapatnag ed bengatlan say Biblia so agmangirerekord na antokaman ya ontan a kaugalian ed limog na inmunan Kristianos. Say Kuwarisma so inmunan nginilinan ed komapat a siglo kayari nen Kristo. Singa ed dakel niran bangat na Kakristianoan, satan so inadapta manlapud pagano iran lapuan.

No say Kuwarisma so panangalig ed impanayunal nen Jesus ed kalawakan kayari bautismo to, akin a ngingilinan legan na saray simba sakbay na Easter​—ya ipapasen a panaon na inkioli to? Agnanayunal si Jesus legan na saray agew sakbay na impatey to. Ipapanengneng na saray salaysay ed Ebanghelyo a sikato tan saray babangatan to so nanbisita ed saray ayaman tan angan ed Betania pigaran agew labat sakbay na impatey to. Tan sikatoy angan ed pangdem na Paskua ed labi sakbay na impatey to.​—Mateo 26:6, 7; Lucas 22:15; Juan 12:2.

Wala so bengatlan naaralan manlapud impanayunal nen Jesus kayari na bautismo to. Sikatoy akibiang ed importantin ministeryo. Say kialangon na inkasoberano nen Jehova tan say arapen na interon rasa na too so nasasaglawi. Saya so panaon parad aralem a panagdalepdep tan parad sipipikasin ikerew na tulong tan panangiwanwan nen Jehova. Legan na saman a panaon a matukotukoy a nanayunal si Jesus. Ipapatnag na saya a say panag-ayunal so makagungguna sano gawaen tekep na suston motibo tan diad matukoy ya okasyon.​—Ikompara so Colosas 2:20-23.

No Kapigan a Makagungguna so Panag-ayunal

Konsidiraen tayo pa so pigaran okasyon natan no kapigan a nayarin manayunal so sakey a managdayew na Dios. Say sakey a toon akapankasalanan so nayarin agmakapangan ed loob na pigaran panaon. Saya so aliwan pian pandinayewen so arum odino lapud sanok ed niiter a disiplina. Tan, siempre, say panag-ayunal a mismo so agmangipetek ed saray pamaakaran ed arap na Dios. Balet, say tuan magbabawin too so manlikna na pirmin kaermenan ed impakapasakit ed si Jehova tan nayarin pati saray kakaaro tan pamilya. Say panagogol tan masimoon a pikakasi parad panamirdona so nayarin mangekal na panpilalek ed tagano.

Ontan so eskperiensia nen Arin David na Israel. Sanen nipaarap ed posiblin ipapatey na ilalak ton laki ed si Bath-sheba, inyapasakey to so amin a sagpot to ed pikakasi ed si Jehova pian makagamor na panangasi nipaakar ed anak to. Legan a say emosyon tan biskeg to so sigpot a nisentro ed saray pikakasi to, sikatoy nanayunal. Ontan met, say pangan so nayarin ompatnag ya agmatukoy diad silong na ontan a makapagonigon a kipapasen natan.​—2 Samuel 12:15-17.

Nayarin walaray panaon sano say sakey a maridios a too so malabay a mangiyapasakey na imano to ed sakey ya aralem ya espiritual a pamaakaran. Say panagsukimat ed Biblia tan ed Kristiano iran publikasyon so nayarin kapilitan. Nayarin kaukolan so panaon parad pandalepdep. Legan na ontan ya okupadon panaon a panagaral, nayarin pilien na sakey so agpakaabala diad panamegley na pangan.​—Ikompara so Jeremias 36:8-10.

Walaray Makasulatan ya alimbawa na ariripen na Dios a nanayunal sanen kaukolan a seryoson mandesisyon. Diad agew nen Nehemias et ginawa so samba ed si Jehova, tan saray Judio so naayew sano sumlangen da itan. Insipan dan isian iray sankailin kaasawaan da tan mansiansian biig ed kabangibang iran nasyon. Sakbay a gawaen iyan samba tan legan na pangikompisal ed kasalanan da, say interon kongregasyon so nanayunal. (Nehemias 9:1, 38; 10:29, 30) Sano nipaarap ed mairap iran desisyon, nayarin say sakey a Kristiano so agni mangan ed loob na antikey a panaon.

Say panagdesisyon na saray ulop na mamatatken ed inmunan Kristianon kongregasyon so no maminsan et walay kabansag ton panag-ayunal. Natan, saray mamatatken na kongregasyon so nidudunget ed mairap iran desisyon, anganko et misiglaotan ed sakey a hudisyal a kaso, nayarin agto ni naarap so mangan legan a kokonsidiraen so pamaakaran.

Say panpilin panayunal ed pigaran sirkumstansia so indibidual a desisyon. Agnepeg ya ukomen na sakey a too so sananey ed sayan pamaakaran. Agtayo labay so “ompatnag a matunong ed totoo”; nisay ipasen tayon importanti so tagano a nayarin mangamper ed pangasikaso tayo ed saray seryoson obligasyon. (Mateo 23:28, NW; Lucas 12:22, 23) Tan ipapanengneng na Biblia ya agkakaukolanen na Dios a sikatayoy manayunal nisay sesebelan to itayon manayunal.

[Litrato ed pahina 7]

Amtam ta no akin a si Jesus so nanayunal ed loob na 40 agew kayari na bautismo to?