Panag-ayunal​—Iyapit Ka Kasi na Saya ed Dios?

‘No manayunal ka, makapannodnonot kan maong nipaakar ed relasyon mo’d Dios, tan nipanonot ed sikan aliwa labat a saray materyal a bengatla so sankaimportantian ed bilay.’​—SAKEY A KATOLIKON BII.

‘Say panag-ayunal et ontulong ed sikan onapit ed Dios.’​—JUDION RABBI.

‘Diad relihyon ko, obligasyon so panag-ayunal, tan im-importante iya pian nipanengneng koy debosyon tan pisasalamat ko ed Dios. Gagawaen ko iya ta inarok so Dios.’​—MEMBRO NA RELIHYON A BAHA’I.

SAY panag-ayunal (fasting) et kaslakan lan kabiangay panagdayew na dakel a relihyon diad interon mundo, singa say Budismo, Hinduismo, Islam, Jainismo, tan Judaismo. Papanisiaan na dakel a totoo a say agpangan ed loob na espisipikon peryodo et iyapit toy sakey ed Dios.

Antoy padesir mo? Nepeg ka kasin manayunal? Antoy ibabaga na Salitay Dios, say Biblia, ed saya?

Panag-ayunal Nensaman a Panaon

Nensaman, manaayunal iray totoo lapud pigaran rason ya aabobonan na Dios. Walaray manaayunal pian ipatnag so pinasyan ermen tan pagbabawi’d saray kasalanan da (1 Samuel 7:4-6), pian onkerew na pabor tan panangigiya na Dios (Uko-ukom 20:26-28; Lucas 2:36, 37), odino pian mas nisentro toy isip to legan ton mannonodnonot.​—Mateo 4:1, 2.

Anggaman ontan, diad Biblia et wala met iray sinalambit a panag-ayunal ya ag-aabobonan na Dios. Alimbawa, samay impanayunal nen Arin Saul antis a kinmonsulta ed espiritista. (Levitico 20:6; 1 Samuel 28:20) Ontan met ed impanayunal na mauuges a totoo a singa di Jezabel tan saramay panatikon namplano a mamatey ed kinen apostol Pablo. (1 Arari 21:7-12; Gawa 23:12-14) Saray Fariseo et kabkabat met ed regular a panag-ayunal da. (Marcos 2:18) Ingen ta kinondena ira nen Jesus, tan agda apaliket so Dios. (Mateo 6:16; Lucas 18:12) Imbaliwala met nen Jehova so impanayunal na arum ya Israelita lapud mauges a kagagawa tan motibo ra.​—Jeremias 14:12.

Ipapanengneng na sarayan alimbawa ya aliwan say mismon panag-ayunal so mamaliket ed Dios. Balet, dakel met so masimoon a lingkor na Dios a say impanayunal da et inabobonan To. No ontan sirin, kasin nepeg a manayunal iray Kristiano?

Kasin Obligadon Manayunal Iray Kristiano?

Diad samay Ganggan a niiter ed si Moises et walay instruksion a kaukolan a ‘paermenen na saray Judio so kamarerwa ra,’ salanti, manayunal ira maminsan ed sakey taon diad Agew na Pananakbong. (Levitico 16:29-31; Salmo 35:13) Saya so alenleneg a panag-ayunal ya ingganggan nen Jehova ed saray totoo to.a Kaukolan iyan unoren na saray Judio a sakop na Mosaikon Ganggan. Balet, diad saray Kristiano et agla onaplika so Mosaikon Ganggan.​—Roma 10:4; Colosas 2:14.

Anggaman nanayunal si Jesus unong a kakaukolanen na Ganggan, sikatoy ag-akabkabat ed saya. Imbaga to’d saray disipulo to no panoy nepeg dan ikiwas no desidien day manayunal, balet ta agto ran balot ingganggan a manayunal. (Mateo 6:16-18; 9:14) Akin balet et imbaga nen Jesus ed saray disipulo to a sikaray manayunal kayari ipatey to? (Mateo 9:15) Aliwa iyan ganggan noagta say labay labat ya ibaga nen Jesus et panermenan dan maong so ipatey to, ya anggad punton agda la labay so mangan.

Walay duaran salaysay ed Biblia nipaakar ed impanayunal na saray Kristiano nensaman a mangipapanengneng a no duga so motibo na sakey ed desisyon ton agmangan, aabobonan iya na Dios. (Gawa 13:2, 3; 14:23)b Kanian, ag-obligado iray Kristiano a manayunal. Ingen, no desidien na sakey a gawaen itan, nepeg a sikatoy manalwar.

Saray Nepeg a Panalwaran

Say sakey a manaayunal et nepeg a manalwar ta ompan magmaliw a mantunongtunongan. Say Biblia et amasakbay nipaakar ed ‘tilan panagpaabeba.’ (Colosas 2:20-23, Maung a Balita) Say ontan ya ugali et ag-aabobonan na Dios unong ya idadanet na samay ilustrasyon nen Jesus nipaakar ed malastog a Fariseo ya iisipen ton atagtagey so moral to lapud regular a panaayunal to.​—Lucas 18:9-14.

Lingo met no ibandom so panaayunal mo, odino manayunal ka labat lapud walay angiganggan ed sika. Diad Mateo 6:16-18, imbilin nen Jesus a say panag-ayunal et sakey a pribadon bengatla, a say nepeg labat a makaamta et sika tan say Dios, kanian agmo la itan ibabagbaga ed arum.

Agbalot nepeg ya isipen na sakey a daput no manaayunal et nalinisan laray kasalanan to. Pian naabobonan na Dios, say panag-ayunal et nepeg a tekepan na katutulok ed saray ganggan to. (Isaias 58:3-7) Say impapuson pagbabawi, aliwan say mismon panag-ayunal, so pakaperdonaan na saray kasalanan. (Joel 2:12, 13) Idadanet na Biblia a napeperdona itayo labat lapud agnaparaan a kaabigan nen Jehova a nipatnag panamegley na bagat nen Kristo. Imposible so pakagamor na panamerdona panamegley na antokaman a gawa, laktip lay panag-ayunal.​—Roma 3:24, 27, 28; Galacia 2:16; Efeso 2:8, 9.

Ipapanengneng na Isaias 58:3 [Maung a Balita] so sananey nin kaslakan a lingo. Ditan et singa ibabaga na saray Israelita a lapud panaayunal da et walay utang nen Jehova ed sikara, ya abaloan mo no gagawaan da na pabor so Dios. Intepet da: “Akin et manayuno kami no aglamlamang imanoen na KATAWAN so panayuno mi? Akin et manayuno kami anta agmet lamlamang imanoen na KATAWAN so agmi pangan?” Dakel met so maniisip natan a no manayunal ira et nailaloan day pabor na Dios. Agtayon balot komon aaligen so ontan ya inkaandiay-respeto tan agmakasulatan ya ugali!

Panisiaan met na arum a nagamoran day panangabobon na Dios no pappairapen day laman da panamegley na panag-ayunal, panag-penitensia, tan arum nira. Sarayan gawa et kokondenaen na Biblia a mangibabagan say “kadusaan na laman” et “anggapo so kakanaan da a mamaat” ed makapuy iran pilalek.​—Colosas 2:20-23.

Balansin Panmoria

Ag-itayo obligadon manayunal, balet ta anggapo met so uges to no gawaen tayo itan. Nayarin walaray situasyon a makagunggona itan no napaliisan iramay peligron asalambit. Balet aliwan sikato’tan so manunaan pian awaten na Dios so panagdayew tayo. Si Jehova et “maliket a Dios,” tan labay to met a manliket iray lingkor to. (1 Timoteo 1:11, NW) Oniay ibabaga na Salita to: “Amtak ya anggapo so bengatla a magmaong nipaakar ed sikara, nen say . . . balang too mangan tan oninum, tan manliket a maong ed amin a kimey to, sikato so pamalangkap na Dios.”​—Eclesiastes 3:12, 13.

Nepeg a magmaliw itayon maliket diad pandadayew tayo, ingen agbalot ibabaga na Biblia a makapaliket so panayunal. Niarum ni, no aliwliway epekto na satan ed laman tayo odino uupoten laingen na satan so kasil tayon parad maliket a kimey ya inmatalek na Manamalsa ed saray tuan Kristiano, salanti, say pangiyabawag na maong a balita na Panarian, talagan anggapoy kakanaan na satan.

Balet, desidien tayo man so manayunal odino andi, agtayo nepeg a husgaan so arum. Agnepeg a magmaliw iyan isyu ed saray tuan Kristiano, “ta say panarian na Dios aliwan nipaakar ed panangan tan panag-inum, noag ingen nipaakar ed katunongan, kareenan, tan liket ya iter na espiritu santo.”​—Roma 14:17, Maung a Balita.

[Saray paimano ed leksab]

[Blurb ed pahina 28]

Tila so kapaabebaan ya ipapanengneng na saray Fariseo sano manaayunal ira

[Blurb ed pahina 29]

“Say panarian na Dios aliwan nipaakar ed panangan tan panag-inum, noag ingen nipaakar ed katunongan, kareenan, tan liket”

[Kahon ed pahina 29]

Komusta Balet so Nipaakar ed Kuaresma?

Walaray mangibabagan say 40 agew a panagngilin ed Kuaresma et selebrasyon na 40 agew ya impanayunal nen Kristo. Balet, agbalot ingganggan nen Jesus iray disipulo to a selebraan itan tan anggapo met so ebidensyan nanselebra ira. Say napanmatalkan a sankaunaan ya impanalambit ed 40 agew a panagngilin antis na Easter et papanisiaan a walad sulat nen Athanasius ya apetsaan na 330 C.E.

Say impanayunal nen Jesus et sanen kayari bautismo to, aliwan antis na impatey to, kanian say makapakelaw et ngingilinan na arum a relihyon so Kuaresma diad saramay simban sakbay na Easter. Balet, say 40 agew a panagngilin diad bandad gapo na taon et kaslakan a gagawaen diad kadaanan a Babilonia, Ehipto, tan Gresya. Kanian mapatnag a diad sarayan lugar so nanlapuan na kuaresma ya ibabaga ran kustombre na Kristiano.