Mankakasakey a Gegemtanen so Kalat a Bilay

“Saya et kabaliksan to so andi-anggaan a bilay, diad pangala ra na pikakabat ed sika, say alengleneg a tuan Dios tan ed saman so imbakim, si Jesu-Kristo.”​—JUAN 17:3.

1. (a) Diad anton okasyon so inmunan analambitan nen Jesus ed “andi-anggaan a bilay”? (b) Siopa so nayarin makadampot ed sayan kalat?

SIKATO so sinmabin maamot, agnaimano, diad saray anino na labi. Saman si Nicodemo. Sikato so asagyat diad saray tandan ginawa nen Jesus ed Jerusalem diad panaon na Paskua nen 30 K.P. Diad sayan Pariseo, say Anak na Dios so nanggawa ed inmunan rekord diad impanalambit ed “andi-anggaan a bilay,” ya inyarum to irayan makaligliway-puson salita: “Ta ontan la so impangaro na Dios ed mundo ya inter to so bogbogtong ya Anak to, ta pian siopaman a mangagamil na pananisia ed sikato so komon agnaderal noagta nawalaan na bilay ya andi-anggaan.” (Juan 3:15, 16) Agaylan engranden pankanawnawa so nilulukas natan a para ed mundo na nayarin narondon a katooan! Akin, anggan say makinon a Pariseo so nayarin manpaabeba ta pian nadampot to so kalat.

2. (a) Diad leksab na antoran sirkumstansya a sinalita lamet nen Jesus so “andi-anggaan a bilay”? (b) Diad siopa a saray manangiter-bilay a danum so agawan akaparaan?

² Kayarin tuloy na saman, si Jesus so manbibiahe ed Jerusalem ya onla ed Galilea. Sikato so tinmunda ed sakey a bobon ed Samaria legan a saray babangatan to so linman manaliw na tagano. Sakey a bii so sinmabin onasol. Inkuan nen Jesus ed sikato: “Siopaman ya oninum ed danum ya iter ko so aglan balot napegaan anggan kapigan, balet say danum ya iter ko ed sikato so magmaliw ed sikato a sakey a subol na danum a manlippuan mangiter na andi-anggaan a bilay.” (Juan 4:14) Lapud saray Samaritanos so minudmora na saray Judios, akin ya inter nen Jesus so ontan a mablin ilalo ed sayan bii? Niarum ni, a singa kabat nen Jesus, sayan bii so walaan na pitoran asawa tan sikato natan so miaamong ya imoral ed sakey a lakin agto asawa. Ingen, a singa imbaga dia nen Jesus, saray manangiter-bilay a danum na katuaan so nitarya ya anggan diad saray minudmoran totoo ed mundo na katooan no saraya lambengat so magbabawi tan linisan da so bilay da.​—Ipareng so Colosas 3:5-7.

3. (a) Anton nengneng na “tagano” so irerekomenda nen Jesus? (b) Panon so inkasumpal na Juan 4:34-36?

³ “Andi-anggaan a bilay”! Malaknab nin tinibukel nen Jesus iyan tema sanen saray babangatan to so pinmawil tan pinaseseg dan mangan. Inkuanto ed sikara: “Say taganok et say panggawa ed linawa na saman so angibaki ed siak tan sumpalen so kimey to.” Anto itan a kimey? Inkuan nen Jesus: “Itangwa yoray mata yo tan bantagen yoray kaumaan, a sikara la so amputi a para ed panagani. Say managani so mangaawat la na upa to tan manitipon ed bunga a para ed andi-anggaan a bilay.” Say ontan a panagani so ilaloan, anggan diad limog na saray abebbeban Samaritanos, tan nagmaliw a magayagan kapetegan, a singa ipapanengneng na rekord. (Juan 4:34-36; Gawa 8:1, 14-17) Say panani a para ed andi-anggaan a bilay so mantutultuloy ya anggad sayan agew, balet natan say uma et say mundo. Saray babangatan nen Jesu-Kristo so siansia nin walaan na daakan a gawaen diad sayan kimey na Katawan.​—Mateo 13:37, 38; 1 Corinto 15:58.

“Say Langkap a Bilay”

4. Panon so impangebat nen Jesus ed saray Judios no nipaakar ed pananumpal ed Sabaton?

⁴ Linmabas so sakey taon. Natan et panaon na Paskua nen 31 K.P. A singa ugali to, si Jesus so wala ed Jerusalem a para ed piesta. Balet saray Judios so linman mamasegsegang ed sikato lapud sikato so nanggawa na maaron gawa na panagtambal ed Sabaton. Panon so impangebat nen Jesus ed sikara? Inkuanto: “Say Amak so mantutultuloy a mankikimey ya anggad natan, tan siak so mantutultuloy a mankikimey.” Kanian sikato so kinaliktan dan pateyen.​—Juan 5:17, 18.

5, 6. (a) Anton mablin pankakasakey so dineskribe natan nen Jesus? (b) Diad anton pamaakaran a si Jesus so walaan na “bilay ed inkasikato”?

⁵ Intuloy nen Jesus, anggaman kuan, a deskribien so sankablian a impankasakey​—say pankakasakey, odino inkasaksakey, a wala ed baetan to tan say Ama. Inkuanto ed saraman a Judios: “Ta say Ama so walaan na panangaro ed Anak tan impanengneng to ed sikato so amin a bengatlan ginawa ton mismo, tan ipanengneng to ed sikato iray kimey a babaleg nen saraya, ta pian sikayo komon so onkelaw.” Impanengneng to a si Ama to so angiter ed sikato na ekstraordinaryon pakayari, a kuanto: “Siopaman ya ondengel na salitak tan sisiaen to iman so angibaki ed siak so nawalaan na andi-anggaan a bilay, tan ag-ondateng ed panangukom noagta onlabas a manlapud patey ya ompugta ed bilay.”​—Juan 5:20, 24.

⁶ On, anggan saraman so “inatey” ed pakanengneng na Dios lapud tinawir a kasalanan so nayarin “makadngel ed boses na Anak na Dios” tan nabilay. Balet panon? Impaliwawa nen Jesus: “Ta unong a say Ama so walaan na bilay ed inkasikato, sirin inter to met ed Anak so pakawalaan na bilay ed inkasikato.” Saratan a salita, “bilay ed inkasikato,” so nayarin nipatalos a, “diad inkasikato et say langkap na bilay.” (Juan 5:25, 26, Ref. Bi., paimanod’leksab) Sirin nayarian nen Jesus ya iter ed totoo so maabig a talindeg ed arap na Dios. Nagkalalo ni, nayarian ton paolien tan iter so bilay ed saraman so naugip ed patey.​—Juan 11:25; Apocalipsis 1:18.

7. (a) Anto so ibabaga na Salmo 36:5, 9 nipaakar ed Dios? (b) Panon so impanumang nen Jehova ed manamemben-na-katooran ya Anak to?

⁷ Si Jehova so naynay a walaan na bilay ed inkasikato. Nisulat nipaakar ed sikato: “Diad sika so subol na bilay.” (Salmo. 36:5, 9) Balet natan et pinaoli na Ama so manamemben-na-katooran ya Anak to a nanlapud saray inaatey bilang “saray ununan-bunga na saraman so naugip ed patey.” Lapud diad “inkasikato et say langkap na bilay,” si Jesus so naikdan na pakayarin mamerdona ed saray kasalanan, a mangukom, tan mamaoli ed inaatey, tekep na panilalo ed andi-anggaan a bilay.​—1 Corinto 15:20-22; Juan 5:27-29; Gawa 17:31.

Sakey a Magayagan Pankakasakey

8, 9. (a) Panon so nayarin pamemben tayo ed kalat ya andi-anggaan a bilay? (b) Anto so inyareglo na Dios no nipaakar ed andi-anggaan a bilay? (c) Siopa so onsabin mibiang ed sarayan bendisyon, tan panon?

⁸ Sirin, sikatayo so sisimbawaen nen Judas a babangatan nen Jesus: “Pansiansiaen yo so inkasikayo diad aro na Dios, legan ya aalagden yo so panangasi na Katawan tayon Jesu-Kristo tekep na panilalo ed bilay ya andi-anggaan.” (Judas 21) Agaylan mablin kalat​—andi-anggaan a bilay! Tan saya so bilay ed inkayadyari, unong ed linawa na ayadyarin Manamalsa tayo tan say oksuyan a ginawa to diad panamegley na Anak to. Sikato so bulos ed makapaingongot a kimey a mabetbet a tatandaan na pipupuligesgesan diad kiliktar ed peles a sistema na bengabengatla. Diad onsasabin sistema na bengabengatla, say kaermenan, sakit, kaugsan, kabubulok, anggan say patey, so naandi la!​—Miqueas 4:3, 4; 1 Corinto 15:26.

⁹ Siopa so mibiang ed pakasumpalan na sarayan sipan, tan iner? Saraman so mangagamil na pananisia ed bagat nen Jesus tan mangarum na maridios a kimey ed satan a pananisia. Saraya so magmaliw a mitukoyan a mikasakey ed saray kaparan Kristianos ed sankamundoan diad inkasaksakey ed pananisia.​—Santiago 2:24; Efeso 4:16.

10. (a) Diad “administrasyon” na Dios, anto so ununa ed oksuyan? (b) Diad anto so ontumbok a gawaen na “administrasyon”?

¹⁰ Unong ed maabig a panliketan to, ginagala na Dios so “sakey ya administrasyon . . . diad panipon to ed amin a bengatlan mikasakey lamet ed si Kristo, saray bengatla ed katawenan tan saray bengatla ed dalin.” (Efeso 1:8-10) Saya so oksuyan ed sankaabungan na Dios ya onggapo ed panipon ed saray 144,000 a kaiban mananawir nen Kristo. Saraya so “sinaliw a nalapud limog na katooan a bilang ununan-bungabunga ed Dios tan ed Kordero [Jesu-Kristo].” Sikara so kabiangan ed “ununan [say mangatatawen] kioli” ta pian sikara so manlinkor a kaiban nen Kristo bilang arari tan saserdote diad sanlibon taon. Ontumbok, itultuloy na administrasyon na Dios so panipon ed “saray bengatla ed dalin,” ya onggapo ed agnabilang a “baleg ya ulop . . . a nanlapud amin a nasyones tan tribu tan totoo tan pansasalita.” Sarayan ariripen na Dios so ompaway a makaliktar ed “baleg a kairapan” diad panilalo ed pakagamor na andi-anggaan a bilay ed “balon dalin.”​—Apocalipsis 14:1, 4; 20:4, 6; 7:4, 9-17; 21:1, 4.

11. (a) Diad anton mablin “pankakasakey” so tutukoyen na Efeso 1:11? (b) Panon so kiyaplika na Juan 15:4, 5 ed saraman so wala ed sayan “pankakasakey”?

¹¹ Saray alanaan-na-espiritun ananak na Dios, a sikara “so bengabengatla ed katawenan,” so manggayaga ed sankaapitan a relasyon ed si Jesus tan ed Ama. Sikara so “nipabtang a bilang mananawir” ed Panarian a mikasakey ed si Jesus. (Efeso 1:11) Sikara so pinaseseg nen Jesus a mansiansian mikasakey ed sikato, a singa saray sanga so mansiansian nisuldong ed sengeg, pian mabunga na dakel. No sayan pikakasakey ed si Kristo Jesus so agnapansiansia, saray sanga so “agmakapanggawa na antokaman.”​—Juan 14:10, 11, 20; 15:4, 5; 1 Juan 2:27.

Mibibiang Natan So “Arum a Karnero”

12. (a) Anto so pisiglaotan na “arum a karnero” ed “melag a pulok”? (b) Antoy aplikasyon na 1 Juan 2:1-6 no nipaakar ed balang sakey ed sarayan grupo?

¹² Anggaman kuan, kumusta so minilyon ya arum a malakarneron totoo a nisian ed minumundon “kanding” diad linmabas lan 50 taon? (Mateo 25:31-40) Saraya so anggapo ed “melag a pulok” nen Jesus ya angiteran na Panarian, noagta bilang “arum a karnero,” sikara so mikasakey ed saraya a bilang kabiangan na babaleg a pulok a manlilingkor diad pikakasakey ed Ama tan diad Anak. (Lucas 12:32; Juan 10:16) Ipaseguro nen apostol Juan a si Jesu-Kristo “so mananakbong a bagat ed saray kasalanan tayo [salanti, saraman so wala ed “melag a pulok”], ingen aliwan para ed sikatayo lambengat noagta ontan met ed sankamundoan.” Sirin sarayan “arum a karnero” ya atipon a nanlapud mundo na katooan, so nayarin makapanggayaga met ed mablin pikakasakey, odino pitutunosan, ed Dios tan ed si Kristo. Miulibay ed intultuloy nen Juan ya imbaga: “Siopaman a mangunor na salita to, simamatuan diad sayan too et say aro na Dios so agawan ayadyari. Diad saya et walaan itayo na pikakabat a sikatayo so mikakasakey ed sikato.” Ununa say “melag a pulok” tan insan say “arum a karnero” so nisilong ed obligasyon a mankurang a singa impankurang nen Jesus.​—1 Juan 2:1-6.

13. (a) Diad Juan 17:20, 21, diad anto so impikasi nen Jesus? (b) Anto so mangipanengneng a sayan kerew so agnigetar ed saray kaiban tomatawir nen Kristo?

¹³ Ontan met natan, saratan a grupo, say mangatatawen tan say mangaraldalin, so ‘mikakasakey ed Ama tan ed Anak’​—diad nagnap a pitutunosan ed sikara diad pananumpal ed kimey na Dios. Impikasi nen Jesus, “Pian sikaran amin komon [so wala ed inkasaksakey], a singa sika, Ama, so mikakasakey ed siak tan siak so mikakasakey ed sika, pian sikara met komon so mikakasakey ed sikata.” Sayan inkasaksakey so agnigetar ed kabaliksan a kaiban mitatawir, lapud mapatnag a saray babangatan nen Jesus so agmagmaliw a kabiangan na antokaman a ‘laman nen Jehova’ odino ‘kaiban mitatawir ed si Jehova.’ Sikara so “mikakasakey” ed pamaakaran ya ipapatnag da so pikakasakey diad pitutunosan, diad pagmaliw a sakey a puso tan nonot ed si Jehova tan si Kristo, legan a sikara so mantatasi ed mundo na katooan.​—Juan 17:20, 21.

14. Diad anton nikadkaduman dalan a say mangatatawen a klase so mikasakey ed si Kristo, tan anto so manggawa ed sikaran sikakabat ed saya?

¹⁴ Anggaman kuan, saraman so kabiangan na alanaan a mangatatawen a klase so manggagayaga ed satan a pikakasakey natan ed nikadkaduman dalan, legan a sikara so niyaabawag a matunong no nipaakar ed bilay, diad panamegley na aplikasyon na merito na bagat nen Kristo. Sirin, sikara so nailalak ed espiritu tekep na ilalon magmaliw a kaiban mitatawir ed si Kristo Jesus. Bidbiren da so inkatagibi ra bilang ananak, a kuan da: “Say espiritun mismo [manangilalak ya aktibon puersa na Dios] so mantasi ed espiritu tayo [dominanten inklinasyon na nonot] a sikatayoray anak na Dios.”​—Roma 3:23, 24; 5:1; 8:15-18.

15. Anto so itatarya na peles tan say arapen a para ed saraman so walaan na ilalo ed mangaraldalin a bilay?

¹⁵ Nipaakar ed saraman so walaan na mangaraldalin ya ilalo ed bilay, sikara natan so niyaabawag a matunong no nipaakar ed pikakaaro ed Dios, a singa si Abraham, Rahab, tan arum ni nen inmunan panaon. Legan na Milenyon Uley nen Kristo, sikara so mankalkalnan ondateng ed atooan ya inkayadyari, ta pian diad kayari na unor a subok et “say pinalsan mismo so nabulos met a manlapud panangaripen na kabubulok tan nawalaan na maglorian kawayangan na saray anak na Dios.” (Roma 8:19, 21; Santiago 2:21-26) Sirin, saray matulok a katooan so niyabawag a matunong a para ed bilay ya andi-anggaan ed dalin.​—Ipareng so Juan 10:10; Isaias 9:7; 11:1-9; 35:1-6; 65:17-25.

16. (a) Anton pamaakaran so pangipapanengnengan na “melag a pulok” tan say “arum a karnero” na “pikakasakey” ed balang sinansakey? (b) Balet akin a say Juan 3:3-5 so onaplika lambengat ed “melag a pulok”?

¹⁶ Bilang sinansakey, saraman so wala ed “melag a pulok” tan say dakerakel ya ulop na “arum a karnero” so mangipanengneng na mipadparan magayagan seseg a para ed serbisyo ed Dios. (Lucas 12:32; Juan 10:16; Tito 2:13, 14) Kaslakan ed saray nakekeraan na alanaan so nayarin matatken laran tuloy ed edad tan diad Kristianon eksperiensia, balet namparan saratan a grupo so mangipanengneng na Kristianon personalidad tan say bunga na espiritu. (Efeso 4:24; Galacia 5:22, 23) Wala so pandumaan, a singa impanengneng nen Jesus ed si Nicodemo anggan diad sakbay na impanalambit to ed andi-anggaan a bilay. Inkuanto: “No say sakey so agnianak lamet, agto nanengneng so panarian na Dios.” (Juan 3:3-5) Sirin say espiritual a kianak-lamet so sagmaken na saraman so abautismoan a Kristianon tawagen na Dios a kaiban mitatawir ed si Jesus diad Panarian to. (1 Corinto 1:9, 26-30) Say “arum a karnero” so agmankaukolan na anggan anton ontan a kianak-lamet, ta say kalat da et bilay ya andi-anggaan diad nipawil a Paraison mangaraldalin bilang uuleyan na Panarian.​—Mateo 25:34, 46b; Lucas 23:42, 43.

Memoryal​—Tan say Balon Sipanan

17. (a) Akin ya amin na saraman so walaan na kalat ed bilay so midagup ed saray totoo na Dios no Abril 12, 1987? (b) Anto so naimano tayo no nipaakar ed selebrasyon na Memoryal nen 1985?

¹⁷ Say Abril 12, 1987 kayari iselek na agew et panaon a saray Tasi nen Jehova ed sankamundoan so manselebra ed Memoryal na impatey nen Jesus. Niyapasakey so imano ed impangibagat nen Jesus ed ayadyarin atooan a laman to tan dala to diad panangalangon ed ngaran nen Ama to tan gagala tan para ed makasalanan a katooan. (1 Corinto 11:23-26) Sirin, amin a walaan na kalat ed bilay (balanglan diad tawen odino diad dalin) so malabay a mitipon ed saray totoo na Dios ed sankamundoan a para ed sayan magayagan okasyon. Nen 1985 et wala so dagup a bilang na totoon 7,792,109 a nannodnonot ed impatey nen Jesus. Anggaman kuan, saraman so akibiang ed tinapay tan alak na Memoryal, ya angisimbolo ed atooan a laman tan dala nen Jesus, so manbilang lambengat na 9,051. Akin a pigpigara?

18, 19. (a) Antoran sipanan so tutukoyen nen Jesus ed Lucas kapitulo 22? (b) Anton gagala so serbian na balang sipanan? (c) A singa inyanino nen Moises, panon so panserbi nen Jesus a bilang “sakey a manamegley”?

¹⁸ Bueno, anto so imbaga nen Jesus ed saman a labi na impangigapo to ed Memoryal na impatey to? Kayari na impangipasa to ed tinapay diad saray babangatan to, intumbok ton inyopresi so alak ed parehon nengneng, a kuanto: “Sayan kopa et kabaliksan to so balon sipanan diad birtud na dalak, a nikalbon nisesengeg ed sikayo.” Saginonor, intuloy ton pinabiskeg so rason diad impangiloob to’d sikara ed balon sipanan, a kuanto: “Sikayo so nansiansia ed siak diad saray subok ko; tan siak so manggawa na sakey a sipanan ed sikayo, unong a say Ama so nangggawa na sakey a sipanan ed siak, nipaakar ed sakey a panarian, pian sikayo komon so mangan tan oninum ed dulang ko diad panarian ko, tan onyurong ed saray trono a mangukom ed labinduan tribu na Israel.”​—Lucas 22:19, 20, 28-30.

¹⁹ Impasakbay nen propeta Jeremias so balon sipanan, ya imbaga ton diad panamegley na satan et perdonaen nen Jehova so impakalukso tan kasalanan na totoo to ta pian sikara komon so “mikabat ed si Jehova” diad sankamaapitan a relasyon. (Jeremias 31:31, 34) Unong a si Moises so “manamegley” ed Ganggan na sipanan ed silalaman ya Israel, sirin si Jesus so nagmaliw a “manamegley ed [saya] mipetekan a magmaong a sipanan” a gawaen na Dios ed espiritual ya “Israel na Dios.” Saya so onia pian dondonen iraman so natawag a magmaliw a mananawir na Panarian a kaiba nen Kristo. Sirin “awaten [da] so sipan na andi-anggaan a tawir.” (Galacia 3:19, 20; 6:16; Hebreos 8:6; 9:15; 12:24) Nagkalautla ed sayan Biblical a pantalos a si Kristo Jesus so manserbin “sakey a manamegley ed baetan na Dios tan totoo.”​—1 Timoteo 2:5, 6.

20. (a) Siopara so manepeg a mibiang ed saray emblema ed Memoryal? (b) Akin ya onia so saya?

²⁰ Siopa, sirin, so nayarin manepeg a mibiang ed saray embleman tinapay tan alak diad Memoryal? Saman lambengat so grupon itarok na Dios ed balon sipanan ya agawa ed bagat nen Jesus. (Salmo 50:5) Say gagala na sayan sipanan et ta pian patunongen to so 144,000 iran kaiban tomatawir nen Jesus ed atooan a bilay ya ununa, ta pian sikara komon so mangibagat ed sayan kanepegan-ed-bilay tan nitarok ed mangatatawen a Panarian. (Roma 4:25; 2 Timoteo 2:10, 12) Balet kumusta so “arum a karnero”?

21. (a) Panon so kagunggunaan na “arum a karnero” bilang manag-imaton ed Memoryal? (b) Diad anto so pangiyapasakeyan na selebrasyon ed Memoryal, tan anton tepet so onlesa?

²¹ Saraman so “arum a karnero” a klase so anggapo ed balon sipanan tan sirin ag-ira mibibiang. Anggaman kuan, amin da so siyayaman a nagunggunaan diad iyatendi ed Memoryal a bilang magalang a manag-imaton. Say apresasyon da ed espiritual iran bengatla so napatarem a mitukoyan ed saray pikakasi nen Jesus ed si Ama to: “Saya et kabaliksan to so andi-anggaan a bilay, diad pangala ra na pikakabat ed sika, say alenleneg a tuan Dios tan ed saman so imbakim, si Jesu-Kristo.” (Juan 17:3) Nodnonoten, say selebrasyon na Memoryal so mangiyapasakey na imano ed laman tan dala nen Jesus. Say nibagat a laman tan dala nen Kristo so makanan importante ed amin a mangegemtan ed kalat a bilay ya andi-anggaan. Panon a saya so tua no nipaakar ed “arum a karnero” ya agnitarok ed balon sipanan tan sirin et agmibibiang ed saray emblema na Memoryal? Saya so salaysayen tayo ed onggendan ya artikulo.

Panon So Pangebat Yo?

◻ Panon, progresibo, so impangipanabang nen Jesus na pakatalos nipaakar ed ilalo ed andi-anggaan a bilay?

◻ Panon so impangipakurang na Dios ed “administrasyon” to?

◻ Akin a nayarin nibagan say “arum a karnero” so “mikakasakey” ed Ama, diad Anak, tan diad agagi nen Kristo?

◻ Akin a saray alanaan a Kristiano so mibibiang lambengat ed saray emblema ed Memoryal?

[Litrato ed pahina 17]

Say “melag a pulok” tan say “arum a karnero” so “wala ed pankakasakey”​—a manggagawa ed kimey na Dios a singa ginawa nen Jesus