Say Agew a Nodnonoten

“Sarayan bengatla so sinalitak ed sikayo pian diad panamegley ko nawalaan kayo na kareenan. Diad mundo walaan kayo na kairapan, balet manpakpel! Tinalok so mundo.”​—JUAN 16:33.

1, 2. Anton sakey ya agew ed awaran so matalona nen saray amin nin agew, tan akin?

SAY mundo natan so mangisisipan na kareenan. Kasumpal na Guerra Mundial II, say kareenan so nisiglaot ed Agew na I-E tan Agew na I-J.a Kada taon, say Krismas so mangawad totoon manisip ed ‘kareenan diad dalin.’ (Lucas 2:14) Balet wala so sakey ya agew ed interon awaran na too a matalonan tuloy manlapud amin. Atan so agew sanen imbalikas nen Jesus iray inaon a salita ed tagey. Diad duaran laksa tan pigaran agew ya impanbilay na too ed dalin, atan a sakey ya agew so sigpot ya anguman ed kurang na katooan parad maandon pankaabigan to.

² Atan ya importanten agew et say Nisan 14 ed Judion kalendaryo. Diad taon 33 ed Komon a Panaon tayo, say Nisan 14 so ginmapo ed kaselek na agew ed Abril 1. Kunsideraen tayo paray agawgawa ed saman a makabaliksan a tuloy ya agew.

Nisan 14!

3. Panon so impangusar nen Jesus ed sarayan unor ya oras?

³ Legan ya onsisironget, say marakep a sulaw so onliliwawa a bilang panonot a kabat nen Jehova iray panaon tan panpanaon. (Gawa 1:7) Tan anto so nagagawad saman a tagey a silir a nantitiponan nen Jesus tan 12 apostoles to pian selebraan so tinaon a Paskua na saray Judios? Unong a manpipikal si Jesus ‘pian ontainan ed sayan mundo ya onlad Ama, ipanengneng to so panangaro ed kien ton dili anggad kasampotan.’ (Juan 13:1) Panon so impanggawa to ed saya? Diad balikas tan diad ehemplo, intultuloy nen Jesus ya impaslep ed saray babangatan toray kalidad ya ontulong ed sikaran manalona ed mundo.

Pangisulong ed Kaumildian tan Aro

4. (a) Panon nen Jesus ya indemostra ed saray babangatan to so sakey a manunan kalidad? (b) Panon tayon amta a naaralan nen Pedro so kaimportantian na kaumildian?

⁴ Nakaukolan nin iwaklit na saray apostoles so ambisyoson imon tan kinon ed inkasikara. Kanian binalkesan nen Jesus so inkasikato na sakey a tualya tan ginmapon anguras ed salisali ra. Saya so aliwan panangipanengneng na kunkunwarin kaumildian, a singa say tinaon a gagawaen na papa na Kakristianoan ed Roma. Peteg ya andi! Say tuan kawayangan et say pangiter na inkasikandili manlapud ‘kaabebaan na nonot a mangipasen ed arum ya atagtagey.’ (Filipos 2:2-5) Diad inmuna, ag-atalosan nen Pedro so punto, kanian agto paurasan iray sali to ed si Jesus. Balet sanen akorihe, papaurasan to’d si Jesus so interon laman to. (Juan 13:1-10) Anggaman ontan, si Pedro so akaaral na leksion. Diad saginonor iran taon, sikato so naromog tayo a suston manisimbawa ed saray arum. (1 Pedro 3:8, 9; 5:5) Agaylan importante natan ya amin tayo so pauleyan ed si Kristo ed kaumildian!​—Nengnengen met so Uliran 22:4; Mateo 23:8-12.

5. Anton ganggan nen Jesus so angipanengneng ed kaimportantian na sakey nin nakaukolan a kalidad?

⁵ Sakey ed saray 12 so ag-agunggunaan ed simbawa nen Jesus. Si Judas Iscariote. Legan ya ongagapo so pandem na Paskua, agonigon si Jesus ed espiritu, angipabidbir ed si Judas a bilang mangiyawat ed sikato, tan pinapaway to. Kayari lambengat na saya ya imbaga nen Jesus ed 11 matoor iran babangatan to: “Sakey a balon ganggan so iter ko ed sikayo, a manaarowan so sakey tan sakey ed sikayo; salanti unong na impangarok ed sikayo, pian manaarowan met so sakey tan sakey ed sikayo. Diad saya nabirbiran na amin a sikayoray babangatan ko, no wala so aro yo ed limog yon dili.” (Juan 13:34, 35) Saya so peteg a balon ganggan, ya inyilustra na dilin matalonggaring ya ehemplo nen Jesus! Unong a manasingger so oras parad kibagat to ed patey, imparungtal nen Jesus so matalonan aro. Inusar to so kada mablin minuto pian bangatan tan pasesegen iraman a babangatan. Diad saginonor, indanet to so kaimportantin na aro, a kuanto: “Saya so ganggan ko, a manaarowan so sakey tan sakey ed sikayo salanti unong na impangarok ed sikayo. Anggapo so walaan na babaleg ya aro nen saya, ya italaga na sakey so kamarerwa to ed biang na kakaaro to.”​—Juan 15:12, 13.

“Say Dalan tan say Katuaan tan say Bilay”

6. Anton kalat so inyan nen Jesus ed arap na maapit iran babangatan to?

⁶ Inkuan nen Jesus ed matoor a 11: “Agnagonigon so kapusoan yo. Mangagamil na pananisia ed Dios, mangagamil met na pananisia ed siak. Diad abung nen Amak dakerakel so panayaman. Noag ontan, imbagak komon ed sikayo, lapud onla ak a mangiparaan na pasen ya onkana’d sikayo.” (Juan 14:1, 2) Sayan pasen et diad “panarian na katawenan.” (Mateo 7:21) Imbaga nen Jesus ed sayan maapit ya ulop na matoor iran babangatan no panon so pakagamor ed kalat da. Inkuanto: “Siak so say dalan tan say katuaan tan say bilay. Anggapo so makasabi ed Ama noag diad panamegley ko.” (Juan 14:6) Onaplika met iya ed saramay katooan a makagamor na andi-anggaan a bilay ed dalin.z​—Apocalipsis 7:9, 10; 21:1-4.

7-9. Akin a dineskribe nen Jesus so inkasikato a bilang “say dalan tan say katuaan tan say bilay”?

⁷ Si Jesus so “say dalan.” Say saksakey tan mogmon pakaasingger ed Dios ed pikakasi et diad panamegley nen Jesu-Kristo. Impaseguro nen Jesus a mismo ed saray babangatan to ya iter na Ama so antokaman a kerewen da ed ngaran nen Jesus. (Juan 15:16) Saray pikakasin nipaarap ed saray imahen odino relihyoson “sasantos” odino daakan iran Abe Maria tan naulit-ulit ya inkansion a pikakasi​—anggapo ed saraya so dengelen tan awaten na Ama. (Mateo 6:5-8) Niarum ni, diad Gawa 4:12 et nabasa tayo so nipaakar ed si Jesus: “Anggapo so arum a ngaran ed silong na tawen a niiter ed totoo a kilabanan tayo.”

⁸ Si Jesus so “say katuaan.” Inkuan nen apostol Juan ed sikato: “Say Salita so nagmaliw a laman tan akiayam ed sikatayo, tan anengneng tayo so gloria to, singa gloria na bogbogtong ya anak a nanlapud ama; tan sikato so napno na agkanepegan a panangasi tan katuaan.” (Juan 1:14) Si Jesus so nagmaliw a katuaan na nilasus iran propesiya ed Hebreon Kasulatan diad impanumpal ed saratan. (2 Corinto 1:20; Apocalipsis 19:10) Impaamta to so katuaan diad impitongtong ed saray babangatan to tan ed totoon tinmalineng, diad impisangsangan ed mansimpisimpitan a klero, tan diad mabilay ya ehemplo to.

⁹ Si Jesus so “say bilay.” Bilang Anak na Dios, inkuan nen Jesus: “Say mangagamil na pananisia ed Anak so walaan na andi-anggaan a bilay; say agmangunor ed Anak so agmakanengneng na bilay, say sanok ingen na Dios so mansiansia ed sikato.” (Juan 3:36) Say pananisian inagamil ed bagat nen Jesus so mangitonton ed andi-anggaan a bilay​—imortal a bilay ed tawen parad “melag a pulok” na alanaan a Kristianos tan maandon bilay ed sakey a paraison dalin parad baleg ya ulop na “arum a karnero.”​—Lucas 12:32; 23:43; Juan 10:16.

Pansungdo ed Panamasegsegang

10. Akin a nakaukolan tayon ‘talonaan so mundo,’ tan anton panamaseseg so inter nen Jesus nipaakar ed saya?

¹⁰ Saramay manilalon manbilay ed balon sistema nen Jehova so nepeg a mipuligesgesan ed sakey a mundon “mandukdukol ed pakayari na sakey a marelmeng,” si Satanas a Diablo. (1 Juan 5:19) Sirin, agaylan makapaseseg, iray salita nen Jesus ed Juan 15:17-19! Iyaabawag to: “Sarayan bengatla so iganggan ko ed sikayo, a manaarowan so sakey tan sakey ed sikayo. No say mundo busolen to kayo, amta yon binusol toak ya ununa nen say sikayo. No kabiangan kayo na mundo, say mundo arowen to so kayarian to. Natan lapud sikayo so agkabiangan na mundo, noagta pinili ta kayo manlapud mundo, kanian say mundo busolen to kayo.” Saray tuan Kristianos so bubosolen anggad sayan taon na 1992, tan agaylan maliket itayo ed maabig iran ehemplo na saramay nantultuloy a tinmalindeg a malet, a sipapaabeban makaromog na biskeg ed silong na mabiskeg a lima na Dios! (1 Pedro 5:6-10) Amin itayo so makapansungdo ed saray subok diad pangagamil na pananisia ed si Jesus, ya impanampot to so salaysay to tekep na sarayan makapaligsan balikas: “Diad mundo walaan kayo na kairapan, balet manpakpel! Tinalok so mundo.”​—Juan 16:33.

Pangiparungtal na Balon Sipanan

11. Anto so impropesiya nen Jeremias nipaakar ed sakey a balon sipanan?

¹¹ Legan na saman a labi, kayari impanampot na selebrasyon na Paskua, sinalita nen Jesus so sakey a balon sipanan. Saya so impasakbay nen propeta Jeremias ed akauna laran siglos, a kuanto: “‘Nia! Onsabi so saray agew,’ kuan nen Jehova, ‘tan manggawa ak na balon sipanan ed abung na Israel tan ed abung nen Juda . . . Tan iyan ko naani so ganggan ko ed akindalem da, tan isulat ko naani ed kapusoan da. Tan magmaliw ak a Dios da, tan sikaran mismo naani so magmaliw a baley ko. . . . Perdonaen ko naani so inkauges da, tan agko la nonoten naani so kasalanan da.’” (Jeremias 31:31-34) Diad Nisan 14, 33 K.P., nagawa so bagat a mamaelet ed sayan balon sipanan!

12. Panon nen Jesus ya inggapo so balon sipanan, tan anto so sumpalen na saya?

¹² Inkuan nen Jesus ed 11 matoor a nanpilalekan ton tuloy so pidungo ed sikara ed sayan Paskua. Insan angala na tinapay, akisalamat, pinisagpisag to, tan inter to ed sikara, ya angikuan: “Saya et kabaliksan to so laman ko a niiter nisengeg ed sikayo. Saya so itultuloy yon gawaen a pakanodnonotan ed siak.” Diad parehon pamaakaran, inliber to’d sikara so ambalangan alak, ya angikuan: “Sayan kopa et kabaliksan to so balon sipanan diad birtud na dalak, a niibung nisengeg ed sikayo.” (Lucas 22:15,19, 20) Say balon sipanan so nipakurang diad panamegley na “mablin dala” nen Jesus, a mamablin tuloy nen say inwalsik a dala na ayep a paletan to so Ganggan na sipanan ed Israel! (1 Pedro 1:19; Hebreos 9:13, 14) Saramay nitarok ed balon sipanan so mangayaga ed sigpot a kaperdona na saray kasalanan. Kanian, onkualipika ra ed 144,000, a mangawat na andi-anggaan a tawir bilang espiritual ya Israel.​—Galacia 6:16; Hebreos 9:15-18; 13:20; Apocalipsis 14:1.

“Diad Pakanodnonotan ed Siak”

13. (a) Diad anto so nepeg tayon morekdeken ed panaon na Memoryal? (b) Siopa so nepeg lambengat a mibiang ed saray emblema, tan akin?

¹³ Say koma-1,960 tinaon a Memoryal ed impatey nen Jesus so ompetek ed Abril 17, 1992. Unong a manasingger itan a petsa, maabig a morekdeken tayo so amin a gawaen na ayadyarin bagat nen Jesus. Sayan oksuyan so mangitandoro ed kakabatan nen Jehova tan say aralem ya aro to ed katooan. Say ayadyarin katooran nen Jesus, anggad makapaotot a patey, so angalangon ed si Jehova a sumpad kantiaw nen Satanas a say atooan a palsa To so makabus tan onsaew ed silong na subok. (Job 1:8-11; Uliran 27:11) Diad panamegley na imbagat a dala to, si Jesus so amegley ed balon sipanan, say instrumento nen Jehova diad pamili na “apilin rasa, maarin inkasaserdote, masanton nasyon, totoon parad nikabkabiig a kayarian.” Legan a wadia ni ed dalin, saraya so “angiyabawag ed saray karlangan” na Dios da, si Jehova, ya ‘angipaway ed sikara ed kabilungetan ya impaarap ed makapakelaw a liwawa to.’ (1 Pedro 2:9; ipareng so Exodo 19:5, 6.) Matukoy, sikara lambengat so mibiang ed saray emblema na Memoryal ed kada taon.

14. Panon a napayaman so nilaksalaksan manangimaton?

¹⁴ Nen katantaon a Memoryal, 10,650,158 so inmatendi ed interon dalin, balet diad limog na saraya 8,850​—kulang a kakaplo na 1 porsiento​—so akibiang lambengat ed saray emblema. Sirin, anto so nagungguna na saray nilaksan manangimaton ed sayan selebrasyon? Baleg a gungguna! Anggaman agmibiang, sikara so napayaman ed espiritual diad sayan pililimog ed dakerakel ya englobon impanaagi, unong a talinengen da so amin iran engranden bengatlan gawaen nen Jehova diad panamegley na bagat na Anak to.

15. Likud ed saray alanaan panon so kagunggunaan na saray arum ed bagat nen Jesus?

¹⁵ Nagkalalo ni, ipaamta na apostol ed sikatayo diad 1 Juan 2:1, 2: “Walaan itayo na mananulong ed Ama, si Jesu-Kristo, sakey a matunong. Tan sikato so kasalat a bagat parad saray kasalanan tayo, ingen aliwan diad sikatayo lambengat noagta ontan met ed lapag a mundo.” On, say bagat nen Jesus, bangta mangugunggunan ununa ed klasen Juan ed balon sipanan, so mangitarya met na kaperdona ed saray kasalanan na “interon mundo.” Atan so “kasalat a bagat” parad kasalanan na amin nin arum ed mundo na katooan ya angagamil na pananisia ed niibung a dala nen Jesus, ya angilukas ed sikara na maliket ya ilalon maandon bilay ed paraison dalin.​—Mateo 20:28.

“Diad Panarian nen Amak”

16. (a) Diad anto so mapatnag a pibiangan nen Jesus tan saray kaiba ton mananawir? (b) Anto so namparan kakaukolanen natan ed alanaan a nakdaan tan say baleg ya ulop?

¹⁶ Nanpatuloy ya amaseseg ed saray apostoles to, inturo nen Jesus so agew a diad simbolikon dalan et inumen to so manlapud bunga na ubas a balo a kaibaray babangatan to ed Panarian nen Ama to. (Mateo 26:29) Inkuanto ed sikara: “Sikayo so nansiansia ed siak ed saray subsubok ko; tan manggawa ak na sakey a sipanan ed sikayo, unong a si Amak so nanggawa na sakey a sipanan ed siak, nipaakar ed sakey a panarian, pian mikan tan miinum kayo ed dulang ko diad panarian ko, tan onyurong ed saray trono pian mangukom ed labinduan tribu na Israel.” (Lucas 22:28-30) Lapud si Jesus so niiyan ed pakayari ed Panarian na katawenan nen 1914, nibaga tayo a say babaleg a bilang na kaiban mananawir nen Jesus, ya atipon ed loob na saray siglos, so apaoli la, pian “onyurong ed saray trono” a kaiba to. (1 Tesalonica 4:15, 16) Say agew so onsasabin maples pian bulosan na saray anghel so “apatiran dagem” na “baleg a kairapan”! Diad atan a panaon, say panagtatak ed 144,000 espiritual ya Israel tan panagtipon ed nilaksalaksan baleg ya ulop so nakumpleto la. Sarayan amin so nepeg a mamasiansia na katooran da, a singa ginawa nen Jesus, pian awaten da so premyon andi-anggaan a bilay.​—Apocalipsis 2:10; 7:1-4, 9.

17 tan kahon. (a) No nepeg ya ipulisay so sakey ya alanaan bilang agmatoor, siopa so makatunongan ya onsalat ed sikato? (b) Anton makapasagyat a liwawa ed panagpaalagey tan saginonor a panamalaknab ed teokratikon organisasyon ed dalin so insindag na saray artikulo ed 1938 a Watchtower?

¹⁷ Anto no arum iran alaanan so onsaew a bilang manamemben na katooran? Diad sayan unor a panaon, say bilang na saratan ya agmatoor so andi duaruwan daiset. Makatunongan, antokaman a pansalat so manlapu, aliwan diad saray balobalo nin abautismoan, noagta manlapud saraman so akisungdo ed si Jesus ed saray subsubok to ed dakel laran taon na matoor a panaglingkor. Ipanengneng na masnag iran kiddiam na espiritual a liwawan nanlapud The Watchtower ed 1920’s tan 1930’s a say panagtipon a nakdaan na saray alanaan so ngalngalin akumpleto legan na saman a peryodo. Nanlapulad saman saramay ‘manguras na saray aysing da tan paputien dara ed dala na Kordero’ so walaan na duman makapagayagan ilalo. Diad panamegley nen Kristo, sikara so iwanwan na espiritu nen Jehova ed “saray subol na danudanum na bilay” ed Paraison dalin.​—Apocalipsis 7:10, 14, 17.

Say Sankasimoonan a Pikakasi

18. Anton mabiskeg iran leksion so naaralan tayo manlapud pikakasi nen Jesus ed Juan kapitulo 17?

¹⁸ Sinaraan nen Jesus so Memoryal ya impitipon ed saray babangatan to diad impangiyapay na masimoon a pikakasin nikurit ed Juan 17:1-26. Impikasi ton ununa a sikato komon so igloria nen Ama to legan a sikato so mansiansian matoor anggad kasampotan. Diad sayan dalan si Jehova so nigloria met, a napasanto so ngaran to​—nalinisan ed amin a balaw. Peteg, say ayadyarin toon Jesus so tuan amaneknek a say atooan pinalsa na Dios so nayarin andi-kasalanan, anggan diad silong na sankairapan a subok. (Deuteronomio 32:4, 5; Hebreos 4:15) Niarum ni, say impatey nen Jesus a bilang bagat so angilukas na engranden pankanawnawa parad anak nen Adan. Inkuan nen Jesus: “Saya kabaliksan to so andi-anggaan a bilay, say pangala da na pikakabat ed sika, say saksakey a tuan Dios, tan ed inbakim, si Jesu-Kristo.” Agaylan makana so pangala na suston pikakabat ed si Jehova a Dios tan ed Anak to, say Kordero na Dios, ya angiter ed bilay to diad kialangon nen Jehova tan kilalaban na katooan! (Juan 1:29; 1 Pedro 2:22-25) Kasin pablien yo itan a sankamaarowan a bagat diad pangidedika yon sigpot na inkasikayo ed si Jehova tan ed mablin serbisyo to?

19. Panon na alanaan tan say baleg ya ulop a pangayagaan so mablin pankakasakey?

¹⁹ Niarum ni, impikasi nen Jesus ed Masanton Ama to a bantayan To iray babangatan to legan a paneknekan da so inkasikaran agkabiangan na mundo, a tumboken so salita To a bilang katuaan, tan mantinien so mablin pikasakey ed Ama tan say Anak. Agta sayan pikakasi so makapakelaw a nanaebatan anggad sayan peles ya agew legan a say alanaan a nakdaan tan baleg ya ulop so nankakasakey a manlilingkor ed bedber na aro, bangta mansiasiansian neutral ed mundo, ed karawalan, tan karelmengan to? Agaylan mabli iray pansaran balikas nen Jesus ed si Ama to, si Jehova! Inkuan nen Jesus, “Impakabat ko ed sikara so ngaran mo tan ipakabat ko lamet pian say aro ya impangarom ed siak so niwalad sikara tan siak ed sikara.”​—Juan 17:14, 16, 26.

20. Akin a say Nisan 14, 33 K.P., so peteg ya agew a nodnonoten?

²⁰ Pinmaway ed tanamanan na Getsamane, si Jesus so walaan ni antikey, makapaalagey ya impilimog ed saray babangatan to. Insan siningkat na saray kabusol to! Agnadeskribe na saray salita so pisikal a gonigon nen Jesus, say ansakit a kaermenan to ed balaw a nitarok ed si Jehova, tan ed ehemplon katooran to diad amin na atan. Si Jesus so nansungdo anggad kasampotan, sanlabi tan nagkalautla sanlegan na palbangon ed atan ya agew. Indemosra ton malinew a say Panarian to so agkabiangan na mundo. Tan diad unor a linawa to, sikato so kinmelyaw: “Asumpal la!” (Juan 18:36, 37; 19:30) Say intalona to ed mundo so sigpot. Peteg say Nisan 14, 33 K.P. so agew a nodnonoten!

[Paimano ed leksab]

Panon so Pangebat Yo?

◻ Anto so imbangat nen Jesus nipaakar ed kaumildian tan aro?

◻ Panon a si Jesus so nagmaliw a “say dalan tan say katuaan tan say bilay”?

◻ Anto so gagala na balon sipanan?

◻ Anton pankakasakey tan aro so pannanabangan na alanaan a nakdaan tan say baleg ya ulop?

[Kahon ed pahina 6]

Say Kakabatan na Babaleg a Solomon

Saray artikulon apauloan na “Organization” ed Hunyo 1 tan Hunyo 15, 1938, iran paway na The Watchtower so angiletneg na makanan teokratikon oksuyan a tutumboken na Tastasi nen Jehova anggad sayan agew. Impamantok da so makatantandan peryodo na doktrinal tan organisasyonal a pananguman a ginmapo nen 1919. (Isaias 60:17) Diad pangipareng ed atan a 20-taon a peryodo ed 20 taon legan na impangipaalagey nen Solomon ed templo tan say abung na ari ed Jerusalem, inkuan na The Watchtower: “Ipanengneng na Kasulatan a, kayari na duamplon taon a panagpaalagey a programa nen Solomon . . . , sikato so akibiang ed interon-nasyon a programan panagpaalagey. (1 Ara. 9:10, 17-23; 2 Awa. 8:1-10) Insan sinmabi so reyna na Sheba ‘a nanlapud sankaarawian iran kabiangan na dalin pian talinengen so kakabatan nen Solomon’. (Mat. 12:42; 1 Ara. 10:1-10; 2 Awa. 9:1-9, 12) Isuheri na saya so tepet: Anto so walad manunan arapen parad totoo nen Jehova ed dalin? Alagaren tayo a tekep na sigpot a talek, tan nengnengen tayo.” Ag-abalang itan a talek. Diad silong na teokratikon organisasyon sakey a baleg a sankamundoan a programa na espiritual a panagpaalagey so anipon ed masulok ya apatiran laksa na baleg ya ulop. Singa say reyna na Sheba, saraya so nanlapud sankaarawian iran kabiangan na dalin pian talinengen so kakabatan na Babaleg a Solomon, si Kristo Jesus​—a niparalan ed sikara diad panamegley na “matoor tan makabat ya aripen.”​—Mateo 24:45-47.