Simbawan “Atimplaan na Asin”
“Komon ta say salita yo so naynay ya atekepan na liga, atimplaan na asin, ta pian amta yo no panon so nepeg yon pangiter na ebat ed balang sakey.”—COLOSAS 4:6.
1, 2. Akin a nagkalautlan importante a say simbawa na Kristiano so “atimplaan na asin”?
DIAD interon awaran, say asin so sankakanaan diad panagparaan na tagano. Sikato so manangipreserba tan managpananam, kanian saray dakel a taganon ag-inasinan so anggapoy taway tan matabtabang. Kanian, sanen insulat nen Pablo a saray balikas na sakey a Kristiano so nepeg ya “atimplaan na asin,” ibabaga to a say panagsalita tayo so nepeg a makapaalagey, ontan met a makapaliket tan makapasagyat. (Colosas 4:6) Saya so nagkalautlan tua sano mangiiter na simbawa. Akin?
2 Say gagala na panimbawa et aliwa lambengat a say pangipanabang na impormasyon. Diad dakel iran kipapasen, say sakey a sisimbawaen et kabat to la so arum ed saray prinsipyo na Biblia ya onaplika ed kipapasen to, balet ta sikato so nagogonigon balanglan diad panangiyaplika ed saratan odino diad pakanengneng to ed kaimportantian da. Sirin, say peteg ya angat ed Kristianon panagsimbawa et say panguman ed nengneng na panag-isip na sakey. (Galacia 6:1; Efeso 4:11, 12) Sirin, wadtan so pankaukolan na “asin.”
3. Anton tulong so inter nen Jehova ed saray Kristianon managsimbawa?
3 Peteg, say panagsimbawa so sakey ya angat, tan pian satan so nagawaan, nakakaukolan na managsimbawa so pikakabat tan pakatebek. (Uliran 2:1, 2, 9; 2 Timoteo 4:2) Makapaliket, si Jehova so angitarya ed Biblia, a nankarga na aliwa lambengat ed nakakaukolan a pikakabat noagta ontan met ed saray dakel ya ehemplo na simbawan inter na saray makatebek a totoo na Dios. Say pangusisa na arum ed saraya so ontulong ed sikatayon magmaliw ya epektibon managsimbawa.
Imanoen so “Makapakelaw a Mananimbawa”
4. Diad pangiyopresi na simbawa ed kongregasyon, panon so nayarin pangalig na sakey a Kristianon matatken ed si Jesu-Kristo?
4 Alimbawa, imanoen si Jesus, say “Makapakelaw a Mananimbawa.” (Isaias 9:6) Diad sampot na inmunan siglo, si Jesus so walaan na saray sulat na simbawan impawit ed pitoran kongregasyon diad luyag na Asia. Sarayan sulat so maabig a modelo a para ed saray mamatatken a nayarin mankaukolan a mangiter na simbawa ed saray kongregasyon da—tan saray prinsipyon onaplikan mipara met sano mangiter na simbawa ed saray sinansakey. Saray probleman siningbat nen Jesus so seryoso: apostasya, impluensya na “Jezebel,” inkamalainem-em, tan materyalismo, so arum ed saray bengatla. (Apocalipsis 2:4, 14, 15, 20-23; 3:1, 14-18) Kanian sarayan problema so prangka a siningbat nen Jesus. Anggapoy duaruwa nipaakar ed labay ton ibaga ed saraman a kongregasyon. Natan, sano saray Kristianon mamatatken so mangiter na simbawa ed kongregasyon da, nepeg dan “asinan” so simbawa ra na kaumildian tan kauyamoan, diad pangalig ed si Jesus. (Filipos 2:3-8; Mateo 11:29) Diad biek a dapag, diad pangalig met ed si Jesus, nakaukolan da so magmaliw a prangka. Say simbawa so agnepeg a makilot a tuloy tan inkalapagan a tuloy ya agnatebek na kongregasyon so punto.
5, 6. Antoran malaknab a leksion so naaralan na sakey a Kristianon matatken ed saray mensahe nen Jesus ed pitoran kongregasyon?
5 Imanoen, met, ya inerman a posibli et si Jesus ed gapo et mabiskeg a kinomendaan toray kongregasyon tan impanampot to so simbawa to diad makapaalagey a panamaseseg. (Apocalipsis 2:2, 3, 7; 3:4, 5) Saray Kristianon managsimbawa, met, so nepeg a manimpla ed simbawa ra diad komendasyon tan panamaseseg. A singa imbaga na sakey ya eksperiensiadon matatken: “Peteg, anggapo so malaem a nagawaan mo no basta pantamian moray agagi.” Sano mangiiter na mabiskeg a simbawa, agnepeg a taynanan na saray mamatatken so agagi ya aderal ed liknaan balet, imbes, apabiskeg tan determinadon manggawa na magmaong ed arapen.—Ipareng so 2 Corinto 1:1-4.
6 Kaunoran, anto so nipaakar ed saray mensahe nen Jesus ed saray kongregasyon ed Smirna tan Piladelpia? Sikato so ag-amalaw ed sarayan agagi. Balet lapud sikara so manasagmak na saray seryoson subok, sikara so pinaseseg ton mantultuloy a mansungdo. (Apocalipsis 2:8-11; 3:7-13) Saray Kristianon manangasikaso, met, so nepeg ya aglabatla mangiter na simbawa sano nakaukolan so panametek noagta naynay ya alerton mangomenda ed saray agagi diad maabig iran kimey da tan sikara so pasesegen dan mansungdo.—Roma 12:12.
Mangusar na Saray Ilustrasyon
7, 8. (a) Panon a say simbawa nen Jesus ed saray patumbok to so “atimplaan na asin”? (b) Akin a saray ilustrasyon so makanakana sano mangiiter na simbawa?
7 Sananey a panaon sanen angiter si Jesus na simbawa et sanen saray babangatan to so mapaga ed no siopa so manunaan ed Panarian na katawenan. Saray patumbok to komon so mabiskeg a nantamian to a nisengeg ed saya. Imbes, ‘tinimplaan [to] iray salita to na asin.’ Tinawag to so sakey ya ugaw, a kuanto: “Siopaman a mangipaabeba na inkasikato a singa sayan melag ya ugaw so sakey a sankabalgan ed panarian na katawenan.” (Mateo 18:1-4; Lucas 9:46-48) Say simbawa so malinew balet mapangasi tan makapaalagey. Diad impangipanengneng to a say Panarian na katawenan so duman tuloy ed saray panarian na sayan mundo, pinaseseg nen Jesus iray patumbok ton magmaliw a mapaabeba, tan sinali ton inekal so sengegan na pansasangsangan da.
8 Imanoen, met, so epektibon paraan na panagbangat ya inusar nen Jesus ed sayan pamaakaran. Mabilay ya ilustrasyon—sakey ya ugaw! Saray makabat a managsimbawa so mabetbet a timplaan daray salita ra na “asin” diad saray ilustrasyon, lapud saraya so nayarin mangidanet ed inkaseryoso na sakey a pamaakaran odino makatulong ed manangawat na simbawa a mankatunongan tan manmoria ed sakey a problema diad balon liwawa. Mabetbet a saray ilustrasyon so ontulong a mamawas na pansesga.
9. Antoray arum a Makasulatan ya ehemplo diad panangusar ed saray ilustrasyon diad pangiter na simbawa?
9 Sanen pinasakbayan to si Cain a sikato so wala ed graben kaatapan na panggawa ed seryoson kasalanan, mabitar a dineskribe nen Jehova so kasalanan a singa sakey ya atap ya ayep. Inkuanto: “Wala so kasalanan a manatalaran ed puerta, tan sika so pampirawatan to.” (Genesis 4:7) Sanen sinmanok si Jonas lapud inliktar nen Jehova iray nagbabawin Ninevitas, sikato so inikdan na Dios na gebey a siruman. Insan, nen say tanaman so nalnes tan nanreklamo si Jonas, si Jehova so angikuan ed sikato: “Sika, diad biang mo, so nanermen ed tanaman a gebey . . . Agta siak so nepeg a manermen ed Nineve a baleg a syudad, a ditan et wala so masulok a sanlasus tan duamplon libon totoo?” (Jonas 4:5-11) Peteg a simbawan mabiskeg!
10. Panon so impangusar na sakey a modernon-agew a managsimbawa ed ilustrasyon ya ontulong ed sakey a biin walad kalangweran a natalosan ton magmaong iray motibo na atateng to?
10 Mipadpara, sanen nanunganget so sakey a biin walad kalangweran lapud sikato so pinegetan na atateng to ed pililimog to, sinali na managbiahen manangasikaso a tulongan diad impangusar to na sayan ilustrasyon: “Labay mo so mandait, agta ontan? Isipen pa ya inusar mo so dakel a panaon diad impanggawa na marakep a kawes a para ed sakey a kaaro. Balet sanen inter mo ed sikato, aromog mon inusar ton pantatarapo na datal. Panon so liknaan mo ey?” Inako na walad kalangweran a bii a sikato so onsanok. Kanian intuloy na ministro: “Ontan so panmoria na saray atateng mo. Sikara so angusar na dakel a panaon diad impamabaleg ed sika, tan sikara so mangikikinon ed sika. Kanian labay dan sika so mililimog ed totoo mantrato ed sika a manepeg, ya aliwan diad saray totoon mansumpal a mamasakit ed sika.” Say ilustrasyon so tinmulong ed biin walad kalangweran a mangapresya ed sasalien na saray atateng to a gawaen.
Mangitepet na Saray Tepet
11. Panon nen Jehova ya epektibon inusar iray tepet sanen sisimbawaen to si Jonas?
11 Sanen mitotongtong si Jehova ed si Jonas nipaakar ed agmakatunongan a sanok to, nayarin naimano yo a Sikato met so nantepet. Sanen si Jonas so sinmanok a say Nineve so ag-aderal, kinerew tolan sikato so ompatey, inkuan nen Jehova: “Kasin manepeg ed sika so pampasnok mo?” Ag-inmebat si Jonas. Sirin, inabuloyan nen Jehova ya ontubo so tanaman a gebey tan insan ompatey. Insan si Jonas so agonigon a tuloy. Kanian sikato so tinepetan nen Jehova: “Kasin manepeg ed sika so pampasnok nisesengeg ed tanaman a gebey?” Diad sayan panaon et inmebat si Jonas: “Manepeg ed siak so pampasnok ko, ya anggad patey.” Natan ta say propeta so inmebat ed si Jehova, intuloy Ton impareng so awawey nen Jonas ed tanaman lambengat diad dilin awawey to ed Nineve, ya intepet to so makatenyeg a tepet: “Agta nepeg ko so manermen ed Nineve?” (Jonas 4:4, 9, 11) Sirin asimbawa si Jonas a mangalig ed awawey nen Jehova ed saray nagbabawin Ninevitas.
12. Anto so kablian na saray tepet diad panagsimbawa? Iyilustra.
12 On, saray tepet so ontulong ed managsimbawan makaamta ed no anto so iisipen na toon mankakaukolan na simbawa. Ontulong met ed satan a sakey a manmorian lalon malinew ed saray dilin problema tan getma to. Alimbawa, nayarin ipilit na sakey a toon sikato so walaan na sigpot a kanepeg ya oninum na alak sakbay a manmanehon onsempet. Nayarin peteg a liknaen to, ‘Say alak so andian na epekto ed siak!’ Nayarin kaliktan na sakey a kaaro so mikatunongan ed sikato, a kuanto: ‘Balet alimbawa no sika so alanor ed aksidentin agmo kasalanan. Anto so isipen na pulis no naimano ran sika so akainum? Tan alimbawa, diad tua, a say alak so angapekta ed reaksion mo ya anggan samsamet. Kasin peteg a labay mon manehoan so kotsem sano saray kaisipan mo so aliwan siento-porsienton malinew? Kasin makana so pangipusta, ya anggan dia ed sankatukmon labat?’
13. Diad anton dalan so impangusar na sakey a managsimbawa ed Biblia, a tekep na saray tepet, diad pangiter na simbawa? Akin a saya so epektibo?
13 Say Kristianon simbawa so naynay a nibase ed Biblia. Tan no nayari, saray Kristianon managsimbawa so peteg a mangusar ed Biblia diad pangiter na simbawa. Satan so mabiskeg a katulongan. (Hebreos 4:12) Diad pangilustra: Sakey ya eksperiensiadon matatken so manasalin ontulong ed sakey ya aliwa lan aktibo ed kimey na panagpulong. Intawag na matatken so parabolo nen Jesus ed toon walaan na duaran anak, a sikaran dua kinerew ton onla tan mankimey ed kaubasan to. Imbaga na inmuna a sikato so onla balet ta aglinma. Imbaga na komadua a sikato so ag-onla balet ta diad kaunoran et denisidi ton sikato so onla. (Mateo 21:28-31) Insan intepet na managsimbawa: “Dinan ed sarayan duaran ananak so mipadparan ikikiwas mo natan?” Tampol ya atebek na manangipalapag so punto, nagkalautla sanen intuloy na managsimbawa: “Panon so isipen mon panmoria nen Jehova, say Akankayarian na ubasan, ed kipapasen mo?”
14. Anto so arum iran kipapasen a saray tepet so nayarin mabmablin paraan diad panangiter na simbawa?
14 Mipadpara met sano salien a tulongan iraman so walaan na panduaruwa, saraman so walaan na problema ed panamaley odino pamilya, saraman so walaan na kabalingaan, odino saraman so wala ed arum iran makasubsubok a kipapasen.a Saray makabat a tepet so ontulong ed saraman so sisimbawaen a mankatunongan, mangusisa ed inkasikara, tan onsabi ed suston konklusyon.
Ontalineng a Maalwar
15. (a) Anto so sinmaew a gawaen na saray taloran “managligliwa” nen Job? (b) Panon a say italineng so ontulong ed sakey a Kristianon managsimbawa?
15 Nonoten, anggaman kuan, a say pantepet so manutukoy a nakaukolan mon dengelen iray ebat. (Uliran 18:13) Saray managsimbawa so agnepeg a napelag ed patit ya amatit ed saray taloran “managligliwa” ed si Job. Nansalita si Job ed sikara, balet ta sikara so peteg ya agtinmalineng. Tinibukel da laray kanonotan da a say paniirap nen Job so sengegan na dili ton inkamakasalanan. (Job 16:2; 22:4-11) Diad piduma, say sakey a Kristianon managsimbawa so nepeg ya ontalineng a maalwar. Sirin, nayarin naimano toray panangitundatunda odino kipapasen na boses a mangipatnag a say interon estorya so agni nibaga. Angangko ta say kaaruman a tepet so mamapaway ed kaisipan a wala ed benegan na kanonotan na too.—Ipareng so Uliran 20:5.
16. Anto so nakaukolan na managsimbawa no mairap so italineng ed saray balikas na sakey a kaparan Kristianon agonigon ed emosyon?
16 Tua, nayarin saya so aliwan naynay a mainomay. Nayarin ilaldis na agonigon a totoo: “Kagulak iray atateng ko!” odino, “Agko la nayarian a balot so miamong ed masiken ko!” Makapagonigon so italineng ed ontan iran bengatla. Balet nonoten a si Jehova so mabulos ya ontalineng sanen nanreklamo si Asap a say katooran to so pinmatnag ya andi-kakanaan. (Salmo 73:13, 14) Tinmalineng so Dios, met, sanen imbaga nen Jeremias a sikato so pinalikdo. (Jeremias 20:7) Mapatnag ya inreklamo nen Habacuc a say marelmeng so mamapairap ed matunong tan si Jehova so agmakakanengneng ed satan. (Habacuc 1:13-17) Saray Kristianon managsimbawa so nepeg met ya akaparaan ya ontalineng. No saray totoo so peteg a walaan na onia ran liknaan, sirin nakaukolan ya amtaen na managsimbawa so nipaakar ed saya ta pian sikato so makatulong. Nepeg ton paliisan iray managdag ed toon sisimbawaen a mangibalikas ed saray dilin opinyon to ya iisipen ton nepeg a wala ed sikato imbes a saraman so peteg a wala ed sikato. Nepeg a paliisan na managsimbawa so ikiwas a mabiskeg odino mangukom, ya angangko ta dismayaen to so too a manlapud kilukas na puso to a malaknab ni.—Uliran 14:29; 17:27.
17. Panon a say basta italineng ed saray agagi tayo no maminsan so paraan na pakaligliwa ed sikara?
17 No maminsan say manunan kabiangan na panagsimbawa tayo et say italineng, ya abuloyan so toon mangipaway ed inkasakitan to, inkadismaya to, odino emosyonal a panutot to. Sanen pinmawil si Naomi a nanlapud kaumaan ed Moab, saray bibii na Israel so angibano ed sikato diad saray salitan: “Kasin saya si Naomi?” Balet si Naomi si maermen ya inmebat: “Agyoak tatawagen na Naomi. Siak so tawagen yo na Mara, lapud say Makapanyarin-amin so nanggawa ed satan ya ampait ed siak. Siak so napno sanen siak so linma, tan siak so pinapawil nen Jehova a kalimalima. Akin a siak so tawagen yo na Naomi, anta si Jehova so angipaabeba ed siak tan say Makapanyarin-amin so anesyang ed siak?” (Rut 1:19-21) Anggapo la so malaem a nibaga na saray Israelitan bibii diad iyebat. Balet, mabetbet, say basta maaron italineng legan ya ibabalikas na arum so ot-ot na liknaan da so ontulong ed iyabig da.b
Magmaliw a Realistiko
18. (a) Antoray arum ya inkiwas ed simbawa a nanlapud si Jehova tan si Jesu-Kristo? (b) Sirin, anton kalidad so nepeg a bayuboan na saray Kristianon managsimbawa?
18 Siempre, say ikiwas ed simbawa so manduruma. Mapatnag a si Jonas so kinmiwas a maong ed simbawa nen Jehova. Say propeta so aliwawaan a maong a manlapud ingungot tan sanok to ya insulat toray eksperiensia to ta pian saratan so pakaaralan na arum. Saray patumbok nen Jesus so medyo abayag ya akaaral ed leksion nipaakar ed kaumildian. Akin, diad mismon labin sakbay na impatey nen Jesus, sikara so nansasangsangan lamet nipaakar ed no siopa so sankabalgan ed limog da! (Lucas 22:24) Sirin, saramay mangiiter na simbawa so nakaukolan a maanos. (Eclesiastes 7:8) Say sakey a toon walaan na nilamulamut a lingon awawey so mabetbet ya agmanguman na kurang to lapu lambengat ed pigaran salita a manlapud sakey a matatken. Saray abayaglan problema na sanaasawa so agnaandipat kayari na sakey a pitontong na sakey a Kristianon matatken. Saray seryoson beblay so mankaukolan na dakel a bulan diad iyabig, tan nayarin ontan met ed saray seryoson espiritual a problema. Tan saray arum so basta agmalabay ya ontalineg ed maabig a simbawa. Anggaman sikato so sinimbawa nen Jehova a mismo, si Cain so linmulot tan pinatey to so agi to.—Genesis 4:6-8.
19. Panon so pakatulong na kongregasyon ed saraman so maniirap diad inkasugatan ed emosyon?
19 Saraman so walaan na ambelat a problema so magmaliw a realistiko ed no anto so nayarin ilaloan da a manlapud kongregasyon. Say kaparan Kristiano so agmakapangekal na tuloytuloy a kagogonigon ed isip, odino inkasakitan na emosyon nisengeg ed sakey a trahedya odino teriblen eksperiensia. No say sakey a too so mansasakit ed pisikal, mabetbet a say gawaen na doktor et say panggawa ed sikato a kumportabli legan a say panaon so mankikimey a manambal ed laman. Miulibay, sano say sakey a Kristiano so manpapautot ed emosyon, say kongregasyon so manalin “manggawa ed sikaton kumportabli,” manpikasin sikato so kaiba tan para ed sikato, ya iter so makapaseseg a salita kapiganman a nayari, tan mangiter na antokaman a praktikal a tulong a nayarian da. Insan, mabetbet, say panaon tan say espiritu nen Jehova so manambal. (Uliran 12:25; Santiago 5:14, 15) Sirin, insulat na sakey a biktima na insesto: “Manwarin say insesto so nayarin sengegan na teriblen inkasakitan na emosyon, say organisasyon nen Jehova so ontulong na baleg ed sikayo, tan diad tulong a manlapud Kasulatan tan panamabiskeg na agagin lalaki tan bibii, nayarian yon talonaan.”c
20. Anton biang so gawaen na simbawa legan a sikatayon amin so manggunaet a mantultuloy a manserbi ed si Jehova?
20 On, saray Kristianos so walaan na responsabilidad ya ontulong ed balang sinansakey. Saray mamatatken ed partikular, balet ontan met ed amin ed kongregasyon, so nepeg a mangimano ed pankaabigan na balang sinansakey tan mangiyopresi na mapangasi, Makasulatan a simbawa sano nakaukolan. (Filipos 2:4) Siempre, say ontan a simbawa so nepeg ya aliwan dinidiktador odino mapasang. Nisay sikato so mangiter na impresyon na panasalin mangontrol ed bilay na sakey. Imbes, nepeg a satan so nibase ed Kasulatan tan “atimplaan na asin.” (Colosas 4:6) Balang sakey so mankaukolan na tulong a panapanaon, tan say nipanpanaon a simbawa, ‘inasinan’ na panangasi tan panamaseseg, so ontulong ed sikatayon amin a mantultuloy ed dalan a mamaarap ed bilay ya andi-anggaan.
[Saray Paimano ed Leksab]
a Para ed malaem ya impormasyon diad panimbawa ed saray sanaasawa, nengnengen so artikulon “How to Give Counsel That Really Helps” ed Hulyo 22, 1983, a paway na Awake!
b Para ed saray suhestion ed no panon so panulong ed saray Kristianon nagogonigon, nengnengen iray artikulon “Speak Consolingly to the Depressed Souls” ed The Watchtower na Abril 15, 1982, tan “An Educated Tongue—‘To Encourage the Weary’” ed paway na Hunyo 1, 1982.
c Para ed malaem ya impormasyon diad panulong ed saraman so manasagmak na inkasugatan ed emosyon, nengnengen iray artikulon “Hope for Despairing Ones” tan “They Want to Help” ed The Watchtower na Agosto 1, 1983, tan “Help for the Victims of Incest” ed paway na Oktubre 1, 1983.
Kasin Nanonotan Yo?
◻ Antoran nengneng na simbawa nen Jesus ed saray pitoran kongregasyon so makatulong ed saray mamatatken natan?
◻ Antoran Makasulatan ya ehemplo so wala diad panangusar na ilustrasyon ed pangiter na simbawa?
◻ Diad sakey a Kristianon managsimbawa, anto so peteg a kablian na saray tepet?
◻ Panon so nayarin pangusar na makabat a managsimbawa ed Biblia?
◻ Akin a say toon mangiiter na simbawa so nepeg met a maalwar a managtalineng?
[Litrato ed pahina 15]
Diad impangusar ed sakey ya ugaw a mangiyilustra ed punto to, inter nen Jesus ed saray babangatan to so malinew, mapangasi, tan makapaalagey a simbawa
[Litrato ed pahina 16]
Si Jonas so agonigon tan asanokan, balet mapatnag a sikato so kinmiwas a maong ed simbawa nen Jehova