Ontalineng ed Si Jehova Legan a Manasingger So Anggaan
“Maliket so toon ontalineng ed siak . . . Lapud say sakey a makaromog ed siak so peteg a makaromog na bilay.”—ULIRAN 8:34, 35.
1, 2. (a) Anggaman ed kakulangan na kareenan ed interon awaran na too, anto natan so ibaga na arum? (b) Akin a say tuan kareenan ed panamegley na saray sagpot na totoo so imposibli?
ANGGAMAN ed kakulangan na kareenan ed interon awaran, nagkalautla ed sayan koma-20 siglo, ibabaga na arum a saray nasyones so manggagawa na kundang diad panresolbe ed saray gutgutan. Ituturo ra so katuaan a saray papangulo na mundo so manggagawa ed saray pantok a panaarap pian tongtongen so nipaakar ed kareenan tan pirmaan iray nanduruman paknaan. Akin, say Nasyones Unidas so angideklara nen katantaon a sikato so “Internasyonal a Taon na Kareenan”! Nailaloan a saya so makanengneng ed gapowan na nikaduman sagpot na saray nasyones diad pangiyalibansa na kareenan, dingan na posiblen aligwas ed asingger ya arapen.
2 Anggaman kuan, diad amin ya awaran, et kasin say miulibay iran sagpot so akapangitarok na permanentin kareenan? No satan so nayari ed too, wala la komon so kareenan nensaman ni—mabayag ni sakbay a niwala so limaran bilyon a totoon naapag-apag ed masulok a 160 nasyones, a tekep na saray agnabilang a pandurumaan na saray pilosopya ed pulitika, ekonomya, tan relihyon. Balet anggapon balot so kareenan, nisay wala so kareenan a mansumpal ed saray sagpot na totoo ed sayan mundo. Akin ya andi? Nisengeg ed sakey a rason, lapud saray problema na totoo so seryoson tuloy natan a sikara la so agnaresolbe lambengat na saray sagpot na totoo. A singa dugarugan ibabaga na Jeremias 10:23: “Agkayarian na too so panakar ya anggan say pangiwanwan to ed kundang to.”
No Akin a Saray Sagpot na Too So Ag-ontalona
3. Nisengeg ed anton arum a rason a saray totoo tan nasyones so agbalot makapangitarok na tuan kareenan?
3 Wala so sananey a rason no akin a saray sagpot na totoo tan nasyones so agbalot makapangitarok na tuan kareenan. Satan so tutukoyan na Biblia ed 1 Juan 5:19, a kuanto: “Say interon mundo so mandukdukol ed pakayari na sakey a marelmeng.” Ipapanengneng na Apocalipsis 12:9 so satan a “sakey a marelmeng” a “say sakey ya atawag na Diablo tan Satanas, a mamapalikdo ed interon panaayam a dalin.” Sikato so tinawag na 2 Corinto 4:4 a “say dios na sayan sistema na bengabengatla.” Sirin, say interon peles a sistema na pulitika, ekonomya, tan relihyoson uley ya amawala na ontan lan karawalan so produkto na uley nen Satanas, aliwan say uley na Dios. Sikato no akin, sanen sasalitaen to so kakabatan a manlapud Dios, ibabaga na 1 Corinto 2:8: “Sayan kakabatan so ag-akabatan na saray manuley na sayan sistema na bengabengatla.”—Lucas 4:5, 6.
4. Anto so nansumpalan kayari na intunda na saray inmunan atateng tayo ya ontalineng ed si Jehova?
4 Sanen nanrebelde si Satanas ed Dios, sinagyat toray inmunan atateng tayo ya ontalineng ed sikato imbes a diad Dios. Bilang nansumpalan, sikara so dinmuplit a nanlapud katutulok ed Dios tan intarok da ed pamilya na too so 6,000 taon na ot-ot. Ibabaga na Biblia ed sikatayon malinlinew ya inayat nen Satanas so totoon manisia a magmaong so pansumpalan da diad ag-italineng ed Manamalsa ra. (Genesis 3:1-5) Diad kakabatan to, pinaulianan nen Jehova so mundo na katooan ed inkalapagan a mankurang ed inkasikaton dili, ya andian na panangiwanwan to, ya anggad peles a panaon. Tan petepeteg, diad amin na sarayan siglo, et malaelaem a nipanengneng a say uley na too so sinmaew.—Deuteronomio 32:5; Eclesiastes 8:9.
5. Anggano say kareenan so nitarok na saray sagpot na totoo, anto nin siansia so wala ed sikatayo?
5 Nagkalalo ni, sanen si Adan tan Eva so tinmundan ontalineng ed si Jehova, say Subol na ayadyarin bilay, sikara so nagmaliw ya ag-ayadyari tan kabekta et sikara so inatey. Sirin, amin a kapolian da so nianak ya ag-ayadyari. Sakit, itatatken, tan patey so asagmak na totoo. (Roma 5:12) Sirin, anggamano saray totoo so nayarin ontalona diad pangitarok na kareenan, siansian agda natambal so atawir ya ag-inkayadyari. Sikatayon siansia so mansakit, ontatken, tan ompatey. Lapud si Satanas so responsabli ed saya, inkuan nen Jesus ed sikato: “Satan a sakey so managpatey [sakey a manamatey] sanen ginmapo, tan agtinmalindeg a malet ed katuaan.” (Juan 8:44) Peteg, sano isipen yo so nipaakar ed binilbilyon a nambilay tan inatey ed apalabas, sikato so singano sikaran amin so pinatey nen Satanas.
6. Siopa ra so managderal na kareenan, tan anto so nepeg a nagawa ed sikara?
6 Inayat met nen Satanas so arum ya espiritun pinalsan miulop ed sikato diad itutunganga, tan amin na sarayan marelmeng so agmalabay ya ontalineng sano mansalita si Jehova. Sirin si Satanas, saray demonyos to, tan saray rebelyoson totoo so angitarok ed sayan mundo na peles a kipapasen to. Nepeg a sikaran amin so napagit, pian mangangga iyan makadesyang ya 6,000-taon ya impanali na independensya ed Dios. “Say Dios a mangiter na kareenan,” ipapaseguro na Roma 16:20, “so manmekmek ed si Satanas . . . diad magano,” tan ontan met ed saray dedemonyos to tan ed amin a totoon agmalabay ya ontalineng sano say Dios so mansasalita.—Mateo 25:41.
Babaleg a Pankaukolan na Italineng Natan
7. Akin a nepeg tayon pabiskegen iray sagpot tayo a manserbi ed si Jehova natan?
7 Sikatayo la natan so walad kautelan na sampot a kabiangan na sarayan “kaunoran ya agew.” (2 Timoteo 3:1-5) Bilang nansumpalan, wala so lawas-babaleg a pankaukolan na italineng ed ibabaga nen Jehova ed sikatayo. Wala so mipetekan a pankaukolan a pabiskegen so bulos-linawa tayon mansakripisyon manlingkor ed sikato. Akin a pabiskegen tayoray sagpot tayo? Lapud kabat nen Satanas a walaan lambengat na “antiktikey a panaon” a natitilak. (Apocalipsis 12:12) Kanian sikato so seguradon mamabiskeg ed saray sagpot to a manesyang tan maneral.
8. (a) Akin a say kimey na panagpulong so agnapatunda na saray kakabusol to? (b) Anto so nepeg tayon gawaen ta pian mantultuloy so madibinon pananulong?
8 Nagkalautlan labay nen Satanas a patundaen iray Tasi nen Jehova diad panangipulong ed maong a balita na Panarian. Balet agto nagawaan, lapud insipan nen Jehova ed sikara: “Anggan anton ayuran nipaarap ya onsumpad sikayo so ag-ontalona.” (Isaias 54:17) Saramay manumlang ed saray ariripen to so “naromog a mibabakal a peteg a sumpad Dios.” (Gawa 5:38, 39) Sirin, diad mabiskeg a pananulong na espiritu nen Jehova, si Kristo Jesus, tan saray dakerakel ya anghelikon puersa, say kimey na panangiyabawag ed Panarian so ombubulaslas ed biskeg a kada taon. Pian napansiansia so ontan a madibinon tulong, saray ariripen nen Jehova so maalwar ya ontulok ed simbawa diad Santiago 4:7, 8: “Pauleyan kayo, sirin, ed Dios; balet sumpaen so Diablo, tan sikato so onarawi ed sikayo. Onasingger ed Dios, tan sikato so onasingger ed sikayo.”
9. Akin ya agtayo nepeg a leglemewen si Satanas?
9 Agleleglemewen so kapasidad nen Satanas a mamalikdo tan mamasakit. Mamapasakbay so Salita na Dios: “Manlikas kayo, manbantay. Say kabusol yo, say Diablo so sibersiber a singa umoang a leon, a manaanap na buagen to. Balet ontalindeg kayo a sumpad sikato, putel ed pananisia.” (1 Pedro 5:8, 9) No kabat mon wala so atiwel a leon ya akarakar a bulos ed kaliberliber mo, sika so manalwar a manalimbeng ed inkasika tan say pamilyam. No nipaakar ed si Satanas, sikatayo so nagkalalon alerto, unong ta nagawaan to ed sikatayo so andi-anggaan a desyang. Makapaermen, dakel a totoo so andian na depensa lapud agda anggan kabat a si Satanas so wala. Akin ya ontan? Lapud pilien da so ag-italineng ed Salita nen Jehova. Tan anto so pansumpalan ed satan a pilin mauges? “Antokaman ya itanem na too, saya met so anien to.”—Galacia 6:7.
Sano Ikelyaw Da So “Deen tan Kaligenan!”
10, 11. (a) Anto so nepeg tayon nonoten nipaakar ed anggan anton nayarin aligwas na nasyones diad pangitarok na kareenan? (b) Anton propesiya na Biblia so nisiglaot diad panaanap na nasyones ed kareenan diad panaon tayo? (c) Panon inkamagnayon so anggan anton ontan a kareenan?
10 Agkomon napalikdo ed anggan anton aligwas a nayarin nagawaan na nasyones diad pangitarok na kareenan. Lawas nonoten a si Jehova et agto uusaren so anggan dinan ed saray ahensya na sayan mundo ed satan a pamaakaran. Si Jehova so walaan na dilin dalan diad pangitarok na tuan kareenan, tan satan lambengat so diad panamegley na Panarian to diad leksab nen Kristo. Sirin antokaman ya aligwas a nayarin nagawaan na saray nasyones diad pangiletneg na kareenan, saya so antikey tan akinpaway lambengat. Anggapo so peteg ya angumanan. Say krimen, karawalan, bakal, eras, irap, kabubuyak na pamilya, imoralidad, sakit, patey, tan si Satanas tan saray demonyos to so siansia nin wala ed sikatayo ya anggad sikaran amin so punasen nen Jehova. “No aliwan si Jehova a mismo so mangipaalagey na abung, saray managpaalagey so mansagpot labat ya andi-kakanaan.”—Salmo 127:1.
11 Peteg ya ipapanengneng na propesiya na Biblia a saray nasyones so manggunaet ed kareenan diad panaon tayo. Ibabaga to: “Sikayo a mismo so mikabat a maong a say agew nen Jehova so onsabin peteg a singa matakew ed labi. Kapiganman ya ibabaga ra: ‘Deen tan kaligenan!’ insan biglan kadederal so tampol ya ondapo ed sikara a singa pasakit na sakey a biin malukon; tan sikara so agbalot makaliktar.” (1 Tesalonica 5:2, 3) Satan a kelyaw na “Deen tan kaligenan!” so agmankabaliksan a say bulok na sayan mundo so nauman. Ibabaga na 2 Timoteo 3:13 a “saray marelmeng a totoo tan managpalikdo so unuges lan unuges.” Say kapetegan so siansia nin singa samay imbaga na pangulo na sakey a muyongan: “Say sentron problema ya aarapen na sosyedad so agla nabanlongan.”
12. Anto so kabat na saray ariripen nen Jehova nipaakar ed peteg a kabaliksan na onsasabin kelyaw na ‘deen tan kaligenan’?
12 Dakel ed mundo so napalikdo diad saray maapan ilalo legan ya onsasabin kelyaw na “Deen tan kaligenan!” Balet saray ariripen nen Jehova so aliwan ontan, lapud sikara so ontatalineng sano mansalita so Dios. Sirin kabat dan manlapud Salita to a say ontan a panangiyabawag so agmangitarok na tuan kareenan tan kaligenan. Noag ingen, sikato so diad katuaan et magmaliw a tandan say “biglan kadederal so tampol ya ondapo ed sikara.” Sikato so mangiyaaniweng na mapatnag a gapowan na “baleg a kairapan” ya impasakbay nen Jesus ed panaon tayo. Inkuanto: “Ta diad satan et wala so baleg a kairapan ya agnin balot agawa nanlapulad gapo na mundo ya anggad natan, andi, nisay nagawa lamet.”—Mateo 24:21.
13. Panon so panideskribe ed anggaan na saray pananguley na too?
13 Kaleganan na “baleg a kairapan,” say uley na too so nitarok ed anggaan. Ibabaga na Salmo 2:2-6: “Saray arari na dalin so ontalindeg tan saray atatagey a betang so mandaragup a bilang saksakey a sumpad si Jehova tan sumpad nilanaan to, a kuan da: ‘Pultoten tayo so taker tan ibantak tayoray lubir da a manlapud sikatayo!’ Say mismon Sakey a manyudyurong ed katawenan so onelek; si Jehova a mismo so manludlurey ed sikara. Diad satan a panaon et sikato so mansalita ed sikara diad sanok to tan diad ampetang ya ingongot to et sikara so guloen to, a kuanto: ‘Siak, anggan siak, so angitandoro ed arik diad [mangatatawen] a Sion, say masanton palandey ko.’” Inyarum na Salmo 110:5, 6: “Si Jehova a mismo . . . so peteg a manmekmek ed saray arari a misimisien diad agew na sanok to. Idapo to so panangukom ed limog na nasyones.” Amin a mapulitikan gegemtan so mangangga, lapud iyaabawag na Isaias 8:9, 10: “Balkesan yo so inkasikayo, tan namekmek kayo! Balkesan yo so inkasikayo, tan namekmek kayo! Mannonot kayo na sakey a getma, tan nabuyak! Mansalita na anggan anton salita, tan ag-ontalindeg, lapud say Dios so wala ed sikatayo!”
Matalek ed Kililiktar
14. Akin a matalek itayon walaray niliktar ed anggaan na sayan mundo?
14 Matalek itayo ya itultuloy nen Jehova a pakabatan so totoo to ta pian sikara so makapanggawa na manepeg a kundang diad kiliktar ed onsasabin “baleg a kairapan.” Panon so pakaseguro tayo? Lapud say propesiya ed Apocalipsis 7:9, 14 so mangipapanengneng a “sakey a baleg ya ulop” so peteg a makaliktar. Akin? Lapud sikara so ontatalineng sano si Jehova so mansalita tan manepeg a nababangatan. Diad onia et say “baleg ya ulop” so makayarin manggawa ed ibabaga na Apocalipsis 7:15: “Sikara so mangisasaklang ed sikato na sagradon lingkor ed agew tan labi.” Sirin gagawaen da so linawa na Dios, nagagamoran da so panangabobon to, tan sikara so nasalimbengan a makaliktar ed anggaan na sayan mundo.—1 Juan 2:15-17.
15. Panoy panideskribe na Joel ed kamekmek na sayan sistema, tan anto so pansumpalan ed saray ariripen na Dios?
15 Tutukoyen met na Joel 3:13-16 so kililiktar na saray ariripen na Dios sano sayan sistema so namekmek a singa ubas ed panagpespesan na alak. Ibabaga to: “Isingwat yo so kompay, lapud saray aanien so aluto la. . . . Saray samang so peteg a manlippua; lapud say kaugsan da so abalbaleg. Saray ulop, saray ulop ed abeban patar na panangigeter, lapud say agew nen Jehova so asingger ed abeban patar na panangigeter. Say agew tan bulan so peteg ya ombilunget, tan saray mismon bibitewen so peteg a mangisiblet na sinag da. Tan manlapud [mangatatawen] a Sion et si Jehova a mismo so onaglem . . . Say tawen tan dalin so peteg a nayegyeg; balet si Jehova so salimbengan na totoo.”
16. Anton arum a propesiya so mangipapanengneng a si Jehova so mangiliktar ed totoo to diad kadederal na mundo?
16 Mipadpara, diad Isaias 26:20, 21 et ibabaga nen Jehova so ontan ya onsasabin panaon: “Onla kayo, baley ko, onloob ed akindalem iran silir yo, tan ikaput yoray puerta ed benegan yo. Iyamot mo so inkasika a magano ya anggad onlabas so sanok. Ta, nia! si Jehova so ompaway a manlapud pasen to pian mipalinewan ed kasulitan na manaayam ed dalin a sumpad sikato.” Sirin, ipapaseseg na Sofonias 2:2, 3: “Sakbay ya onsabi ed sikayo so agew na sanok nen Jehova, anapen si Jehova, amin yo a mauyamo ed dalin, ya angagamil na dilin maptek a panangigeter To. Anapen so inkatunong, anapen so kauyamoan. Anganko ta nayarin sikayo so niyamot diad agew na sanok nen Jehova.”
‘Ombatik’ ed Si Jehova
17. (a) Anto so nepeg a gawaen pian nagamoran so pananalimbeng nen Jehova? (b) Anto so mauges a ginawa na totoo ed samay sakbay-na-Delap a mundo?
17 Ibabaga na Uliran 18:10: “Say ngaran nen Jehova so mabiskeg ya ilang. Saray matunong so ombatik ed sikato tan nasalimbengan.” Kasin sika so ‘ombabatik’ ed si Jehova? Nonoten so imbaga nen Jesus nipaakar ed saray totoo ed agew nen Jehova. Sikara so “manaakan tan maniinum, saray lalaki so angasasawa tan saray bibii so akiasasawa, ya anggad agew ya inloob nen Noe ed biong; tan ag-ira nanimano ya anggad sinmabi so delap tan intakos toran amin.” (Mateo 24:38, 39) Say mauges et say impagmaliw dan okupado ed amin a bengatla ya agda nilabay so ontalineng ed Dios sanen sikato so nansalita ed panamegley nen aripen ton Noe, “sakey a managpulong na inkatunong.” (2 Pedro 2:5) Lapud ag-ira tinmalineng, sanen sinmabi Delap et “intakos toran amin” ed kadederal.
18. Akin a say basta kipapasen dan “maong” a totoo so ag-angiliktar ed saramay aderal ed Delap?
18 Dakel ed saramay inatey ed Delap so andi-duaruwan angipasen ed inkasikaran “maong” a totoo, ya ag-akibabali ed karawalan ya amano ed sosyedad diad saraman ya agew. Balet say pagmaliw a “maong” so ag-angiliktar ed sikara. Diad panamegley na agda pananginenen et akinunong ira ed mauges diad agew da. Say sankakanaan a bengatla et say agda ‘imbatik’ ed si Jehova; ag-ira tinmalineng sanen nansalita so aripen na Dios. Sirin agda ginawa so manepeg a kundang diad kililiktar. Diad biek a dapag, saramay tinmalineng so niliktar.
19. Anton makapakelaw a gungguna so anien na saray ariripen nen Jehova anggan natan, tan akin?
19 Natan et say Dios so mansasalita na kareenan ed saraman so ontalineng ed sikato. Tekep na anton pansumpalan ed sikara? Ibabaga na Isaias 54:13: “Amin na saray anak mo so totoon imbangat nen Jehova, tan say kareenan na saray anak mo so daakan.” On, si “Jehova a mismo so mamendito ed totoo to na kareenan.” (Salmo 29:11) Sirin, diad pegley na sayan magulon mundo, saray Tasi nen Jehova so walaan na tua, agnabuyak a kareenan ed limog dan dili. Sikara so walaan na maaron internasyonal ya impanaagin agnaalig na saray papangulo na mundo, saray nasyon da, tan saray relihyon da. Akin ya andi? Lapud saraya so ag-ontatalineng a peteg sano say Dios so mansasalita. Kanian sikara so ag-onkikiwas ed ibabaga to. Balet saray Tasi nen Jehova so ontatalineng ed Dios. Seryoson iimanoen da so salita ed Eclesiastes 12:13: “Takotan so tuan Dios tan sumpalen iray ganggan to. Ta saya so sigpot a kanepegan na too.”
20. Anto so nepeg a gawaen na kada too pian makaliktar ya onloob ed balon mundo na Dios?
20 Satan so nepeg a gawaen na kada too—on, amin a malabay a manbilay ed balon mundo na Dios. Sikara so nepeg ya ‘ombatik’ ed si Jehova ya agmanabala. Peteg, sikara so nepeg ya iwanwan na inter-na-Dios a kakabatan a nirepresenta a singa mangibabaga na: “Ontalineng ka ed siak; on, maliket iraman so manumpal ed saray mismon dalan ko. Ontalineng ed disiplina tan onkabat, tan ag-ipanengneng so anggan anton panamaulian. Maliket so toon ontalineng ed siak . . . Lapud say sakey a makaromog ed siak so peteg a makaromog na bilay.”—Uliran 8:32-35.
Panon So Iyebat Yo?
◻ Akin a saray sagpot na totoo so agbalot ontalona diad pangitarok na kareenan?
◻ Akin a wala natan so babaleg a pankaukolan na italineng ed si Jehova?
◻ Anto so peteg a kabaliksan na onsasabin kelyaw ed “Deen tan kaligenan!”?
◻ Anto so nepeg tayon gawaen no labay tayo so makaliktar ya onloob ed balon sistema na Dios?
[Litrato ed pahina 10]
Singa sakey ya umoang a leon, si Satanas so mamapabiskeg ed sagpot ton manesyang tan maneral
[Litrato ed pahina 11]
Sano sayan sistema so namekmek a singa ubas ed panagpespesan na alak, “si Jehova so magmaliw a salimbengan ed totoo to”