Kasin Ampetang So Impierno?

“DIAD arum a punto nen milnuebe-siento-sisentas, say Impierno so naandipat.” Ontan so imbaga nen David Lodge ya autor a British ed libro ton Souls and Bodies, tan saray salita to so angisindag ed panag-isip na dakel a Katoliko tan Protestante kaleganan na saray dekada ed kayari na komaduan guerra mundial. Diad sakey a panaon, dakel ed saray manunan iglesia a mismo so amapuyapoy ed opisyal a doktrina na mandarlang ya apuy diad sagpot dan pangiyadapta ed modernon kaisipan iran padron.

Say ideya na kadusa ed kayari na ipatey so nagkalautlan agnaawat na saray totoo lapud say kaisipan ed kasalanan a mismo so nagmaliw lan maudiem ed saray kanonotan da. Ininterbio nen 1984, inkuan nen Kardinal Ratzinger na Roma: “Say sibilisasyon tayo . . . so mangiyaapasakey na pamalemek ed saray sirkumstansya tan barbaraan diad getman pangekal ed panlikna na too ed kagonigonan, ed kasalanan . . . , a say mismon kapetegan na pananisia ed impierno tan Purgatoryo so nisiglaot.”

Kasin posibli natan so panisia ed kapetegan na kasalanan ya ag-awaten so doktrina na kadudusa ed kayari na ipatey diad purgatoryo tan impierno? Sakey ya agano nin libro, Abrégé de la foi catholique (Sumarya na Katolikon Pananisia), a say paulon-salita so insulat nen Pranses Kardinal Decourtray, so diretsan nantepet: “Kasin nakaukolan so panisia ed impierno?” Say ebat: “Aliwan posibli so pakapaliis ed manamakigtot a tepet diad impierno.” Say libron Vatican Council II​—More Postconciliar Documents (1982) so angaon ed “Say Credo na saray Totoo na Dios” a kuanto: “Manisia kami . . . [a] saraman so kinmiwas ed aro tan panangabagey na Dios so onla ed maandon bilay. Saraman so mangipulisay ed satan so nigana ed apuy ya agbalot naerep.”

Sirin, anggaman ed amin na saray teologon sagpot a pamaneknek ed kasuniyan, say impiernon-apuy so siansia nin manunan kabiangan na opisyal a bangat na Katoliko. Ingen sasalitaen na A New Dictionary of Christian Theology (1983) so “inkabaingan” tan say “agpakairiir” a say doktrina ed andi-anggaan a kadusa so nasasagmak na dakel a membro na saray iglesia na Kakristianoan natan. Sikara so nagugutgut diad pangisiglaot ed sayan bangat diad kaisipan na sakey a Dios na aro. Morekdeken da: ‘Kasin say ampetang ya impierno so peteg a Kristiano tan Biblikal a doktrina? No andi, iner so nanlapuan to?’

[Litrato ed pahina 3]

Bourges Cathedral, France