Say Madibinon Panangibangat so Ontatalona

“Saray matam nanengneng da naani so saray mangibangat ed sika. Et saray layag mo makadngel ira naani na sakey a salita ed beneg mo, a kuan to: ‘Saya so dalan, ondalan kayo ed sikato.’”​—ISAIAS 30:20, 21.

1. Akin a say bangat nen Jehova so makatunongan a natawag a madibinon panangibangat?

SI Jehova a Dios so Lapuan na sankaabigan a bangat a nagamoran na siopaman. No ontalineng itayo sano sikatoy mansasalita, nagkalautla diad panamegley na Sagradon Salita to, sikato so magmaliw ya Engranden Instruktor tayo. (Isa. 30:20) Diad Hebreon teksto ed Biblia et sikato so nasasalambit met a bilang “say Madibinon Sakey.” (Salmo 50:1, NW) Kanian, say instruksyon nen Jehova so madibinon panangibangat.

2. Diad anton pantalos a tuan say Dios lambengat so makabat?

² Say mundo so mangikinon ed dakel ya edukasyonal ya institusyon to, balet anggapoy anggan sakey ed saratan a mangitatarok na madibinon panangibangat. Siempre, amin a minumundon kakabatan ya atipon ed interon awaran so samet labat no nipareng ed madibinon bangat a nibase ed anggapoy anggaan a kakabatan nen Jehova. Ibabaga na Roma 16:27 a say Dios lambengat so makabat, tan saya so tua diad pantalos a si Jehova lambengat so walaan na absoluton kakabatan.

3. Akin a si Jesu-Kristo so sankaabigan a managbangat a nambilay ed dalin?

³ Say Anak na Dios, si Jesu Kristo, so uliran na kakabatan tan sankabalgan a managbangat a nambilay ed dalin. Agpankelawan! Diad loob na andukey lan panaon si Jehova so nagmaliw a Managbangat to diad katawenan. Diad tua, say madibinon panangibangat so ginmapo sanen ginapoan na Dios a bilinen so inmunan palsa to, say bogbogtong ya Anak to. Kanian nibaga nen Jesus: “Onong na imbangat na Ama ed siak, salitaen ko so saraya’n bengatla.” (Juan 8:28; Uliran 8:22, 30) Saray dilin salita nen Kristo a nirekord ed Biblia so nagkalalon mangarum ed kakabatan tayo ed madibinon panangibangat. Diad pangibangat ed imbangat nen Jesus, saray alanaan a Kristiano so manguunor ed Engranden Instruktor da, a say linawa to et “dakel a tuloy iran nanduruman kakabatan na Dios” so nipakabat diad panamegley na kongregasyon.​—Efeso 3:10, 11; 5:1; Lucas 6:40.

Say Pananap na Kakabatan

4. Anto so asaglawi nipaakar ed pakayari na utek?

⁴ Say pakagamor na kakabatan a resulta na madibinon panangibangat so mankakaukolan na magunaet a pangusar ed inter na Dios a pakayari na kanonotan tayo. Saya so posibli lapud say utek na too so walaan na pakayarin manggawa na dakel a bengatla. Onia so kuan na libron The Incredible Machine: “Anggan saray masilewet a tuloy a computer a namorekdek tayo so makapuy no ikumpara ed ngalngalin agmanganggan inkakomplikado tan pleksibilidad na utek na too​—kalidades ya agawan posibli diad inkakumplikado na satan, estandarten sistema na saray sinyal na elektrokemikal. Saray minilyon a sinyalis a biglan nanonotan ed anggan anton momento so nankarga na nikadkaduman impormasyon. Saratan so mangitarok na saray balita nipaakar ed akindalem tan akinpaway na laman: a singa say ikelat na tangan na sali yo, odino say balingit na kape, odino say makapalek a komento na kaaro. Legan a saray arum ya andar na sinyalis tan panguuksoy na impormasyon, saratan so mamawala na saray emosyon, memorya, nonot, odino plano a mansumpal ed sakey a desisyon. Ngalngalin tamtampol, saray sinyal a manlapud utek yo so mangibaga no anto so gawaen na arum iran kabiangan na laman yo: a singa say pangigalaw ed tangan na sali yo, iyinum ed kape, iyelek, odino angangko et mangibalikas na makapalek. Ontan met say utek yo so maniimano ed panag-ingas yo, ed reaksyon na dala, petang, tan arum niran makana iran andar likud ed pakaamta yo. Satan so mangibaki na saray gangan a mamasiansia ed kondisyon na laman tan mauksoy a panangipakurang anggaman ed naynay a pananguman na kaliberliber mo. Satan so mangipaparaan met para’d arapen iran pankaukolan.”​—Pahina 326.

5. Diad Makasulatan a pantalos, anto so kakabatan?

⁵ Anggaman agnasuppiat a say utek na too so walaan na makapakelaw a pakayari, panon tayon nausar so kanonotan ed sankaabigan a dalan? Aliwan diad pangimedmer tayo na inkasikatayo ed panaral na mairap a lenguahe, history, siensia, odino panangipareng ed saray relihyon. Usaren tayon manuna so pakayari na saray nonot tayo diad pangawat na madibinon panangibangat. Satan lambengat so mamawala na puron kakabatan. Balet anto so tuan kakabatan? Diad Makasulatan a pantalos, say idadanet na kakabatan et say asimbang a panagdesisyon a nibase’d suston pikakabat tan peteg a pakatalos. Diad panamegley na kakabatan et nausar tayo so pikakabat tan pakatalos a sitatalonan resolbien so saray problema, pian paliisan odino amperen so saray kapeligroan, pian tulongan iray arum, tan pian kapeten iray kalat. Makapaliket, ipapanengneng na Biblia so pandumaan na kakabatan ed kakulangkulangan tan inkaambagel​—ugalin maseguron kaliktan tayon paliisan.​—Deuteronomio 32:6; Uliran 11:29; Eclesiastes 6:8.

Say Baleg a Libron-panaralan a Kien nen Jehova

6. No sikatayo so mangipanengneng na peteg a kakabatan, anto so nepeg ya usaren a maong?

⁶ Diad kaliber-liber tayo et wala so inkadaakan na minumundon kakabatan. (1 Corinto 3:18, 19) Siempre, sayan mundo so apusek na eskuelaan tan libraria a walaan na minilyon a libro! Dakel ed saraya so libron-panaralan a mangibabangat na lenguahe, matematika, siensia, tan arum niran lawak na kakabatan. Balet say Engranden Instruktor so angitarok na libron-panaralan a manuna ed amin niran libron-panaralan​—say apuyanan a Salita to, say Biblia. (2 Timoteo 3:16, 17) Satan so aglambengat susto no nipaakar ed saray bengatlan nisisiglaot ed tema a singa say awaran, heograpiya, tan botanika noag ontan met sano mangipapasakbay nipaakar ed arapen. Nagkalalo ni, satan so ontutulong ed sikatayo a nawalaan na sankaliketan tan sankamabungaan a bilay natan la. Siempre, no panon a kaukolan ya usaren na saray estudyante ed minumundon eskuelaan iray libro ra, sikatayo so nepeg a mangikabisadon maong ed baleg a Libron-panaralan a kien na Dios no labay tayon ipanengneng so tuan kakabatan a bilang “binangatan nen Jehova.”​—Juan 6:45.

7. Akin a nibagam a say basta pikakabat ed saray karga na Biblia so agmagenap?

⁷ Ingen, say basta pikabat ed Biblia so aliwan pareho ed tuan kakabatan tan say itutumbok ed madibinon panangibangat. Diad pangiyilustra: Nen koma-17 siglo K.P., sakey a Katoliko a manngaran na Cornelius va der Steen so nampilalek a magmaliw a sakey a Jesuitan pari balet sikato so ag-inabuloyan lapud sikato so pandak. Onia so inkuan nen Manfred Barthel ed libro ton The Jesuits​—History & Legend of the Society of Jesus: “Pinakabatan na komite si van der Steen a sikaray bulos a mangipaskar ed kakaukolanen nipaakar ed kaatagey, salambengat ed paknaan ya ipatlep to so interon Biblia. Anggapo komon so kakanaan na pangestorya no ag asumpal nen van der Steen so sipapasang a kerew.” Agaylan sagpot so nakakaukolan diad pangipatlep ed interon Biblia! Anggaman ontan, maseguron mas importanti a natalosan so Salita na Dios, nen say pangipatlep labat ed satan.

8. Anto so ontulong ed sikatayon nagunggunaan manlapud madibinon panangibangat tan mangipanengneng na tuan kakabatan?

⁸ No kaliktan tayon sigpot a nagunggunaan manlapud madibinon panangibangat tan mangipatnag na tuan kakabatan, kaukolan tayon nawalaan na suston pikakabat ed Kasulatan. Nepeg met a sikatayo so niwanwan na masanton espiritu, odino aktibon puersa nen Jehova. Saya so ontulong ed sikayo ed panaral na aralem iran katuaan, “say aralem iran bengatla na Dios.” (1 Corinto 2:10) Sirin, komon ta siseseet tayon aralen so baleg a Libron-panaralan a kien nen Jehova tan manpikasi a sikatayoy iwanwan to diad panamegley na masanton espiritu to. Mitukoyan ed Uliran 2:1-6, imanoen tayo so kakabatan, ikiling so puso tayo ed pakatebek, tan onkerew na pakatalos. Saya so nepeg tayon gawaen a singa sikatayo so manaanap ed niyamot a kayamanan, lapud diad satan lambengat a sikatayo so ‘makatalos ed takot ed si Jehova tan naromog so aralem a kakabatan na Dios.’ Say pangunsidera ed pigaran itatalona tan gungguna na madibinon panangibangat so mamalaknab ed apresasyon tayo para’d inter-na-Dios a kakabatan.

Onaaligwas a Pakatalos

9, 10. Anto so imbaga na Dios, unong a nikurit ed Genesis 3:15, tan anto so suston pantalos ed saraman a salita?

⁹ Say mabibinon panangibangat so ontatalona diad panginanabang ed totoo nen Jehova ed progresibon pakatalos ed Kasulatan. Alimbawa, naaralan tayo a si Satanas a Diablo so nansalita diad panamegley na uleg diad Eden tan sititilan amakasalanan a say Dios so nantila sanen imbaga to a say patey so dusa ed pangan na isesebel a bunga. Balet, anengneng tayo a say itutunganga ed si Jehova so talagan angitarok na patey ed limog na rasa na katooan. (Genesis 3:1-6; Roma 5:12) Ingen, say Dios so angiter na ilalo ed katooan sanen imbaga to ed uleg, tan satan et si Satanas: “Tan mangyan ak na gulaan ed sika tan say bii, tan gulaan ed saray ilalak mo tan tan ilalak to; sikato sugaten to so olom, et sika sugaten mo so mokor to.”​—Genesis 3:15.

¹⁰ Saraman a salita so angilaktip na sakey a sekreto a progresibon nipaparungtal ed panamegley na madibinon panangibangat. Ibabangat nen Jehova so totoo to a say manunan tema na Biblia et say kialangon na inkasoberano to diad panamegley na Bini, a sakey ed kailalakan nen Abraham tan David so walaan na legal a kanepegan ed panguley ed Panarian. (Genesis 22:15-18; 2 Samuel 7:12, 13; Ezequiel 21:25-27) Inbangat na Engranden Instruktor tayo a si Jesu-Kristo so manunan Bini na “bii,” say sankatalbaan ya organisasyon na Dios. (Galacia 3:16) Anggaman ed amin a subok ya intarok nen Satanas ed sikato, nansiansian matoor si Jesus​—angga ed patey, a satan so inpanugat ed Bini diad mokor. Naaralan tayo met a 144,000 a mitatawir ed Panarian a nanlapud limog na katooan so mibiang ed si Kristo diad panmekmek ed ulo nen Satanas, “say daan ya uleg.” (Apocalipsis 14:1-4; 20:2; Roma 16:20; Galacia 3:29; Efeso 3:4-6) Agaylan apresyaen tayo so ontan a pikakabat ed Salita na Dios!

Mamaarap ed Makapakelaw a Liwawa na Dios

11. Akin a nibagan matalona so madibinon panangibangat ed panangitarok na totoo ed espiritual a liwawa?

¹¹ Say madibinon panangibangat so ontatalona diad pangitatarok ed totoo diad espiritual a liwawa. Saray alanaan a Kristiano so walaan na satan ya eksperiensia bilang kasumpalan na 1 Pedro 2:9: “Sikayo so apili a kapolian, peteg ya inkasacerdote, masantos a nacion, sakey a baley na Dios a dilin kayarian to, ya mangibelyaw na karlangan na saman so angekal ed sikayo ed kabilungetan, ta tinawag to kayo ed makapakelaw a silew to.” Natan, say inter-na-Dios a liwawa so pangagayagaan met na “baleg ya ulop” a manbilay ya ando lan ando diad paraison dalin. (Apocalipsis 7:9; Lucas 23:43) Legan a babangatan na Dios so totoo to, say Uliran 4:18 so napapaneknekan a tua: “Balet say basbas na matunong sikato so singa liwawa na kabuasan, ya onsinag [lan] onsinag anga ed nagnap ya agew.” Sayan progresibon paraan na panagaral so mamipino ed pakatalos tayo ed madibinon panangibangat, no panon ya onaaligwas iray estudyante ya ontalona lapud maabig a tulong na managbangat legan ya aaralen da so gramatika, history, tan arum niran subject.

12, 13. Sumpa ed antoran mapeligron doktrina a say madibinon panangibangat so manasalimbeng ed totoo nen Jehova?

¹² Say sananey nin itatalona na madibinon panangibangat et say panagsalimbeng na satan ed saray mananawit to manlapud “saray bangat na demonio.” (1 Timoteo 4:1) Diad biek a dapag, imanoen pa so Kakristianoan! Nen 1878, insulat na Romanon Katolikon pari a si John Henry Newman: “Diad panmamatalek nensaman ed pakayari na Inkakristiano pian labanan so pakadutakan ed mauges, tan pian umanen iray bengatla tan ag-agamil a nisisiglaot ed panagdayew-ed-demonyo a pagmaliwen a nausar ed ebanghelyo, . . . saray manuley na Iglesia manlapud inmuna ran panaon so akaparaan no bilbilang ta onsabi so pankanawnawa, ed pangadapta, odino pangalig, odino pangiyabuloy a niwala iray ritual tan kostumbre na saray onbaley, ontan met ed pilosopiya na edukadon klase.” Inyarum ni nen Newman a saratan a bengatla et singa say agua bendita, kawekawes na pari, tan saray imahen so “nanlapud paganon lapuan ya amin, tan pinasagrado diad impangadapta ra ed Iglesia.” Saray totoo na Dios so peteg a misadsalamat a say madibinon panangibangat so manasalimbeng ed sikara manlapud ontan ya apostasya. Saya so manatalona ed amin a nengneng na inka-demonyo.​—Gawa 19:20.

¹³ Say madibinon panangibangat so ontatalona ed relihyoson lingo ed amin a pamaakaran. Alimbawa, bilang totoon binangatan na Dios, agtayo sisiaen so trinidad noagta bibidbiren tayo a si Jehova so Sankatageyan, si Jesus so Anak to, tan say masanton espiritu so aktibon puersa na Dios. Agtayo natatakot ed impiernon-apuy, lapud amoria tayo a say impierno ed Biblia so kaslakan a lubok na katooan. Tan legan ya ibabaga na palso iran relihyonista a say kamarerwa na too so ag-ompatey, kabat tayo a saray inatey et anggapoy amta ran balot. Nasalambit tayoray dakdakel a katuaan a naaralan tayo diad panamegley na madibinon panangibangat. Agaylan bendisyon so pakalukpos ed espiritual a panangaripen na Babilonia a Baleg, say imperyo na palson relihyon!​—Juan 8:31, 32; Apocalipsis 18:2, 4, 5.

14. Akin a makapantultuloy a manakar so ariripen na Dios ed espiritual a liwawa?

¹⁴ Lapud say madibinon panangibangat so ontatalona ed relihyoson lingo, satan so manggawa’d ariripen na Dios a mantultuloy a manakar ed espiritual a liwawa. Diad katuaan to et narerengel da so salita ed benegan da a mankuan: “Saya so dalan, ondalan kayo ed sikato.” (Isaias 30:21) Sasalimbengan met na bangat na Dios so ariripen to manlapud palson panagkatunongan. Sanen “saray palson apostoles” so mamapawala na inkaapag-apag ed kongregasyon ed Corinto, insulat nen apostol Pablo: “Ta say ayura na saray pibabakal mi aliwa ra’n kien na mangaraldalin, balet makapanyari’ra ed arap na Dios a mamagbag na saray malet a fortalezas. Bagbagen mi so kaisipan, tan balang atagey a bengatla ya onalagey ya onsumpa ed kakabatan na Dios, tan itarok min arakep so balang kanonotan ed katotolok nen Cristo.” (2 Corinto 10:4, 5 11:13–15) Saray panagkatunongan a midumaan ed madibinon panangibangat so tatalonaan na simbawa a niiiter tekep na kaumildian ed kongregasyon tan diad panangipulong tayo na maong a balita ed saramay walad paway.​—2 Timoteo 2:24–26.

Mandayew Tekep na Espiritu tan Katuaan

15, 16. Anto so kabaliksan na pangidayew ed si Jehova ed espiritu tan katuaan?

¹⁵ Legan a say panagpulong na Panarian so onaaligwas, say madibinon panangibangat so ontatalona ed pangipapanengneng ed saray maoyamo no panon so pangidayew ed Dios “ed espiritu tan katuaan.” Diad bobon nen Jacob ya asingger ed syudad na Sicar, inkuan nen Jesus ed Samaritanan bii a nayarian to so makapangitarok na danum a makapangiter na maandon bilay. Tutukoyen toray taga Samaria, inyarum to: “Sikayo igalang yo so agyo amta . . . Ingen say oras onsabi, tan natan la, sano saray tua a manangigalang igalang da so Ama dia ed espiritu tan katuaan; ta saray ontan so anapen na Ama a manangigalang ed sikato.” (Juan 4:7-15, 21-23) Kayari to et impakabat nen Jesus so inkasikato bilang say Mesias.

¹⁶ Balet panon tayon dayewen so Dios ed espiritu? Diad pangiyapay na puron maligsan panagdayew a tekep na aro ed Dios a nibase’d suston pikakabat ed Salita to. Sikato so nidayew tayo ed katuaan diad pangipulisay ed saray relihyoson inkatila tan diad panggawa na madibinon linawa to, a singa niparungtal ed marakep a Libron-panaralan a kien nen Jehova.

Ontatalona ed Saray Subok tan ed Mundo

17. Panon mon napaneknekan a say madibinon panangibangat so tinmulong ed ariripen nen Jehova pian arapen iray subok?

¹⁷ Sano saray totoo na Dios so nidunget ed saray subok, naulit-ulit ya ontatalona so madibinon panangibangat. Kunsidaraen pa iya: Diad kagapo na Guerra Mundial II, nen Septyembre 1939, saray ariripen nen Jehova so mankaukolan na nikaduman aralem a pakatalos ed baleg a Libron-panaralan a kien to. Baleg a tulong so artikulo ed The Watchtower na Nobyembre 1, 1939, a malinew ya angiparungtal ed madibinon panangibangat nipaakar ed Kristianon neutralidad. (Juan 17:16) Mipadpara, diad asasakbay iran taon na 1960, saray artikulo ed Watchtower nipaakar ed relatibon panagpasakup ed ginogobiernon “atagtagey a pakauley” so tinmulong ed totoo na Dios ya ontulok ed madibinon panangibangat diad utel na magulon sosyedad.​—Roma 13:1–7; Gawa 5:29.

18. Panon so impanmoria na saray mankuan a Kristiano nen komadua tan komatlo iran siglo K.P. nipaakar ed mabanday a panagligliwaan, tan antoy nitutulong na madibinon panangibangat nipaakar ed satan a bengatla natan?

¹⁸ Say madibinon panangibangat so ontutulong ed sikatayon ontalona ed saray tukso, a singa say pakasagyat pian onsuwawi tayo ed mabanday a panligliwaan. Imanoen so ibabaga na mankuan a Kristiano ed komadua tan komatlo iran siglo na Komon a Panaon tayo. Insulat nen Tertullian: “Anggapo so pibabali tayo, ed panagsalita, panagbantay odino panagdengel, ed inkaambagel na sirko, say andi-baing a panangiparungtal ed teatro, say inkarawal ed arena.” Sakey nin managsulat ed satan a panaon so nantepet: “Anto so gagawaen na sakey a matoor a Kristiano ed sarayan kabandayan, ta ag-anggan nayarin isipen so karelmengan to? Akin a sikato so naliketan ed saray panangiretrato na inkasiblet to?” Anggaman sarayan managsulat so nambilay na pigaran taon kayari na inmunan-siglon Kristianos, kinondena ra so makaderal iran panagligliwaan. Natan, say madibinon panangibangat so mangiiter ed sikatayo na kakabatan ya arawian so mabanday, imoral, tan marawal a panagligliwaan.

19. Panon itayon tutulongan na madibinon panangibangat a natalonaan so mundo?

¹⁹ Say itumbok ed madibinon panangibangat so ontutulong ed sikatayo pian natalonaan a mismo so mundo. On, say panangiyaplika ed bangat na Engranden Instruktor tayo so manggawa ed sikatayon manbiktoria sumpa’d saray mauges ya impluensya na sayan mundo, a mandukdukol ed pakayari nen Satanas. (2 Corinto 4:4; 1 Juan 5:19) Ibabaga na Efeso 2:1-3 a say Dios so amilay ed sikatayo anggaman sikatayo so inatey diad saray impakalukso tan kasalanan sanen sikatayo so nanakar unong ed mananguley na pakayari na dagem. Misadsalamat tayo ed si Jehova lapud say madibinon panangibangat so ontutulong ed sikatayon manalona ed saray minumundon pilalek tan ed espiritun manlalapud kabusol to tan kabusol tayo​—say manunan-manamalikdo, si Satanas a Diablo!

20. Antoran tepet so manepenepeg a kunsideraen?

²⁰ Malinew sirin, a say madibinon panangibangat so matalona ed dakel a paraan. Diad tua, singa imposiblin salambiten ya amin iray impanalona to. Aapektaen to so totoo ed sankamundoan. Balet anto so gagawaen na saya para ed sika? Panon ya aapektaen na madibinon panangibangat so bilay mo?

Anto so Naaralan Mo?

◻ Panon so nayarin panguker ed tuan kakabatan?

◻ Anto so kalkalnan imparungtal na Dios nipaakar ed Genesis 3:15?

◻ Panon ya ontatalona so madibinon panangibangat ed saray espiritual a bengatla?

◻ Anto so kabaliksan na dayewen so Dios ed espiritu tan katuaan?

◻ Panon a tutulongan na madibinon panangibangat iray ariripen nen Jehova a talonaan iray subok tan say mundo?

[Saray litrato ed pahina 10]

Nansiansian matoor si Jesus anggad patey​—say pansugat ed mukor na Bini