Eksperiensiaen Iray Gungguna na Madibinon Panangibangat
“Siak si Jehova a Dios mo, ya angibangat ed sika na nipaakar ed nabang mo.”—ISAIAS 48:17.
1. Panon tayon nagunggunaan no iyaplika tayo so madibinon panangibangat ed kabibilay tayo?
SI Jehova a Dios so makaamta na sankaabigan. Anggapoy siopaman a makalampas ed sikato ed kanonotan, salita, odino gawa. Bilang manamalsa tayo, sikato so makapikabat ed saray pankaukolan tayo tan daakan ton iiter. Peteg a kabat to no panon so panamilin to ed sikatayo. Tan no iyaplika tayo so madibinon panangibangat, sikatayon mismo so nagunggunaan tan naeksperiensia so tuan liket.
2, 3. (a) Panon a saray inmunan totoo na Dios so agunggunaan komon a mismo no sikara so tinmulok ed saray ganggan to? (b) Anto so nagawa no iyaplika tayo so madibinon panangibangat ed kabibilay tayo natan?
2 Ipapatnag na madibinon panangibangat so masimoon a pilalek na Dios a paliisan na ariripen to so kalamidad tan pangayagaan so bilay diad pangunor ed saray ganggan tan prinsipyo to. No komon ta tinmulok iray inmunan totoo na Dios ed sikato, sikara komon so akaeksperiensia na mayaman iran bendisyon, lapud inkuanto ed sikara: “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon. O no komon ta dinengel mo so saray bilin ko! Dia ed ontan say deen mo singa komon sakey a ilog, tan say inkatunogn mo singa komon daluyon na dayat.”—Isaias 48:17, 18.
3 Saray inmunan totoo na Dios so agunggunaan komon no sikaray angimano ed saray ganggan tan panamilin to. Imbes ed pakasagmak na kalamidad ed lima na saray taga Babilonia, sikara komon so akaeksperiensia na kareenan tan inkaaligwas bilang sigpot, aralem, tan magnayon a singa ilog. Nagkalalo ni, saray matunong a gawa ra komon so agnabilang a singa saray daluyon na dayat. Mipadpara, no iyaplika tayo so madibinon panangibangat ed kabibilay tayo, naeksperiensia tayo so dakel a gungguna to. Anto so arum ed saraya?
Pasimbaloen to so Kabibilay
4. Panon a say madibinon panangibangat so mangaapekta ed kabibilay na dakel a totoo?
4 Say madibinon panangibangat so mangugungguna ed dakel a totoo diad pagmaliw a magmaong so kabibilay da. Saraman so mangiyaplika na panamilin nen Jehova so mangikaindan ed “saray gawa na laman,” a singa say malukak a kondukta, panagtalintao, espiritismo, kolkolan, tan imon. Imbes, sikara so mangipatnag na bungay espiritu ya aro, liket, deen, kasungdoan, kaoyamoan, kaabigan, pananisia, kaumildian, tan dangka. (Galacia 5:19-23) Sikara met so manutumbok ed simbawa na Efeso 4:17-25, a papasesegen nen Pablo iray kapananisiaan ya agmanakar a singa gagawaen na saray nasyon, tan ed maapan kalakal da tan ed abilungetan a kanonotan da, a niyarawi ira ed bilay a walad Dios. Ag-iwawanwan na inmawet a kapusoan, saray singa-Kriston indibidual so ‘angipulisay ed daan a personalidad a manederal ed saray panamalingo na kagletan na laman tan napasimbalo ed espiritu na kalakal.’ Sikaray ‘angisulong ed balon personalidad ya agawa unong ed linaway Dios ed tuan inkatunong tan katooran.’
5. Panon a say madibinon panangibangat so mangapekta ed kurang na totoo?
5 Say maabig a gungguna ed pangiyaplika ed madibinon panangibangat et say pangipanengneng na satan ed sikatayo no panon so panakar a kaiba so Dios. No sikatayo so mikurang ed si Jehova, a singa ginawa nen Noe, et natumbok tayo so kurso na bilay ya indatak na Engranden Instruktor tayo. (Genesis 6:9; Isaias 30:20, 21) Saray totoo ed nasyones so ‘manaakar ed maapan kalakal da,’ a singa inkuan nen Pablo. Tan agaylan magmaliw a kaapaan iray arum a sulsulat na saraman a kanonotan! Diad pangiimano ed saray sulsulat na arum ed sakey a pader ed Pompeii, insulat a mismo na sakey a manag-imaton: “Satan so makapakelaw, O pader, a satan so agni nagba ed belat na agaylan karakel na andi-kabaliksan iran sulsulat.” Balet anggapo so kaapaan ed “panangibangat nen Jehova” tan ed kimey a panangipulong ed Panarian a manggagawa ed satan a posibli. (Gawa 13:12) Diad panamegley na satan a kimey, saray totoon manangaro-ed-katuaan so atulongan ya onkiwas a makabat. Sikara so nababangatan ed no panon so itunda ran manakar ed makasalanan a kurang da, diad agpikakabat ed saray gagala na Dios. Sikaralay ag-abilungetan ed kanonotan, nisay sikara so papakiwasen na saray inmawet a kapusoan a manaanap na maapa iran kalat.
6. Anton siglaotan so wala ed baetan na katutulok tayo ed madibinon panangibangat tan ed liket tayo?
6 Say madibinon panangibangat so mangungguna met ed sikatayo diad paraan ya ikakabat na saya ed sikatayo si Jehova tan saray pidedeneng to. Say ontan a kakabatan so mangiyapit ed sikatayo ed Dios, mamadaak na aro tayo ed sikato, tan mamadaak na pilalek tayo diad pangunor ed sikato. Ibabaga na 1 Juan 5:3: “Ta saya so aro na Dios, a sumpalen tayo so saray gangan to; tan saray gangan to aliwa ran ambelat.” Sikatayo met so ontulok ed saray ganggan nen Jesus lapud kabat tayo a say panangibangat to et nanlapud Dios. (Juan 7:16-18). Say ontan a katutulok so manalimbeng ed sikatayo manlapud espiritual a pakapasakit tan mangiyalibansa na liket tayo.
Sakey a Peteg a Gagala ed Bilay
7, 8. (a) Panon tayon natalosan so Salmo 90:12? (b) Panon tayon nitarok so puson makabat?
7 Say panangibangat nen Jehova so makagungguna diad pangipanengneng ed sikatayo ed no panon so pangusar tayo ed bilay tayo a walaan na gagala. Diad tua, ipapanengneng ed sikatayo na madibinon panangibangat no panon so pamilang tayo ed saray agew ed sakey a nikadkaduman paraan. Say 70 a taon a dukey na panbilay so mangisisipan na ngalngalin 25,550 ya agew ed ami-amin. Say toon manedad na 50 so akausar la na 18,250 ya agew, tan say natitilak a 7,300 ya iilaloan ton agew et singa dagdaiset lan tuloy. Nayarin nagkalalon naapresya to natan no akin a si propetan Moises so nanpikasi ed Dios diad Salmo 90:12: “Ibangat mo kami a mamilang na saray agew mi, pian makala kami na sakey a puso na kakabatan.” Anto so labay ya ibaga nen Moises ed satan?
8 Aglabay ya ibaga nen Moises a say Dios so mangipaamta ed eksakton bilang na saray agew a pambilay na balang Israelita. Unong ed Salmo 90, ed bersikulo 9 tan 10, satan a Hebreon propeta so akabidbir a say dukey na pambilay et nayarin 70 odino 80—peteg ya antiktikey. Kanian saray salita ed Salmo 90:12 so mapatpatnag a sipipikasin imbalikas nen Moises so pilalek ton ipanengneng, odino ibangat nen Jehova ed sikato tan ed totoo To a mangagamil na kakabatan diad pamabli ed ‘saray agew na taon da’ tan usaren iratan ed paraan ya abobonan na Dios. Bueno, komusta itayo? Kasin aapresiaen tayo so balang mablin agew? Kasin sikatayo so mangipapapuso ed kakabatan diad pangunaet a pangusar ed kada agew diad makanan paraan a mangigloria ed Engranden Managbangat tayo, si Jehova a Dios? Say madibinon panangibangat so ontulong ed sikatayon manggawa ed satan.
9. Anto so nailaloan no naaralan tayo so panbilang ed saray agew tayo ed kidayewan nen Jehova?
9 No naaralan tayon bilangen iray agew tayo ed kigloriaan nen Jehova, nayarian tayon mantultuloy a bilangen so agew tayo ya anggapoy tunda, lapud say madibinon panangibangat so mangipapanabang na kakabatan para’d maandon bilay. Inkuan nen Jesus, “Saya et kabaliksan to so bilay ya andi-anggaan, say pangala ra na kakabatan ed sika, say alenleneg a tuan Dios, tan ed saman so imbakim, salanti si Jesu-Kristo.” (Juan 17:3, NW) Siempre, no nagamoran tayon amin so walan minumundon kakabatan, satan so agmakapangitarok ed sikatayo na maandon bilay. Balet say bilay ya andi-anggaan so nakayarian tayo no nagamoran tan iyaplika tayo so suston kakabatan ed duaran sankaimportantian a persona ed sankatalbaan tan tuan mangagamil na pananisia.
10. Anto so imbaga na sakey ya encyclopedia nipaakar ed edukasyon, tan panon iyan nipareng ed saray gungguna na madibinon panangibangat?
10 Anggan panon lay kabayag tayon manbibilay, komon ta nonoten tayo iyan makatantandan gungguna na madibinon panangibangat: Satan so mangiter na peteg a gagala ed bilay ed saraman so mangiyaplika ed satan. Ibabaga na The World Book Encyclopedia: “Say edukasyon so ontulong ed totoon magmaliw a makanan membro na sosyedad. Ontulong met itan ed sikaran manibukel na apresasyon ed kaugalian a tawir da tan nagkalalon manbilay a makapenek.” Say madibinon panangibangat so ontutulong ed sikatayon napenek a manbilay. Satan so manibukel ed sikatayo na aralem ya apresasyon ed espiritual a tawir tayo bilang totoo na Dios. Tan satan so maseguron manggawa ed sikatayon makanan membro na sosyedad, lapud satan so ontulong ed sikatayon manggawa na makanan betang diad pangapet ed saray pankaukolan na totoo ed sankadalinan. Akin a nibagan ontan?
Sankamundoan a Programa na Panangibangat
11. Panon ya inpabitar nen Thomas Jefferson so pankaukolan na suston edukasyon?
11 Aliwan singa arum a programa ed panamilin, say madibinon panangibangat so mangakapet ed saray pankaukolan na totoo ed edukasyon. Say pankaukolan ed pangibangat ed totoo so naimano nen Thomas Jefferson, a komatlon presidente na Estados Unidos. Diad sulat ya Agosto 13, 1786, ed si George Wythe, sakey a kaaro tan kaiban pumiperma ed Deklarasyon na Independensia, insulat nen Jefferson: “Isipen kon say sankaimportantian a ley ed interon kodigo (code) tayo et say pangilaknab na kakabatan ed limog na totoo. Anggapo so arum a seguradon pundasyon a nausar, para’d pangamper ed kawayangan tan liket. . . . Italindeg, pinablik a sir, so krusada sumpad inka-ignorante; iletneg tan paaligwasen so ley para’d pangibangat ed karaklan a totoo. Abuloyan a naamtaan na saray kabaleyan ta . . . a say buis ya ibayar para’d [edukasyon] et melag labat a tuloy no ipareng ed ibayar ed saray arari, papari, tan saray dederlengen a nitandoro ed limog tayo no paulyanan tayoray totoo ed inka-ignorante.”
12. Akin a nibaga a say madibinon panangibangat so sankamatalonaan tan makagunggunan programa para’d sankamundoan ya edukasyon?
12 Duma manlapud panamaulyan ed saray totoo ed inka-ignorante, say panangibangat nen Jehova so mangitatarok na sankaabigan a programa para’d sankagloboan ya edukasyon ed kagunggunaan da. Legan a say Guerra Mundial II so siansia nin mangaapekta ed apalabas lan 50 a taon, say Committee on Educational Reconstruction na E.U. so akaimano ed maganat a pankaukolan para’d “sankagloboan ya edukasyon.” Satan a pankaukolan so siansia nin niwawala, balet say madibinon panangibangat lambengat so mogmon matalonan programa para’d sankagloboan ya edukasyon. Satan met so makagunggunan tuloy lapud satan so mangipabangon ed saray totoo manlapud kaandi-ilalo, mamabiskeg ed sikara ed moral tan espiritual, mangisalba ed sikara manlapud kinon tan panangidumaduma na mundo, tan manginabang na pikakabat para’d maandon bilay. Nagkalalo ed amin, sayan programa so mangugungguna ed totoo ed inerman diad pangibabangat ed sikara ed no panon so panlingkor ed si Jehova a Dios.
13. Panon a say Isaias 2:2-4 so nasusumpal natan?
13 Saray gungguna ed madibinon panangibangat so pangagayagaan na dakel natan diad pagmaliw dan ariripen na Dios. Sikara so sinononot ed espiritual a pankaukolan da tan kabat dan tuloy a say agew nen Jehova so asingger la. (Mateo 5:3; 1 Tesalonica 5:1-6) Natan la, “nagawa dia ed saray kaonoran ya agew,” sarayan totoo ed amin a nasyones so ontatatdang ed palandey nen Jehova, say puron panagdayew ed sikato. Satan so malet a nileletneg tan nitatandoro ed amin a panagdayew a misuniyan ed linawa na Dios. (Isaias 2:2-4) No sakey kan dedikadon Tasi nen Jehova, agka ta maliket a kaiba na lawas-ondaraak ya ulop a mangidadayew ed sikato tan nagugunggunaan manlapud madibinon panangibangat? Agaylan makapakelaw so pagmaliw a kaiba na saraman so sitatalonan onkekelyaw: “Idayew si Jehova sikayon totoo!”—Salmo 150:6.
Makagunggunan Epekto ed Espiritu Tayo
14. Diad anton gungguna so panumbok ed simbawa nen Pablo ed 1 Corinto 14:20?
14 Sakey ed saray dakel a gungguna na madibinon panangibangat et say maabig ya epekto to ed panagnonot tan espiritu tayo. Satan so managdag ed sikatayon nonoten so matunong, masimpit, masanto, tan gagalangen iran bengatla. (Filipos 4:8) Say panangibangat nen Jehova so ontulong ed sikatayon manumbok ed simbawa nen Pablo: “Manugawugawan kayo ed kaugsan, et matatken kayo ed isip.” (1 Corinto 14:20) No iyaplika tayo ’yan simbawa, agtayo anapen so pikakabat ed inkauges. Insulat met nen Pablo: “Saray amin a kapaitan, tan sanok, tan ingongot, tan ingal, tan mauges a panagsalita, naekal komon ed sikayo, pati amin a mauges a kanonotan.” (Efeso 4:31) Say itumbok ed ontan a simbawa so ontulong ed sikatayo a paliisan so imoralidad tan arum a graben kasalanan. Bangta saya so magmaliw a makagungguna ed pisikal tan mental, satan so nagkalalon mangitarok ed sikatayo na gayaga ed pakaamta a sikatayo so mamapaliket ed Dios.
15. Anto so ontulong ed sikatayon mansiansian masanto ed kanonotan?
15 No sikatayo so mansiansian masanto ed panagnonot, say sakey a tulong et say ipaliis ed ‘mauges a pipiolop a maneral ed maong ya ugali.’ (1 Corinto 15:33) Bilang Kristianos, sikatayo so nepeg ya agmiulop ed saray milalawanan, mikakalugoran, tan arum nin managgaway-mauges. Makatunongan, sirin, a sikatayo so nepeg ya agmiulop ed saratan a totoo diad panamegley na panbasa nipaakar ed sikara para’d panliket ed sekso odino panbantay ed sikara ed telebisyon odino ed saray pelikula. Say puso so manamalikdo, magmainomay a manpilalek para’d mauges iran bengatla, tan nayarin natukson manggawa ed saratan. (Jeremias 17:9) Paliisan tayo sirin so ontan iran tukso diad pangunor ed madibinon panangibangat. Satan so mangapekta ed panagnonot na ‘saray manangaro ed si Jehova’ diad ontan a makagunggunan laknab a sikara so ‘mangula ed mauges.’—Salmo 97:10.
16. Panon a say panangibangat na Dios so makaapekta ed espiritun ipapatnag tayo?
16 Inkuan nen Pablo ed kaiba ton kumikimey a Timoteo: “Say Katawan so wala komon ed espiritum. Gracia komon so wala ed sikayo.” (2 Timoteo 4:22) Pilalek na apostol a say Dios, diad panamegley na Katawan a Jesu-Kristo, so mangabobon ed manamakiwas ya espiritu nen Timoteo tan arum a Kristianos. Say panangibangat na Dios so ontutulong ed sikatayon mangipatnag na maaro, mapangasi, maumildi ya espiritu. (Colosas 3:9-14) Tan agaylan satan so duma manlapud dakel ed sarayan kaunoran ya agew! Sikara so mapangta, malamang, anggapo so aro ra a nianakan, agmatoor ed paknaan, mayu-uges, maaro ed likeliket, tan andian na tuan maridios a debosyon. (2 Timoteo 3:1-5) Anggaman ontan, legan ya itutultuloy tayon iyaplika iray gungguna na madibinon panangibangat ed kabibilay tayo, ipapatnag tayo so espiritu a mamabli ed sikatayo ed Dios tan ed kaparan totoo.
Makagungguna ed Saray Relasyon na Katooan
17. Akin a say mapaabeban pikokoopera so importanti?
17 Say panangibangat nen Jehova so ontutulong ed sikatayo a mangimano ed saray gungguna na mapaabeban pikokoopera ed kapara iran managdayew. (Salmo 138:6) Aliwan singa saray dakel a totoo natan, agtayo susumlangen so matunong iran prinsipyo noagta mabulos a mipakna. Alimbawa, dakel so maabig a resulta lapud saray aturon manangasikaso so lukas ed paknaan legan na saray miting na mamatatken. Sarayan lalaki so makapansalitan kalmado ed pankaabigan na katuaan, bangta agmangiyaabuloy ed emosyon a manalona ed lohiko odino pansengegan na agpankakasakey. Amin a membro na kongregsyon so nagunggunaan manlapud espiritu na pankakasakey a naeksperiensia tayo no amin tayo so mansiansian mangiyaplika ed madibinon panangibangat.—Salmo 133:1-3.
18. Say madibinon panangibangat so ontulong ed sikatayon nawalaan na anton panmoria ed kaparan mananisia?
18 Say madibinon panangibangat so makagungguna met diad panulong ed sikatayo a nawalaan na suston panmoria ed kaparan mananisia. Inkuan nen Jesus: “Angapo so too a makadago ed siak, likod no say Ama ya angibaki ed siak sikato so yasinger to.” (Juan 6:44) Nagkalalo, nanlapulad 1919, si Jehova so walan nanggawad ariripen ton mangiyabawag na saray panangukom to, tan say sistema na mundo nen Satanas so niyegyeg tan minayegmeg na sayan sankagloboan a pasakbay. Ontan met, saray matakot-ed-Dios a katooan—“saray mabli a bengatla”—so intarok na Dios pian isian so inkasikara manlapud saray nasyon tan mibiang ed alanaan iran Kristiano diad pamano na gloria ed abung nen Jehova a panagdayewan. (Aggeo 2:7) Peteg, nepeg tayon moriaen iratan a pinabli ya intarok na Dios bilang inararon kalimog.
19. Anto so iparungtal na panangibangat na Dios nipaakar ed panresolbi ed personal iran kairapan ed kaparan Kristianos?
19 Lapud amin tayo so ag-ayadyari, siempre, say bilay so aglawas andian na saray problema. Sanen si Pablo so pagani-gani lan onalis ed komaduan misioneron impanbaroy to, si Bernabe so determinadon mangipila ed si Marcos. Si Pablo so ag-inmabuloy lapud si Marcos so “akisian ed sikara nanlapu ed Pamfilia, tan ag tinmombok ed sikara ed saman a gawa.” Kanian, “agawa ed sikara so baleg a sangsangan.” Inpila nen Bernabe si Marcos ed Chipre, bangta inpila nen Pablo si Silas ed Siria tan Cilicia. (Gawa 15:36-41) Saginonor, sayan sanok so mapatnag ya apakepa, lapud si Marcos so kaiba nen Pablo ed Roma, tan say apostol so nansalita na maabig nipaakar ed sikato. (Colosas 4:10) Say sakey a gungguna na madibinon panangibangat et say pangipanengneng to’d sikatayo no panon so panresolbi ed saray personal ya agpantatalosan ed baetan na Kristianos diad panumbok ed ontan a simbawa a singa imbaga nen Jesus ed Mateo 5:23, 24 tan Mateo 18:15-17.
Makagungguna tan Matalona ed Kapiganman
20, 21. Say panangunsidera tayo ed madibinon panangibangat so nepeg a mamakiwas ed sikatayon mangawa na anto?
20 Anggan diad antikey a panangunsidera tayo ed arum a gungguna tan itatalona na madibinon panangibangat, andi-duaruwan amin tayo so makaiimano ed pankaukolan ed pansiansian pangiyaplika’d satan ed kabibilay tayo. Tekep na sipipikasin espiritu, sirin, komon ta amin tayo so mantultuloy a manaral manlapud Engranden Instruktor tayo. Agla mabayag, say madibinon pangibangat so ontalona ya agni agawan balot nen saman. Satan so ontalona sano saray makabat na sayan mundo so mangangga la ed ando lan ando. (Ipareng so 1 Corinto 1:19.) Nagkalalo ni, legan a minilyon so makakaaral tan manggagawa ed linawa na Dios, say pikakabat ed si Jehova so mamano ed dalin a singa saray danum sakbungan da so kadayatan. (Isaias 11:9) Agaylan saya so mangunggunan tuloy ed matulok a katooan tan mangiyalangon ed si Jehova bilang say Soberano ed Uniberso!
21 Say bangat nen Jehova so lawas makagungguna tan ontalona. Kasin sikayo so mantultuloy a nagunggunaan manlapud satan bilang sakey a magunaet ya estudyante na baleg a Libron-panagaralan na Dios? Kasin sikayo so manbibilay a mitukoyan ed Biblia tan mangipapanabang ed saray katuaan to ed arum? No ontan, sikayo so makapanilalo ed arapen ed pakanengneng ed kompleton italona na madibinon panangibangat, diad kigloriaan na Engranden Instruktor tayo, say Soberanon Katawan a Jehova.
Anto so Naaralan Yo?
◻ Anton epekto na madibinon panangibangat so niwala ed kabibilay tayo?
◻ Panon a say panangibangat nen Jehova so makakakapet ed edukasyonal iran kaukolan?
◻ Anton makagunggunan epekto na madibinon panangibangat so niwala ed panagnonot tan walna tayo?
◻ Panon a napapaneknekan a say panangibangat na Dios so makagungguna no nipaakar ed siglaotan na katooan?
[Litrato ed pahina 15]
Say madibinon panangibangat so mangipapanengneng ed sikatayo ed no panon so pikurang ed Dios, a singa ed ginawa nen Noe
[Litrato ed pahina 17]
Saray totoo ed amin a nasyon so ontatatdang ed palandey nen Jehova