Say Parlyamento na Saray Relihyon ed Mundo—Kasin Ontalona?
NILASUS a relihyoson papangulo so nandaragup ed komaduan Parlyamento na saray Relihyon ed Mundo ya agawa ed Chicago, Illinois, E.U.A, diad tiagew na 1993. Say Budista, Kakristianoan, Hinduismo, Judaismo, tan Islam et nirepresentan amin. Saray manananem tan managdayew ed diosa so nirepresenta met. Siningbat da so betang da ed pangitarok na anggaan na bakal. Say tserman na parlyamento so angaksobi a “duaran kakatlo na manuna iran bakalan ed mundo natan so walaan na relihyoson sengegan.”
Sanlasus Taon ed Apalabas
Kasin say parlyamento so tinmalona? Imanoen pa so agawa ed apalabas a sanlasus a taon ed inmunan Parlyamento na saray Relihyon ed Mundo. Satan met so agawa ed Chicago, diad tiagew na 1893, tan masulok a 40 a relihyon so nirepresenta. Say Konsilyo para’d sakey a Parlyamento na saray Relihyon ed Mundo so mangaksobi a saramay inmatendi nen 1893 so “anisia a satan so sankaunaan a serye na internasyonal a pansasakmok ed pananisia iran pandaragup ya ontulong ed pantatalosan, deen tan iyaaligwas. Ag-agawa so ontan. Say relihyoson ag-panpapalugaran tan karawalan so nagmaliw a kabiangan na saray bakal ed apalabas a 100 a taon, tan mantultuloy ya anggad natan.” Akin a sinmaew? Lapud say interon ideya na pansasamok na pananisia so ag-abobonan na Dios. Ibabaga na Biblia: “Ag kayo mipapako ed saray agmananisia.”—2 Corinto 6:14-17.
Matukotukoy, say Setyembre 1893 a paway na Zion’s Watch Tower so angipabitar ed kakulangan na Makasulatan a pananuporta ed Parlyamento na saray Relihyon ed Mundo sanen inkuanto, ya anggapo so pakaromogan na panludlurey: “Saray arkeolohista so nankotkot na dakel a makapakelkelaw a niukit iran pitek na cylinder manlapud saray deral na Babilonia tan arum niran kadaanan a syudades, balet wala niray agnaromog . . . Agda aromog so antokaman a manutukoy nipaakar ed si Moises tan Josue bilang natatawag a ‘Parlyamento na Saray Relihyon,’ na saray Moabita tan Amonitas, tan Edomitas . . . Ag da aromog so antokaman a manutukoy ed mabiskeg a masiken a Samuel a nibaki ed Gath tan Ekron pian manugyop na delegasyon na saserdote nen Dagon pian ontatdang ed Siloh tan mangawa na komperensya a kaiba so saray saserdote nen Jehova . . . Ag da aromog so antokaman a manutukoy ed abalkesay-katat ya Elias ya angiparungtal na sakey a ‘kongreso’ a kaiba so saray saserdote nen Baal tan si Molek para’d sakey simban diskusyon na saray prinsipyo ed pananisia ra, tekep na panmoria ed pangiyalibansa na namparan panrespeto ed balang relihyon na sananey.”
Say Panarian na Dios—Say Mogmon Ilalo
Say Parlyamento na saray Relihyon na Mundo so ag-ontalona. Uusaren na saray dyaryo tan delegado so termino a singa say “chaos,” “turmoil,” tan “bedlam” a misiglaot ed parlyamento. Unong ed sakey a report, anggan saray pulis so napipibali ed pamareen na duaran gulo lapud mapulitikan pangaapag-apag. Diad sakey a dokumento nen 1952, inlista na parlyamento so sakey ed saray gagala to: “Pian mangilenteg na sakey a permanentin Parlyamento na Mundo na saray Relihyon a mikimey ed NASYONES UNIDAS ed pakadampot na kareenan ed mundo tan pantatalosan ed limog na amin a totoo.” Diad kasuniyan, inkuan nen Jesus a say Panarian to so agkabiangan na sayan mundo. Idadanet na Biblia a say Panarian na Dios so mogmon solusyon ed saray problema na katooan.—Daniel 2:44; Juan 18:36.