Kasin Nanonotan Yo?

Aromogan yo ta so agano nin paway na Say Panag-Bantayan a walaay praktikal a kablian ed sikayo? Sirin akin ya agsuboken so memorya yo ed onggendan a tepetepet:

◻ Anton leksion so naaralan tayo manlapud inkaplag na saray Ammonita? (Sofonias 2:9, 10)

Ag-ibabaliwala nen Jehova so pangibales na busol ed kaabigan, tan diad nigeter a panaon to, sikatoy onkiwas lamet, a singa ginawa to ed inmunan panaon. (Ikompara so Salmo 2:6-12.)​—12/15, pahina 10.

◻ Diad anton duaran manunan dalan a walaan na kareenan iray Kristiano?

Unona, walaan ira na “kareenan ed Dios diad panamegley na Katawan [dan] Jesu-Kristo.” (Roma 5:1) Komadua, walaan ira na kareenan ed limog da diad pamabayubo na “say kakabatan a manlalapud tagey,” a “manuna ed amin et masimpit, insan mareen.” (Santiago 3:17)​—1/1, pahina 11.

◻ Antoray pigaran bengatla a niyaaliling so Salitay Dios, tan panon a saya so makatulong ed sikatayo?

Niyaaliling so Salita na Dios ed makapabunigas a gatas, anawet a tagano, makaparepresko tan makalinis a danum, sakey ya espiho, tan sakey a makdem a kampilan. Say pakatalos ed kabaliksan na sarayan termino so ontutulong ed sakey a ministro pian nausar a sioonsiano so Biblia.​—w-E 1/1, pahina 29.

◻ Anto so nepeg ya itulong ed sikatayon gawaen na balansin sekular ya edukasyon?

Pian makapanbasan maong, pian makapansulat na malinew, pian ontundas ed mental tan moral, tan pian makagamor na praktikal a panagsanay a nakaukolan ed agew-agew a panagbilay tan epektibon sagradon serbisyo.​—2/1, pahina 10.

◻ Anton makanan leksion nipaakar ed edukasyon so naaralan tayo manlapud si Jesus?

Say edukasyon so nepeg ya usaren, aliwan diad kigloriaan tayo, noag ingen pian mangitarok na dayew ed sankabalgan ya Edukador, si Jehova a Dios. (Juan 7:18)​—2/1, pahina 10.

◻ Anto so Panarian na Dios?

Say Panarian so sakey a madibinon niletneg a mangatatawen a gobiernon mangitarok ed linawa na Dios a mangekal ed saray epekto na kasalanan tan patey tan mangipawil ed matunong iran kipapasen ed dalin. (Daniel 2:44; Apocalipsis 11:15; 12:10)​—2/1, pahina 16.

◻ Panon ya itatarya na Biblia so nakakaukolan ya edukasyon parad pangitarok ed karawalan ed sakey a permanentin panganggaan?

Diad panamegley na Salita to, say Biblia, ibabangat nen Jehova iray totoo a magmaliw a maaro’d-kareenan tan matunong. (Isaias 48:17, 18) Walaan na pakayari so Salita na Dios a manabi tan manenyeg ed puso na sakey, a manguman ed panag-isip tan walna to. (Hebreos 4:12)​—2/15, pahina 6.

◻ Diad anton dalan a nibagan say propesiya na Isaias kapitulo 35 so walaan na taloran kasumpalan?

Awalaan na inmunan kasumpalan so propesiya nen Isaias sanen pinmawil iray Judio manlapud inkakautibo ed Babilonia nen 537 K.K.P. Walaan itan na mantultuloy ya espiritual a kasumpalan natan nanlapulad inkibulos na espiritual ya Israel manlapud inkakautibo ed Babilonia a Baleg. Tan nawalaan itan na sakey a komatlon kasumpalan a walaay kipaakaran ed Makasulatan a panamaseguro ed literal a paraiso iran kipapasen ed dalin. (Salmo 37:10, 11; Apocalipsis 21:4, 5)​—2/15, pahina 17.

◻ Panon a say personal ya interes na Dios ed totoo so nidemostra diad saray milagron ginawa na say Anak to, si Jesus?

Lapud si Jesus so “agmakagawa na anggan sakey a bengatla ed inkasikaton dili, noagta no anto lambengat so nanenengneng ton gagawaen na Ama,” say panangabagey to so mangiyiilustra ed maaron kapagaan nen Jehova parad balang sakey ed ariripen to. (Juan 5:19)​—3/1, pahina 5.

◻ Anto so kabaliksan na balikas nen Jesus a “pakanodnonotan iran pantion” ya inusar diad Juan 5:28, 29?

Say Griegon salitan mne·meiʹon (pakanodnonotan a pantion) a nausar dia so mangisusuheri a nanodnonotan nen Jehova so rekord na too ya inatey, pati say atawir ton ugali tan kompleton memorya to. Saya so mangiiter na mabiskeg a prueban say Dios et mangiyaansakit ed totoo diad indibidual a paraan!​—3/1, pahina 6.

◻ Anton manamasakbay a mensahe ed propesiya nen Sofonias so walaan na praktikal a tulong ed sikatayo?

Aliwan natan so panaon pian abuloyan iray panduaruwa ya onlamot ed kapusoan tayo tan ibaliwala ed kaisipan tayo so isabi agew nen Jehova. Ontan met, kaukolan a magmaliw itayon alisto sumpad manamakapuy ya epekto na inkaandi-interes. (Sofonias 1:12, 13; 3:8)​—3/1, pahina 17.

◻ Akin a mangiprepresenta na sakey ya angat so katooran ed Dios?

Lapud say katooran so misusumlangan ed sinisiblet iran tendensyan atawir tayo ed atateng tayo. (Genesis 8:21; Roma 7:19) Nagkalalon importanti, si Satanas tan saray demonyo to so determinadon manggawa ed sikatayon agmatoor ed Dios. (Efeso 6:12; 1 Pedro 5:8)​—3/15, pahina 10.

◻ Diad anton apatiran lawak a nepeg tayon abeten so angat na katooran, tan anto so ontulong ed sikatayon manggawa ed satan?

Saray apatiran lawak so katooran ed si Jehova, ed organisasyon to, ed say kongregasyon, tan ed asawa tayo. Sakey a katulongan et say pakatalos a say panangabet ed angat na katooran so maapit a nisisiglaot ed kiyalangon na inkasoberano nen Jehova.​—3/15, pahina 20.

◻ Anto so naaralan tayo manlapud eksperiensia nen David ed panasalin ipawil so kaban na sipanan ed Jerusalem? (2 Samuel 6:2-7)

Imbaliwala nen David iray bilin ya inter nen Jehova nipaakar ed panangawit ed Kaban, tan saya so angitarok na kalamidad. Say leksion et agtayo nepeg a tetelen si Jehova ed saray probleman resulta sano ibaliwala tayo so malinew a bilibilin to. (Uliran 19:3)​—4/1, pahina 17.