Say Koma-101 A Klase na Gilead​—Maseseg ed Maabig Iran Gawa

SAY Manamalsa tayo, si Jehova a Dios, so maseseg ed maabig iran gawa, tan ontan met ed Anak to, si Jesu-Kristo. Bilang panuliranan tayo, impanengneng nen Jesus so seseg diad impanumpal ed inter-Dios ya asainmin to, a lalaktipen toy impangiter to’d “inkasikato ya insalat ed sikatayo pian . . . linisan to so sakey a baley a nipaakar ed kien to’n dili, mapaga [maseseg, NW] ed saray maabig a gawa.” (Tito 2:14) Saray 48 membro na koma-101 a klase na Watchtower Bible School of Gilead so maseguron angipanengneng la na seseg da ed maabig iran gawa. Agawa so impangraduar na sarayan misionero nen Setyembre 7, 1996, ed Watchtower Educational Center diad Patterson, New York.

Praktikal a Simbawa Pian Mansiansian Maseseg

Say tsirman na programa et si Carey Barber, membro na Mananguley ya Ulop, a masulok a 70 taon la ed sigpot-panaon a panagministro. Diad manangilukas a parti to, impaimano nen Brother Barber so panagpulong tan panagbangat a kimey nen Jesus, a say “silew na mundo.” (Juan 8:12) Impabitar to ya agsinulo nen Jesus itan a magalang a betang noagta pinaseseg toray babangatan ton isindag da met so liwawa ra. (Mateo 5:14-16) Sayan pribilihyo ed serbisyo so mangaarum na kabaliksan ed bilay na Kristiano tan mangipapasakbat na ambetbelat a responsibilidad ed amin na saraman so ‘manaakar a singa anak na liwawa.’​—Efeso 5:8.

Kayari na saman a manangilukas a parti, si Don Adams na Executive Offices ed hedkuarter na Brooklyn so inparungtal. Impaliwawa to so teman “Onaabante, Aliwan pasener.” Impaimano nen Brother Adams so mismon say Gilead School tan saray gagala to​—panangilaknab na panangipulong na maong a balita ed biek taew a daldalin. Sinaglawi to so aligwas na organisasyon na Dios, ya angipalapag la na literatura na Biblia ed sankamundoan diad masulok a 300 a lenguahe. Say libron Pikakabat a Mangitonton ed Andi-Anggaan a Bilay, ya impalapag nen 1995, so niwala la ed 111 a lenguahe tan niyeskedyul ya iprinta ed dakel nin lenguahe. Satan so mausausar diad pananulong ed saray balon babangatan nen Jesus pian nasabi so punto na dedikasyon tan bautismo ed loob lambengat na pigaran bulan. Kanian saray balon misionero so nawalaan na sankabaloan iran katulongan ed panagaral na Biblia ed kimey da.

Tinmumbok, si Lyman Swingle, membro na Mananguley ya Ulop, so angipaliwawa ed teman “Mansiansian Mangisaklang ed si Jehova na Sagradon Serbisyo Yo,” a nibase ed Apocalipsis 7:15. Lapud si Jehova a mismo so maliket a Dios, mamapaliket ed sakey so panaglingkor ed sikaton tuloytuloy. (1 Timoteo 1:11) Bilang resulta na sayan magayagan serbisyo, sakey a baleg ya ulop na saray indibidual a manlalapud amin a parti na dalin so ondadagon mandadayew ed sikato. Diad loob na saray taon, saraman so nipasal la’d Gilead School so akatulong na dakel ed saraya pian nawalaan na suston pikakabat ed katuaan. Walaan itayo sirin na katunongan a sisiaen a si Jehova so mantultuloy a mamendisyon ed saraman so nibabaki natan pian mantipon na dakel nin membro na say ondarakel a baleg ya ulop.

“Panangisindag ed Gayaga nen Jehova” so teman impabitar nen Daniel Sydlik, membro met na Mananguley ya Ulop. Impanengneng to ya amin ed ariripen na Dios, pati saray balon misionero, so walaan na pribilihyon bangatay totoo nipaakar ed dalan na andi-anggaan a bilay tan say dalan a naanamot a maong so bilay natan. Say “panagbangat,” insalaysay nen Brother Sydlik, “so sakey a dilin-makatumang a propesyon. Satan so nipapatnag ed kalupaan na totoon manbabangat tan ed kalupaan na totoon manaaral.” (Salmo 16:8-11) Inaon to so inkuan na sakey a misionero ed Estonia, “Walaan itayo na sankaimportantian a mensahe ed interon dalin, tan say kalupaan tayo so mangipapanengneng ed satan.” Say itsuray lupa tayo so nayarin mamatalineng tan managyat na interes. Labay ya amtaen na totoo no anto so mamapaliket ed ariripen nen Jehova. “Kanian asikasoen yo so itsuray lupa yo,” so simbawa nen Brother Sydlik. “Panggagayagaan na totoo so pakanengneng ed maliket a totoo.”

Si Ulysses Glass, ya akibiang ed impanbangat ed saray estudyante na Gilead nanlapulad koma-12 klase nen 1949, so nanpaliwawa ed dumerengel diad teman “Tekep na anos, Bantayan Iray Kamarerwa Yo.” Anto so anos? Ipapasabi toy kanonotan a panalagar a kalmado parad sakey a bengatla, panangipatnag na tepel sano papasyodoten odino sesesgaen. Say maanos a too so mansiansian kalmado; say agmakankaanos so manapurasta tan maingongot. “Isipen na dakel a say inkaanos so pakapatnagan na kakapuyan odino agmakadesisyon,” inkuan nen Brother Glass, balet “parad si Jehova satan so pakapatnagan na biskeg tan determinasyon.” (Uliran 16:32) Antoray tumang na anos? “Say inkaanos diad bektan panpasnok so mangipaliis ed sika ed nilasus ya agew na pirmin ermen,” kuan na sakey ya uliran na Intsik. “Paaligwasen na inkaanos so personalidad na sakey,” inkomento nen Brother Glass. “Bilang resulta, permanentin nababarnisan to so arum a maabig iran kualidad. Gawaen ton kalikaliktan so pananisia, manbayag so kareenan, tan agnatenyeg so aro.”

“Sakey a pribilihyo so pakaawat na asainmin manlapud si Jehova a Dios diad panamegley na organisasyon to,” insalaysay nen Mark Noumair, nanlingkor bilang sakey misionero ed Kenya ed loob na 11 a taon tan natan et sakey lan instruktor na Gilead. Legan ya ipapaliwawa to so teman “No Andian Kayo na Pananisia, Agkayo Makapansungdo,” impaimano nen Brother Noumair so alimbawa nen Arin Acaz na Juda. Pinaseguroan nen Isaias so ari ed pananulong nen Jehova ed asainmin to, balet siansian agnanmatalek si Acaz ed Sikato. (Isaias 7:2-9) Insan impabitar nen Brother Noumair a saray misionero​—on, amin tayo​—so nakakaukolan a nawalaay pananisia ed si Jehova pian makapansungdo ed teokratiko iran asainmin da. Saray partikular ya angat ed panmisioneron asainmin so mankakaukolan na mabiskeg a pananisia. “Lawas nonoten ya anggapoy ayadyarin situasyon ed sayan sistema na bengabengatla,” inkuan nen Brother Noumair.

Saray Eksperiensian Mamaseseg na Seseg ed Aktibidad

Legan na paneeskuela ra ed Gilead, kada sampot simba saray estudyante et mangipapanaon ed publikon ministeryo, a satan met lanlamang so manunaan a panpagaan da ed saray panmisioneron asainmin da. Si Wallace Liverance, membro na pakuldad na Gilead, so anginterbio ed 15 estudyante, ya angisalaysay ed saray eskperiensia ra. Insan, si Leon Weaver na Service Department Committee tan si Lon Schilling na Bethel Operations Committee so anginterbio ed saray membroy branch committee a nanlalapud Aprika tan Latin Amerika, ya angisalaysay na saray eksperiensia ed panmisioneron lawak tan walaan na maabig a simbawa parad saray mangraduar a misionero. Diad Sierra Leone, nipabitar a ditan et ngalngali 90 porsiento ed saraman so abautismoan legan na 1995 a serbisyon taon so tinutulongan na saray misionero. Agaylan abig a rekord na maseseg a kimey!

Kaunoran, si Milton Henschel, say presidenti na Sosyedad, so nampaliwawa ed dumerengel a 2,734 ed teman “Nikadkaduma so Nanengneng ya Organisasyon nen Jehova.” Antoy manggagawan agnaparaan so organisasyon na Dios? Aliwan say kabaleg nisay pakayari to noagta say bengatlan satan so igigiya na matunong iran regulasyon tan hudisyal iran desisyon na Dios. Nen saman a panaon, say totoo nen Jehova, say nasyon na Israel, so angimatalekan na saray sagradon deklarasyon, a nanggawa’d satan a nasyon a nikadkaduma. (Roma 3:1, 2) Natan, nankakasakey so organisasyon nen Jehova legan a satan so onkukurang diad silong na panangigiya nen Jesu-Kristo. (Mateo 28:19, 20) Satan so onaaligwas, onbubulaslas. Wala ta ni sananey ya organisasyon ed dalin a say Mananguley ya Ulop to et ontutupleg ed Salita na Dios, say Biblia, sakbay manggawa na importanti iran desisyon? Diad saraya tan arum nin paraan, tuan nikadkaduma so nanengneng ya organisasyon nen Jehova.

Anampot so makapaliket a programa ed panangiter ed saray diploma tan impamasa na sulat manlapud klase a mangibabalikas na apresasyon ed espisyal a panangipasal.

[Kahon ed pahina 22]

Saray Istatistika na Klase

Bilang na saray nirepresentan bansa: 9

Bilang na saray bansan angi-asainan: 12

Bilang na saray estudyante: 48

Promedyon edad: 31.7

Promedyon taon ed katuaan: 13.8

Promedyon taon ed sigpot-panaon a ministeryo: 9.8

[Litrato ed pahina 23]

Koma-101 a Klase na Watchtower Bible School of Gilead

Diad listaan ed leksab, saray dasig so anumeroan manlapud arap a pabeneg, tan saray ngaran so akalista manlapud kawigi a manpakawanan ed kada dasig.

(1) Swint, H.; Zezenski, A.; Highfield, L.; Mercado, S.; Diehl, A.; Chavez, V.; Smith, J.; Selenius, S. (2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D. (3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. (4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. (5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A. (6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.