Magmaong a Paraan
PANPAPAGAAN na Tastasi nen Jehova so kigegeray na espiritualidad ed mundo tan say imoralidad tan pakakawetwetan ed relihyon ya ontatayak ed sosyedad. Bilang resulta, no maminsan et natatawag iran pundamentalista. Balet ontan ta ira? Andi. Anggaman walaan ira na mabiskeg a relihyoson kombiksion, aliwa iran pundamentalista diad pantalos a pakauusaran na termino. Agda dedetdetan iray politikal a papangulo pian iyalibansa ray sakey a punto-de-bista, tan ag-ira ombabaling ed saray demostrasyon tan karawalan a sumpad saramay agda piabobonan. Aromog da la so magmaong a paraan. Aaligen da so Pangulo ra, si Jesu-Kristo.
Kombinsido iray Tastasi nen Jehova a wala so relihyoson katuaan, a satan so naromog ed Biblia. (Juan 8:32; 17:17) Balet ibabangat na Biblia iray Kristiano a magmaliw a mapangasi, maong, maulimek, tan makatunongan—kualidades ya agmangiyaabuloy ed panatisismo. (Galacia 5:22, 23; Filipos 4:5) Diad say libro na Biblia a Santiago, napapaseseg iray Kristiano a bayuboan so “kakabatan a wala a manlapu ed tagey,” ya adeskribi bilang “unona, sikato so malinew, insan mareen, masimpit, tan mainomay a pikasian, napno na panangasi tan maong iran bunga.” Inyarum nen Santiago: “Say bunga na katunongan wala a nitanem ed kareenan ed saray manggawa na kareenan.”—Santiago 3:17, 18.
Nononoten na saray Tastasi nen Jehova ya importantin tuloy ed si Jesus so katuaan. Imbaga to’d si Pontio Pilato: “Nisengeg ed saya nianak ak, tan nisengeg ed saya linma ak dia ed mundo, pian tasian ko so katuaan.” (Juan 18:37) Anggaman sikato so makpel a manangiyalibansa na katuaan, agto impasoot iray kombiksion to ed arum. Imbes, sikatoy inmapelo ed isisip tan kapusoan da. Kabat ton say mangatatawen ya Ama to, sakey a “maong tan matunong” a Dios, so mandesidi no panon tan no kapigan so pamunas to ed katilaan tan ag-inkahustisya diad tapew na dalin. (Salmo 25:8) Sirin, agto impasoot a paeren iray onsumlang ed sikato. Misunian, saray ortodoks a relihyoson papangulo ed agew to so analin mamaer ed si Jesus.—Juan 19:5, 6.
Walaan na mabiskeg a kombiksion iray Tastasi nen Jehova nipaakar ed saray relihyoson doktrina, tan ipapatnag da so putel iran totontonen no nipaakar ed moral. Singa si apostol Pablo, kombinsido iran wala lambengat so “sakey a Katawan, sakey a pananisia, sakey a binyag.” (Efeso 4:5) Kabkabat da met iray salita nen Jesus: “Mainget so pinto, tan makisir so dalan, a mamaarap ed bilay, et daiset so saray makaromog ed sikato.” (Mateo 7:13, 14) Siansia, agda pipiliten so arum pian ontumbok ed saray sisiaen da. Imbes, aaligen da si Pablo tan ‘kekerewen’ ed amin na saramay manpilalek a “mipulangan ed Dios.” (2 Corinto 5:20) Saya so magmaong a paraan. Satan so paraan na Dios.
Say relihyoson pundamentalismo, a singa pakakausaran ed salita natan, so duman tuloy. Saray pundamentalista so manguusar ed dakel a taktika—pati karawalan—pian nipaakseb iray prinsipyo ra ed sosyedad. Diad panggagawa na ontan, nagmamaliw iran manunan kabiangan na politikal a sistema. Balet inkuan nen Jesus a saray patumbok to so nepeg ya “ag-ira taga mundo.” (Juan 15:19; 17:16; Santiago 4:4) Mitunosan ed saratan a salita, pansiasiansiaen na Tastasi nen Jehova so estrikton neutralidad diad saray kolkolan ed politika. Tan, singa impangaksobi na Italyanon peryodiko a Fuoripagina, sikara so “agmangipipilit na antokaman ed siopaman; balang sakey so bulos a mangawat odino andi ed ibabaga ra.” Say resulta? Say mareen a mensahe na Biblia na Tastasi so mangiingganyo ed totoo ed amin a nengneng, anggan saramay datin pundamentalista.—Isaias 2:2, 3.
Mundon Walaay Putel Iran Totontonen
Bidbiren na Tastasi ya agnasolbar na totoo so probleman panpapagaan na saray pundamentalista. Agmo napilit so too a manisia ed Dios odino mangawat ed personal iran sisiaen mo. Diad paniisip a posibli itan a bengatla so nansumpal ed arum iran katatakotan ed awaran, a singa saray Krusada, Inkisisyon ed kapelegyan iran panaon, tan saray “impangomberti” ed saray Amerikanon Indian. Anggaman ontan, no manmatalek ka ed Dios, mabulos kan mangimatalek ed sikaton amin.
Unong ed Biblia, angigeter so Dios na panaon ya abuloyan toy totoon manumlang ed saray ganggan to a sengegan itan na panirap tan ot-ot. Satan a panaon so paganigani lan napaso. Diad peles et si Jesus so manuuley la bilang Ari ed mangatatawen a Panarian na Dios, tan magano lan onkiwas itan a Panarian pian ekalen so atooan a gobierno tan onsandi ed agew-agew a pananguley ed katooan. (Mateo 24:3-14; Apocalipsis 11:15, 18) Say resulta et magmaliw a sankamundoan a paraiso a daakan so kareenan tan inkatunong. Diad satan a panaon et anggapo lay pakawetwetan ed no panon a dayewen so tuan Dios. “Say matunong tawiren to so dalin tan manayam diman lawas.” (Salmo 37:29) Ontalona iray magnayon a totontonen a singa say maaron-kaabigan, katuaan, inkahustisia, tan kamaongan diad pankaabigan na amin a matulok a katooan.
Diad paniilalo ed satan a panaon, inkuan na salmista ed maanlong a paraan: “Say panangasi tan katuaan nantipon ira; inkatunong tan kareenan nanangoban ira. Say katuaan manbonlayon a manlapu ed dalin, tan say inkatunong inmusdong a nanlapu ed tawen. Lanti, si Jehova iter to so maong, tan say dalin tayo iter to so dinakelan to. Say inkatunong onla ed unaan to, tan ipasen to so saray kundang to a dalanen.”—Salmo 85:10-13.
Bangta agtayo napasimbalo so mundo, nabayuboan tayo bilang indibidual iray maridios a totontonen anggan natan. Sirin, nasali tayo so magmaliw a nengneng na totoon kaliktan na Dios a magmaliw a managdayew to diad balon mundo. Insan magmaliw tayon kabiangan na saray mauyamon tutukoyen na salmista: “Saray mauyamo tawiren da naani dalin, tan manliket ira a dili ed inkadaakan na kareenan.” (Salmo 37:11) Susuportaan tan bebendisyonan na Dios iray manggagawa na linawa to, tan isisipan to iray makapakelaw a bengatla diad arapen da. Onia so inkuan nen apostol Juan: “Say mundo mangangga, tan saray penel to, balet say mangunor ed linawa na Dios onsiansia lawas.”—1 Juan 2:17.
[Litrato ed pahina 7]
Iimbitaan na Tastasi nen Jehova so amin a makapikabat ed maong a balita na Panarian na Dios
[Picture Credit Line ed pahina 6]
Lamparaan ed pahina 3, 4, 5 tan 6: Printers Ornament’s/nen Carol Belanger Grafton/Dover Publications, Inc.