Mairap a Panaon Parad Saray Maedad la
SI Mama Oniyan, a man-edad la na 68, so manaayam ed sakey a manunan syudad na Sagur ya Aprika. Sanen agni akulaw, pinodnonot to lay panggayaga ed inka-akulaw to diad mareen a panretiro, ya aliber na ananak tan kaapoan to. Imbes uusaren toray agew to ed panlalakoy ambetel a danum ed kapetangay agew. Ontutulong ed pambilay toy melag a naaalmo to. Say duaran anak ton lalaki so manaayam ed arawin bansa. Abayag lan agda ipapawitay kuarta.
Diad apalabas a panaon, dederlengen a maong iray maedad la ed Aprika. Sikaray nirespito lapud eksperiensia tan pikakabat da, pati kakabatan tan pakatebek a mabetbet a papawalaen na saraya. Tinmulong ira ed panamabaleg ed saray apo. Kinerew na saray kalangweran so simbawa tan say abobon da. Nambilay iray totoo unong ed Biblikal a konseho: “Onalagey ka naani ed arapan na ubanan ya ulo, et pagalangan mo naani lupa na masiken [odino, akulaw].”—Levitico 19:32.
Anguman lay panaon. Say inkaduka, implasyon, agpakaempleyo, tan dakerakel a manpipirmi ed saray syudad so anaynan ed dakel a maedad la pian italikarkar so inkasikara. Oniay inkuan na Director of HelpAge na Kenya, si Camillus Were: “Say tradisyon a panaglegpet tan panangasikaso ed saray maedad la so ompapalalon nibabaliwala.”
Siempre, say ilulukak na saray siglaotay pamilya so aliwan nikadkaduma ed saray bansa ed Aprika. Nipaakar ed Hapon, oniay irereport na Guardian Weekly: “Say panangaroy anak a debosyon so datin suporta na sistemay Hapon ed saray kablian ya inter na Confusianismo, balet ta naandipat itan lapud impangumay inkabaryotiko a nansumpal ed bilay ed syudad tan say ilulukak na siglaotay pamilya: natan et 85 porsiento na Hapones so ompapatey diad saray ospital odino diad paamponan.
Antokamay kipapasen, pambabanikelan na saramay talagan malabay a mamaliket ed Dios ya igalang iray atateng da. Tatalinengen da so konseho na Biblia: “Igalang mo so amam tan inam . . . ta makapaabig ed sika tan makapambilay ka na andukey dia ed tapew na dalin. (Efeso 6:2, 3) Anggaman aliwan naynay a mainomay so pangigalang tan pangasikaso ed maedad lan atateng, mangitarok itan na mayaman iran tumang.