‘Mibakal ed Maabig a Pibabakal na Pananisia’
1 Binilin nen apostol Pablo si Timoteo a ‘mibakal ed maabig a pibabakal na pananisia.’ (1 Tim. 6:12) Si Pablo a mismo so nambilay unong ed saratan a salita. Diad saginonor lan bilay to, matalek ton inkuan a sikatoy mismon akibakal ed maabig a pibabakal. (2 Tim. 4:6-8) Diad amin a paraan, sikatoy masebeg, makpel, tan masungdo ya anumpal ed ministeryo. No aligen so alimbawa to, makapanmatalek itayo met a nagawaan tayoy anggaay nayarian tayo diad pibabakal tayo parad Kristianon pananisia.
2 Kaukolan so Pansagpot: Si Pablo so nankimey a maong nipaakar ed ministeryo. (1 Cor. 15:10) Ontan itayo met no aanapen tayo so amin a makanepegan ed teritorya tayo. (Mat. 10:11) Pian nasabi iratan, kaukolan ya ombangon a masakbay pian pulongan iramay naabet tayo ed karsada. Odino kaukolan itayo a manpulong no mansirunget odino masakbay a labi pian nakatongtong iray totoo no wala la ra’d abung da.
3 Mankaukolan itan na dilin-disiplina tan maabig a panag-eskedyul pian masakbay ya onsabi sano mibana itayo ed grupo na panagaral na libro parad lawak na kimeyan. Alimbawa, walaray membro ed pamilyay Bethel a manbiahe na sakey oras odino onsulok ni pian mibiang ed ministeryo ed akaasainan dan kongregasyon no sampot simba. Ontan met, pandinayewan tayo so pigaran manangipalapag tan pamilya ed kongregasyon tayo a manbiahe na arawi balet ta onsabin masakbay. Saratan ya alimbawa na inkakuli tan dilin panag-organisa so makanepegan ya aligen.
4 Napakiwas itayo komon pian pawilen so amin a naromog tayon interesado. Anggan sano makapangipalima na literatura ed karsada odino diad impormal iran paraan, kaukolan a panggunaetan tayon alaen so address odino numero na telepono na indibidual. Insan dalawen tayo pian nabayuboan so interes to tan panggunaetan ya igapo so panangiyaral na Biblia.
5 Magmaliw a Regular ed Serbisyo: Si Pablo so andi tunda tan amasya a nampulong. (Roma 15:19) Sikayo met ey? Kasin regular kayon manpupulong? Kasin akapanpulong kayo la ed sayan bulan? Pilalek na saray konduktor ed Panagaral na Libro ed Kongregasyon a nanengneng ya amin ed grupo ra so makapanpulong legan na Agosto. Tulongan da kayo pian nagawaan iya.
6 No aligen so alimbawa nen Pablo diad sigpot a pananuporta ed maong a balita, nitultuloy tayoy ‘mibakal ed maabig a pibabakal na pananisia.’