Igloria si Jehova Panamegley na Maabig Iran Gawa
1 Sano nasabian kayo na maksil a bagyo, agaylan pakainawaan so pakaromog na siroman! No diad loob na satan et maekem tan maligen tan no saray manaayam ditan et maparawes ira, sikay maliket a mansiansia ditan. Say panagpulong na Panarian a kimey so mangipapaarap ed totoo ed ontan a siroman manlapud sistema nen Satanas. Kasin say inagew-agew a kondukta tayo so mangipapaimano ed arum ed no panon a makapasagyat iyan maligen a siroman? On, lapud inkuan nen Jesus a saray totoo so ‘makanengneng ed saray maong a gawa tayo, et galgalangen da so Ama tayo a wala ed tawen.’—Mat. 5:16.
2 Panoy nepeg a panugali tayo pian saray gawa tayo so managyat ed arum a mamaarap ed si Jehova tan ed organisasyon to? Diad pangiyabuloy ed saray salita nen Jesus a nikurit diad Lucas 6:31 tan 10:27 a manmoldi ed kabibilay tayo kada agew. Saya so mamakiwas ed sikatayo a mangipanengneng na maaron panagpaga ed kaparan totoo, a mangiduma ed sikatayo manlapud sayan anggapoy pibabali tan agmanangiyansakit a mundo.
3 Sakey ya agin bii a linmugan ed ferry so akaimano ed sakey a malangwer nin bii a pirmi panelew to lapud biahe ed taew tan agto naasikaso so melag nin anak to. Inyopresi na agin bii ya asikasoen so ugaw. Sanen tinepet na bii no panon ton nipanengneng so otang a linawa to, inkuan na agin bii ed sikato: ‘Ipangasim ya ondengel ka ed saray Tastasi nen Jehova sano sikaray ombisita ed sika.’ Onman so ginawa na bii, tan natan et sikato tan say masiken to so Tastasi la. Lapud saray maabig a gawa et paborabliy inkiwas da ed mensahe na Panarian.
4 Nalalanor so Intiron Bilay Tayo: Say kondukta tayo ed kakaabay, legan a walad trabaho odino diad eskuelaan, tan legan na saray panaon na panligliwaan so mamawala na impresyon ed arum nipaakar ed sikatayo tan ed relihyon tayo. Kanian, nepeg tayon tepetan so inkasikatayo: ‘Panon so panmoria na saray makakaimaton ed siak tan ed pamilyak? Kasin naiimano na saray kakaabay a malinis tan mauksoy so abung tayo tan arapan na abung tayo? Kasin saray katrabahoan tan kaeskuelaan tayo so manmoria ed sikatayo bilang onsasabi ed suston oras tan makuli? Kasin naiimano na arum so itsura tayo a masimpit tan galgalangen?’ Saray maabig a gawa tayo so manggawa ed panagdayew ed si Jehova a nagkalalon makapasagyat ed arum.
5 Pinasakbayan nen Pedro iray Kristiano a magmaliw iran puntirya na panagludlurey. (1 Ped. 4:4) Nepeg tayon seguroen a say kondukta tayo so agpansengegan na negatibon komento. (1 Ped. 2:12) No say inagew-agew iran gawa tayo so mangigloria ed Dios a dadayewen tayo, diad ontan et sikatayoy singa lampara a nigaton ed atagey, a manasagyat ed arum ya onloob ed maligen a siroman ya itatarya nen Jehova.—Mat. 5:14-16.