United by Divine Teaching —Pangusisa ed Peteg ya Inaagin Pankakasakey
Sakey a manangasikaso na sirkito so akibiang ed panagaral na Biblia ya inkondukta ed sakey a bii ya agnin balot inmatendi ed saray miting ed kongregasyon. Sikatoy inimbitaan ton manbantay na video a United by Divine Teaching. Diad saman a simba et say bii so inmatendi ed miting tan inkuan to a sikatoy malikeliket ya akaatendi. Akin a sayan video so walaan na maples a resulta? Sikatoy asagyat ed impangiparungtal na satan ed mablin inaagin pankakasakey tayo ya onkikiwas anggaman ed mundon marawal tan walay pambubusolan.—Juan 13:35.
Bantayan iyan video pian nanengneng tan nalikna so kareenan tan aroan a panggagayagaan ed limog na Tastasi nen Jehova ed interon dalin. Insan mandalepdep ed sarayan tepet:
(1) Akin a say “Madibinon Bangat” et matukoy a tema parad 1993-94 iran kombension?—Miq. 4:2.
(2) Anto so kabaliksan na katuaan na Biblia ed pigaran pamilya? Antoy kabaliksan na satan ed pamilya yo?
(3) Akin ya importante so pagmaliw a nabangatan nen Jehova?—Sal. 143:10.
(4) Antoran nengneng na angat so nepeg a talonaan pian iparaan so angkabaleg ya internasyonal iran kombension?
(5) Panon yon apaneknekan a say Salmo 133:1 tan Mateo 5:3 so agawa diad saray Kristianon kombension ya inatendian yo?
(6) Anton mapublikon paneknek so wala ed mabiskeg iran epekto na madibinon bangat?—Apoc. 7:9.
(7) Anto so sankabalegan ya agawan bautismo na saray tuan Kristiano ed kapiganman?
(8) Antoran salita nen Miqueas, Pedro, tan Jesus so nasusumpal ed limog na Tastasi nen Jehova?
(9) Antoy mamapaneknek ed sikayo a say maliket, nankakasakey ya atooan a pamilya et aliwan kugip labat?
(10) Diad siopa so pangipabantayan yo ed sayan video, tan akin?
Kayarin abantayan na sakey ya agin bii iyan video, onia so maabig ya impanegek to: “Say video so ontulong ed siak a lalo pian napansiansiak ed nonot ko a dakerakel a Kristianon agagin lalaki tan bibii ed interon mundo so diad sayan bekta et matoor a manlilingkor ed si Jehova. . . . Agaylan mabli so inaagin pankakasakey tayo!”—Efe. 4:3.