Katitipon na Totoo Manlapud Amin a Lenguahe
1 Nasusumpal so Salita na Dios! Saray totoo “manlapu ed saray amin a pansasalita na saray nasyon” so mangaabrasa ed tuan panagdayew. (Zac. 8:23) Panon so panutulong na Tastasi nen Jehova ed saray totoo ed amin a ‘kailalakan, tan binaleybaley, tan pansasalita’ pian nawalaan na malinis a talindeg ed arap nen Jehova, tekep na ilalon makaliktar ed “baleg ya irap”?—Apoc. 7:9, 14.
2 Onkikiwas so Organisasyon na Dios: Inyuksoy na Mananguley ya Ulop so literatura na Biblia a niwala ed manga 380 a lenguahe ta pian saray totoo ed interon dalin et natalo-talosan da so kaimportantian na maong a balita. Say panangiparaan tan panangipalapag na literatura ed dakerakel a lenguahe so baleg a kimey. Sasaglawien na satan so panugyop ed saray ulop na kualipikadon managpatalos tan panuporta ed saray nakaukolan da pian ipatalos so literatura tayo ed amin na sarayan lenguahe, ontan met ed pangimprinta tan pangipatulor ed saratan a literatura. Balet, say manunan betang et gagawaen na saray indibidual a manangipalapag na Panarian, a mangitatarok na manangiliktar-bilay a mensahe na Biblia ed totoo.
3 Pangawat ed Angat: Dakel a mansasalitay duman lenguahe so naroromog natan ed dakel a paspasen. Pian nipasabi ed sarayan totoo so maong a balita, ondarakel iray lingkor na Dios a manggugunaet a manaral na salitan Tsino, Ruso, Español, odino arum a lenguahe a kaslakan ed lugar da. Arum so manaaral na Sign Language. Diad Estados Unidos labat, walay manga 2,900 a kongregasyon tan 240 iran grupo so manpupulong ed 38 a lenguahe likud ed Ingles. Walaray totoo ya agnin balot akadngel nipaakar ed si Jehova odino anggapo nin balot so pikakabat da ed Biblia so mangaawat ed katuaan na Salitay Dios.—Roma 15:21.
4 Nayarian tayo kasin isekar a nagkalalo so inkasikatayo pian iyabawag so maong a balita ed totoo diad teritorya tayo a duma so nasyonalidad da? (Col. 1:25) Dakel a kongregasyon so mangoorganisa ed panagpulong a kimey diad dayon komunidad ed lugar da. Unona et aralen ni na saray manangipalapag so lenguahe pian mangiter na simplin presentasyon, a singa say: “Hello. Walay awit min maong a balita parad sikayo. [Insan iyopresi so sakey a tract odino brosyur a wala ed satan a lenguahe.] Onla kami la.” Talagan bebendisyonan nen Jehova so ontan iran melag a gapoan!
5 Say mensahe na Panarian so makapasagyat ed totoo antokaman so abenegan tan lenguahe ra. Anamoten tayo sirin so pankanawnawa pian inabang itan ed sikara.