Mantutunosan ed Pankakasakey
1 Kaunongan kabetbet a pankelkelawan yo so alay abig a desinyo na laman na too? (Sal. 139:14) Kada kabiangan na laman so mankikimey a mitunosan ed arum a parte na laman. Inyaliling na Salitay Dios so Kristianon kongregasyon ed mantunosan a maong a laman. Diad silong na Ulo, si Kristo, amin a membro na kongregasyon so ‘mantutunosan a mankakasakey tan mikokoopera panamegley na amin a nansangalan a mangiiter na nakakaukolan.’ (Efe. 4:16a, NW) Kanian, nayarian nen Jehova ya usaren so nankakasakey a totoo to pian sumpalen iray makapakelkelaw a bengatla.
2 Saray membro na inmunan-siglon kongregasyon so kinmiwas “ed sakey a kanonotan” diad pangasikaso ed pankaukolan na balang sakey ed espiritual tan materyal. (Gawa 2:44-47) Diad tulong nen Jehova, sikaray nankakasakey ya angarap tan analona ed maruksan isusumpa. (Gawa 4:24-31) Inyabawag da so mensahe na Panarian inerman so nila ra, a kinobrian so parte na dalin tekep na maong a balita. (Col. 1:23) Diad modernon panaon, say Kristianon kongregasyon so nankakasakey a manusumpal ed sarayan parehon bengatla diad malalaknab a paraan. Antoran aspekto so ontutulong ed sayan inkasaksakey?
3 Nankakasakey Lapud Bangat na Dios: Diad interon globo, pankakasakeyen itayo na panagdayew tayo. Panon a posibli iya? Bibidbiren tayo so nanengneng a paralanan nen Jehova ed pangitatarya na espiritual a ‘tagano ed manepeg a panaon.’ (Mat. 24:45) Papablien tayo met so ‘langkap a lalaki’ ya inter to bilang managbangat diad kongregasyon. Legan a sipapaabeba tayon aawaten iray probisyon nen Jehova pian pakanen itayo ed espiritual a paraan, say pakatalos tayo ed Salita na Dios so ombulaslas tan mangisagyat ed sikatayo na pampilalek ya aligen si Jesus bilang babangatan to. Nepeg tayon itultuloy so panaral ed Salita na Dios, a masimoon a panggunaetan a “makarateng ed pankakasakey na pananisia.” (Efe. 4:8, 11-13) Kasin idadalangirang yo so espiritual a pankakasakey tayo diad pambasa ed Biblia ya inagew-agew?
4 Nankakasakey Diad Kristianon Panlilimog: Say aro so mamapaapit ed sikatayo ed panlilimog diad saray Kristianon miting. Diad sarayan miting, “manpapagalangan itayo ed sakey tan sakey.” (Heb. 10:24, 25) Saya so manasaglawi ed inengneng ed labas na akinpaway iran itsura pian nakabat tayon maong iray agagi tayo, ya imanoen ira ed paraan a pangiimano nen Jehova ed sikara, bilang mabli. (Ag. 2:7) Legan tayon tatalinengen iray balikas na pananisia ra, say aro tayo ed sikara so onaralem tan onelet so pankakasakey tayo. Kasin kabat kayo na arum bilang maparanay ya onaatendi diad saray miting ed kongregasyon?
5 Kakimeyan ed Lawak: Say pangipulong ed maong a balita a kaiba iray kapananisiaan so mamapakasakey ed sikatayo ed panggawa na linaway Dios. Pinabli nen apostol Pablo iray ‘kaiba a komikimey nipaakar ed panarian na Dios.’ (Col. 4:11) Say panginabang ed saray eksperiensya tan pantutulongan legan a walad ministeryo so ontulong ed sikatayon nasumpal so kimey tayo bilang Kristiano tan napaelet so bedber na pankakasakey tayo.—Col. 3:14.
6 Manamakasakey ya Impluensya na Masanton Espiritu: Legan tayon panggugunaetan a gawaen so linawa to, ipapagamor nen Jehova ed sikatayo so espiritu to. Saya so ontutulong ed sikatayon napakepa so agpakapantutunosan tan maniiba ed pankakasakey. (Sal. 133:1) Satan so mamapakiwas ed sikatayon “imatonan so pankakasakey na espiritu ed balor na kareenan.” (Efe. 4:3) Balang sakey ed sikatayo so makapangiyalibansa ed pantutunosan a niwawala ed limog na totoo na Dios diad pangipatnag na bunga na espiritu ed pidedeneng tayo ed sakey tan sakey.—Gal. 5:22, 23.
7 Say panlingkor a mankakasakey ed silong na pangidaulo nen Kristo so ‘mamabaleg ed laman parad kipaalagey ton dili ed aro.’ (Efe. 4:16b) Sakey ni, satan so mangiglogloria ed si Jehova, “say Dios a mangiiter na kareenan.”—Roma 16:20, NW.