Lalon Nipaarap so Imano ed Biblia!
1. Diad gapo, parad siopa a manunan nipalapag so Say Panag-Bantayan, tan parad siopa so The Golden Age?
1 Nen Oktubre 1, 1919, nipalapag so sankaunaan ya isyu na magasin a The Golden Age. Satan so apaneknekan a makanakanan uusaren ed panagpulong a kimey. Akin? Lapud satan so nagkalautlan denesinyo parad publiko. Aliwa itan a singa Say Panag-Bantayan a diad loob na dakel a taon et impasen bilang magasin a manunan parad “daiset a papastolan” odino melag a pulok. (Luc. 12:32) Ontan lay inkaligsa na saray manangipalapag na Panarian ya angawat ed balon publikasyon, a diad loob na dakel a taon et mas dakerakel so niyiimprinta a The Golden Age nen say Say Panag-Bantayan.
2. Anto la so ngaran na The Golden Age natan, tan anto so gagala na satan manlapu la’d gapo?
2 Say magasin a The Golden Age so nipalapag pian ipanengneng ed saray totoo a say peteg a solusyon ed saray problema na katooan et say Milenyon Uley nen Kristo, a peteg a mangipaarap ed katooan ed alay abig a kipapasen. Diad tinmumbok iran dekada et walaray ginawan pananguman ed The Golden Age pian nitukoy ed manguuman a pankaukolan na saray panaon. Nen 1937, say ngaran na satan so sinalatan na Consolation. Nen 1946 et nagmaliw itan ya Awake!, ya anggad natan et ontan so tawag tayo.
3. Say Awake! so abalbaleg a tulong ed pakasusumpal na anton propesiya?
3 Manlapu la’d inkipalapag na satan a magasin, abalbaleg la so nitulong na satan ed malaknab a panagtasi a gagawaen manlapu la nen 1919. (Mat. 24:14) Balet, lapud inkaganat lay panaon, ompatnag a makabat so panggawa na kaaruman niran pananguman ed Awake!
4. (a) Anto so nepeg a gawaen na sakey a too pian sikatoy niyagel ed “agew na sanok nen Jehova”? (b) Unong ed Apocalipsis 14:6, 7, anto so itatawag na “anghel a mantektekkiab ed pegley na tawen” a gawaen na amin?
4 Labalabay na minilyon a totoo a basaen so Awake! lapud makapasagyat so panangipresenta na satan ed dakerakel tan nanduruma iran sekular a tema. Seguradon maslak ed saramay tinaon ya onaatendi ed Memoryal et regular a manbabasa na Awake! Ingen, no labay na siopaman so niyagel ed “agew na sanok nen Jehova,” kaukolan to so nagkalalo nin tulong likud ed pagmaliw a regular a managbasa na saray publikasyon tayo.—Sof. 2:3; Apo. 14:6, 7.
5. (a) Anto so nagkalalon nidanet ed Awake! manlapud Enero 2006 ya isyu na satan? (b) Nayarin napakiwas so dakel a manggawa na anto, tan diad kasumpalan na anton propesiya?
5 Sirin, manlapud Enero 2006, say Awake! so nagkalalon mangidanet ed Panarian na Dios. Mas diretsaan ya ipaseseg na satan ed saray managbasa ya ontupleg ira ed Biblia parad solusyon na saray problema ra tan mas ipabitar na satan so eksplinasyon na Biblia nipaakar ed saray peles a nagagawa. Diad ontan et mas natalosan na saray managbasa iray nagagawa natan tan nayarin pakiwasen ira na nababasa ra a nagkalalon kabaten si Jehova.—Zac. 8:23.
6, 7. (a) Panon a say Awake! et nagkalautlan ontulong ed dakel a mangiyaplika ed 1 Tesalonica 2:13? (b) Panon la kabetbet so pangipalapag ed Awake!, tan pigaran porsiento na lenguahe so naapektaan ed satan a pananguman?
6 Say Awake! so mantultuloy a mangipresenta na saray tema a paninteresan na karaklan. Balet, lalon ipaarap so imano ed Biblia. (1 Tes. 2:13) Lapud lugan na Say Panag-Bantayan so araralem ya impormasyon manlapud Biblia tan say Awake! et mangipresenta na mas dakel ya artikulon Makasulatan, ompatnag ya agla nakaukolan a mantultuloy nin ipalapag a mamidua ed sakey bulan so Awake! Kanian, manlapud Enero 2006 ya isyu na Awake!, binulan labat la itan ya ipalapag. Diad ontan et napasimpli so preparasyon, panagpatalos, tan panangipawit na saray literatura.
7 Sayan pananguman so mangapekta ed 40 porsiento na saray lenguahe a nipapalapag so Awake! Diad maslak a lenguahe, say Awake! so nipapalapag la a binulan odino mamipat ed sakey taon. Anggapoy nauman ed panangipalapag ed Say Panag-Bantayan.
8. Panon ya usaren na saray manangipalapag so Awake! tekep na Say Panag-Bantayan?
8 Saray manangipalapag so makapangiyopresi na Awake! tekep na anggan dinan ya isyu na Say Panag-Bantayan parad satan a bulan. Saramay mangiprepresenta na Awake! so makapangusar ed satan lanlamang ya isyu ed interon bulan ya agla salatan so presentasyon ed kapegleyay bulan, ya aliwan singa natan.
9. Anto so mantultuloy a betang na Awake!?
9 Manlapu la’d primeron isyu na saya nen 1919, sayan magasin a nanggegendanan a tinawag a The Golden Age, Consolation, tan natan et Awake! so awalaan na baleg a betang ed panagpulong a kimey. Ipipikasi mi ya itultuloy nen Jehova a bendisyonan so pangibunog ed sayan magasin anggan sano nauman lay lugan na saya tan ontulong komon iya ed dakel nin totoo manlapud ‘balang nasyon tan kailalakan tan binaleybaley tan salita’ a manmatalek ed Panarian na Dios bilang say alenleneg ya ilalo ra.—Apo. 7:9.