Eskuelaan ya Ontulong ed Sikatayon Manggawa na Praktikal a Panangiyaplika
1 Legan tayon ikokonsidera so materyal a nidatak ed Eskedyul ed Teokratikon Eskuelaan Parad Ministeryo ed 2006, panggugunaetan tayo so nagunggonaan ed saray Makasulatan a bangat panamegley na pangisiglaot tayo ed saratan ed sagradon panaglingkor tan inagew-agew a bilay tayo. Determinado itayon mangiyaplika ed saray naaaralan tayo.—Juan 13:17; Fil. 4:9.
2 Panagkomento: Say eskedyul ed sayan taon so angiyarum na sakey minuto parad pibiang na saray dumerengel ed saray pabitar ed Biblia. Kabaliksan na saya a say agin apabtangan a mangiparungtal ed saray pabitar so nepeg a sinononot a kaukolan ton sumpalen so nabebetangan to diad loob na limaran minuto imbes ya anemira. Saramay dumerengel so nepeg met a sinononot ed no kaunongan karukey so komento ra. Diad pannonot lan masakbay, nibaga na mankokomento iray makatulong ya impormasyon ed loob na 30 segundo odino onkulang ni. Manga samploran indibidual so nepeg a makapangiter na makabaliksan a komento diad loob na limaran minuton nigeter parad pibiang na dumerengel.
3 Paliwawa a Makaibangat: Nepeg ya akasentro iray pabitar ed Biblia tan makaibangat a paliwawa ed kablian na materyal lapud onaplika itan ed ministeryo tayo tan ed arum nin aspekto na inagew-agew a bilay tayo. Nepeg ya aglambengat sagyaten na espiker iray dumerengel ya onkiwas. Noagta, nepeg ton tukoyen a mismo so kiwas a nakaukolan, ibangat no panon itan a nagawaan, tan ipaimano iray gunggona na panggawa ed satan. Oniay nayari ton ibaga: “Onia ay no panon a sayan teksto so mangiwawanwan ed sikatayo,” odino “Onia ay so nayarin pangusar tayo ed sarayan bersikulo diad ministeryo.” Saray mamatatken tan ministeryal a lingkor a makaamta ed kipapasen na lokal so nepeg a manggunaet a manggaway praktikal a panangiyaplika na materyal, ya espisipiko anggad posible.
4 Nagkalautlan epektibo so panaglawi ed saray alimbawa ed Biblia sano manggagawa na praktikal a panangiyaplika. Kayari panukoy ed sakey a Makasulatan ya alimbawa, nayarin ibaga na espiker, “Nayarin onia met so kipapasen yo.” Nepeg a seguroen to ya antokaman a panangiyaplika ed alimbawa na Biblia et mitunosan ed konteksto, ed intiramintin Biblia, tan ed impalapag na “matoor tan makabat ya aripen.”—Mat. 24:45.
5 Say inkadunong et say abilidad a matalonan mangusar ed kakabatan tan pakatalos. “Say dunong so manuna a bengatla.” (Uli. 4:7, NW) Legan itayon onggagamor na praktikal a dunong diad panaaral tayo ed Teokratikon Eskuelaan Parad Ministeryo, komon ta paaligwasen tayo met so abilidad tayon inabang itan ed arum.