Ipaimano so “Silew na Mundo”

1. Anto so baleg a silew a nipasakbay ed Salita na Dios, tan anton okasyon so nagkalautlan mangipaimano ed sayan silew?

¹ Diad panamegley nen propeta Isaias, inkuan nen Jehova: “Saray kabalbaleyan a nanakar ed kabilungetan anengneng da so baleg a silew. Saray nanayam ed dalin na anino na patey, dia ed sikara sinminag so silew.” (Isa. 9:2) Satan a “baleg a silew” odino liwawa so anengneng ed kimkimey na mismon Anak na Dios, si Jesu-Kristo. Say kimey to legan a walad dalin tan saray bendisyon a resulta na bagat to so amaaligwas ed espiritual a kipapasen na saramay walad kabilungetan. Satan a liwawa so kaukolan na totoo ed sarayan ambilunget a panaon. Say Pangdem na Katawan so mangitatarya ed sikatayo na nikaduman pankanawnawa pian ipaimano so “silew na mundo.” (Juan 8:12) Nen imbeneg a taon, minilyon so angipatnag na pananisia diad impiulop da ed sikatayon ontulok ed ganggan nen Jesus: “Gawa yo ’ya a pakanodnonotan ed siak.” (Luc. 22:19) Diad panasingger na panselebra ed Memoryal ed sayan taon, panon itayon makapibiang ed pangipaimano ed baleg a silew a pasisinagen nen Jehova?​—Fil. 2:15.

2. Panon tayon napaaralem so impapuson apresasyon tayo ed dondon bagat, tan antoy resulta na panggawa ed saya?

² Pabiskegen so Impapuson Apresasyon: Say panaon na Memoryal et sakey a maabig a pankanawnawa pian mandalepdep ed abalbaleg ya aron impatnag nen Jehova tan si Jesus diad impangitarya na dondon bagat parad katooan. (Juan 3:16; 2 Cor. 5:14, 15) Say panggawa ed satan et seguradon mamaaralem ed impapuson apresasyon tayo ed sayan sagradon okasyon. Amin a totoo na Dios so malabay a mangigana na panaon pian manbasa tan mandalepdep ed espisyal a panagbasa ed Biblia diad panaon na Memoryal, unong a nidatak ed Usisaen so Kasulatan ya Inagew-agew. Say pannonot ed agnaparaan iran kalidad nen Jehova, a matalonggaring a niparungtal ed probisyon ton dondon, so sengeg na pangikinon tayo ed sikato bilang Dios tayo. Say pandalepdep ed no antoy kabaliksan na dondon ed sikatayon mismo so mamabaleg ed impapuson aro tayo ed Dios tan ed Anak to tan mamakiwas ed sikatayon gawaen so anggaay nayarian tayo diad panumpal ed linawa na Dios.​—Gal. 2:20.

3. Panon tayon nipatnag so apresasyon tayo ed Memoryal?

³ No napaaralem tayoy apresasyon tayo ed probisyon nen Jehova parad kilalaban, say inkaligsa tayo parad Memoryal so mangimpluensya ed saray iyaaralan tayo na Biblia, saray papawilen, kakanayon, kakaabay, kaeskuela, tan arum niran imbitaan tayo ed sayan espisyal ya okasyon. (Luc. 6:45) Kanian, manggawa na nikaduman sagpot pian regular ya imbitaan iratan ya amin, ya ikdan ira na niimprintan imbitasyon parad Memoryal pian onkanan panonot ed sikara. Ta pian anggapoy nalingwanan, dakel so akaimano a praktikal so pamasiansia na sakey a listaan na saramay iimbitaan da ed Memoryal, a tinaon ya iyaarum iray balo. Say organisadon panggawa ed satan tan panggawa tayoy anggaan na nayarian tayo pian imbitaan iray interesadon totoo so maabig a paraan pian nipatnag tayoy pisasalamat tayo ed si Jehova a Dios “lapu ed langkap to ya agnibalikas [odino, agnadeskribe].”​—2 Cor. 9:15.

4. Antoy ontulong ed sikatayo pian napalaknab so pibibiang tayo ed ministeryo legan na Marso, Abril, tan Mayo?

⁴ Palaknaben so Pibibiang ed Ministeryo: Kasin napadaak yoy pibibiang yo ed ministeryo legan na Marso, Abril, tan Mayo? Seguradon bendisyonan na Dios so panggunaet yon panginabang ed arum na “ebanghelyo na gloria nen Kristo.” Si Jehova, bilang Lapuan na amin ya espiritual a liwawa, so angiganggan: “Say silew onsindag ed saray kabilungetan.” (2 Cor. 4:4-6) No nakaukolan, saray mamatatken so mangiyuksoy na saray pantitipon parad lawak na serbisyo diad arum niran panaon tan pasen, pian suportaan iray manangipalapag a malabay a mangusar na malaglaem a panaon ed ministeryo. Nayarin laktipen na saya so masakbay a kabuasan a pampulong diad karsada odino iyuksoy so pankimey ed pasen na negosyo tan panagtasi panamegley na telepono ed ngarem odino ed pansirunget. Bilang tulong ed pamalaknab ed pibibiang yo ed ministeryo, manggawa na makatunongan a kalat ya oras, tan pankimeyan a dampoten itan. Parad karaklan, say pangiter ed si Jehova na sankaabigan da et laktipen toy pribilehyo a panag-auxiliary payunir.​—Col. 3:23, 24.

5. Panon a nagugunggonaan so dakel ed impamawas ed kakaukolanen ya oras parad auxiliary payunir?

⁵ Kasin Makapan-auxiliary Payunir Kayo? Masulok lan pitoy taon natan nanlapula’d binawasan so kakaukolanen ya oras parad panag-auxiliary payunir. Sayan pananguman so nanggawan posible pian dakel ni so makaeksperiensya ed bendisyon na panlingkor bilang auxiliary payunir. Kasin sinali yo la itan? Inyugali na arum a gawaen itan a tinaon. Diad dakel a kongregasyon et amayamay so manangipalapag a manbabansag a mangaaplay bilang auxiliary payunir, tan nagmaliw itan a makatumang tan sankaliketan a kimey na kongregasyon legan na taon. Kasin ni-eskedyul yoy sakey a magayagan bulan na pan-auxiliary payunir legan na panaon na Memoryal? Say Abril so nayarin nagkalalo lan maabig a bulan parad arum, lapud walaan itan na limaran sampot-simba.

6. Antoran makapaliket a probisyon so nitarya?

⁶ Kasin say kongregasyon yo so akaeskedyul a bisitaen na manangasikaso na sirkito legan na Marso, Abril, odino Mayo? Nilukas sirin ed sikayo so kaaruman a bendisyon. Unong a niyanunsio ed apalabas, legan na 2006 a serbisyon taon, amin a manlilingkor bilang auxiliary payunir legan na bulan na bisita na manangasikaso na sirkito so imbitaan ya onatendi ed unonan kabiangan na miting na saray payunir legan na simba na bisita. Seguradon say makapabiskeg ed espiritual ya impormasyon a nitarya ed sayan miting so ontulong ed dakel ya auxiliary payunir pian dampoten day pagmaliw a regular payunir. Niarum ni, legan na Marso et pankanawnawa tayon tulongan so totoo ya ondago ed espiritual a liwawa panamegley na balon aaralen a publikasyon ya Anto so Peteg ya Ibabangat na Biblia? Akin ta no gawaen yon kalat so pangigapoy panangiyaral na Biblia ed sayan balon libro?

7, 8. (a) Antoy ontulong ed sikatayo ed panggawa na eskedyul pian makapan-auxiliary payunir? (b) Panon a makatulong so kooperasyon na pamilya, tan panon a say interon pamilya so nagunggonaan?

⁷ Legan yon kokonsideraen so kakaukolanen a 50 oras ed auxiliary payunir, determinaen no anton eskedyul so mangiyabuloy ed sikayon mangisindag ed liwawa na katuaan ed manga 12 oras kada simba. Itongtong itan ed saramay matalona lan nanggawa ed satan, ontan met ed arum. Saya so nayarin mamaseseg ed sikaran miulop ed sikayo. Panamegley na maabig a panagplano, saray kalangweran ni odino matatken laran bautismadon manangipalapag so akaimano ya aliwan mairap a dampoten iyan alay abig a kalat. Ipikasi itan. Insan, no posible, iplano yo, tan panggayagaan so panag-auxiliary payunir!​—Mal. 3:10.

⁸ Dakel a pamilya so akaeksperiensya a say pansusuportaan na sakey tan sakey so manggawan posible a nadampot na anggan sakey labat a membro na pamilya iyan kalat. Denesidi na sakey a pamilya ya amin a limaran bautismadon membro na pamilya so mangaplay bilang auxiliary payunir. Duara nin ananak ya agni abautismoan so nampeleng a mamalaknab ed aktibidad da. Panon ya agunggonaan so pamilya ed lalon impansagpot da? Insulat da: “Satan so alay abig a bulan, tan talagan alikna min inmelet so bedber na pankakasakey mi bilang pamilya. Salamat ed si Jehova lapud alay abig a bendisyon!”

9. Panon tayon napasindag so silew tayo legan na sayan panaon na Memoryal?

⁹ Kasin say espisyal a kimey tayo legan na Marso, Abril, tan Mayo et peteg a makapaligsa, a mamaapit ed sikatayo ed mangatatawen ya Ama tayo? Akadependin tuloy itan ed personal a sagpot tayon napaaralem so aro tayo ed Dios tan ed Anak to tan diad panamalaknab ed pibibiang tayo ed ministeryo. Komon ta aligen tayo so determinasyon na salmista, ya angikanta: “Pisalamatan ko na balbaleg si Jehova ed sangik, On, sikato so idayew ko ed leet na dakerakel.” (Sal. 109:30) Bendisyonan nen Jehova so maseseg a kimey tayo ed sayan panaon na Memoryal. Kanian komon ta pasindagen tayoy baleg a silew tayo pian dakel so ompaway ed kabilungetan tan ‘nawalaan na silew na bilay.’​—Juan 8:12.