Panon Mon Ebatan?
1. Antoran angat so aarapen na dakel ed sikatayo?
1 Kasin papablien yon maong so Salita na Dios balet ta nairapan kayon mananda ed saray detalye nipaakar ed saray salaysay na Biblia odino mananap na espisipiko iran balikas ed Kasulatan? Kasin labay yon nawalaan iray ananak yo na suston pakatalos ed manuna iran katuaan tan bangat na Biblia? Say espisyal ya artikulo a “How Would You Answer (Panon Mon Ebatan)?” a nipapalapag kada bulan ed pahina 31 na Awake! so ontulong ed balanglan ugugaw ni odino maedad la pian nikabisado so Salita na Dios.—Gawa 17:11.
2. Panon a nausar iray nanduruman seksion na artikulon “How Would You Answer?
2 Panon yon epektibon nausar iyan artikulo? Onia iray suhestion na Enero 2006 ya isyu na Awake!: “Nengnengen pan magano so pahina 31 . . Arum iran seksion na pahina so makapasagyat ed saray manbabasan ugugaw ni; arum so manubok ed memorya na mas dakel lay pikakabat da ed Biblia. Say seksion a ‘When in History?’ so ontulong ed sika pian nadetermina no kapigan a nambilay iray karakter ed Biblia tan no kapigan agawa iray manunan ebento. Saray ebat ed maslak ya arum niran tepet so naromog ed niganan pahina ed parehon isyu, a saratan so niimprinta a baliktar, bangta saray ebat ed seksion a ‘From This Issue’ so naanap ed interon magasin. Akin ya agni mansukimat antis yon basaen iratan ya ebat insan inabang ed arum so naaralan yo? Nayari yo ni ingen ya usaren iyan balon artikulon, ‘How Would You Answer?’ a pangibasiyan na paningbat yo ed Biblia bilang pamilya odino grupo.”
3. Panon ya agunggonaan iray pigaran pamilya ed sayan artikulo, tan dinan iran seksion so panliliketan yon maong?
3 Talagan dakel a pamilya so malabay a mangusar ed sayan artikulo bilang kabiangan na pampamilyan panagaral da. Onia so insulat na sakey ya ina: “Ninonot min sanasawa a maabig no ilaktip so ‘Children’s Picture Search’ ed pampamilyan panagaral mi ta pian napansiansian mabilabilay tan makapainteres ed taloy taon ya anak min bii so panagaral mi. Makakaliket kami a makanengneng a panlikliketan ton sansakey a bukayen iray pahina na kopya ton Awake! anggad naromog toy aanapen to.” Inkuan met na sakey ya ama diad Brazil: “Siak tan say pitoy-taon ya anakon laki et labalabay min maong iyan artikulo ed Awake! Akatulong iya ed si Moises a manimanon maong, pian anapen iray Kasulatan, pian natalosan so kabaliksan na saray litrato, tan pian nadetermina iray petsa.” Onia so insulat nen Ashley, a mantaon na walora: “Salamat ed artikulon ‘How Would You Answer?’ ed beneg na Awake! Dakel so nanaaralan ko ed satan nipaakar ed Biblia.”
4. Panon a nausar na pamilya iyan artikulo diad pampamilyan panagaral da ed Biblia?
4 Akin ya ag-usaren so “How Would You Answer?” a sagpaminsan bilang kabiangan na pampamilyan panagaral yo? Nayari yon usaren so Index odino Watchtower Library ed CD-ROM pian anapen iray ebat ed pigaran mas mairap a tepet. Diad panggawa ed satan, nabangatan yoy ananak yo no panon so pansukimat. No walay baleg laran ananak yo, akin ta no ikdan yo ira na medyo mairap, a singa say pananap na saray ebat ed “Who Am I?” odino “When in History?” antis na pampamilyan panagaral yo? Diad ontan et nayarian dan inabang iray asukimat da legan na panagaral. Say epektibon pangusar ed sayan pahina et sakey a paraan pian nipaslep na atateng ed ananak da so Salita na Dios, ya ontulong ed sikaran naamtaan iray “masanto a Sulsulat” manlapud inkaugaw.—2 Tim. 3:15; Deu. 6:7.