Tepet
◼ Antoray kapeligroan na pan-Internet pian mitalosan ed sakey ya agkabat?
Dakel iray Web site a denesinyon nakabat tan nakatongtong so totoo diad Internet. Dakel ed sarayan site so mangiyaabuloy ed saray indibidual a manggawa tan mangiyan na antikey a bayograpiya ra, a kalaktip iray litrato tan arum niran personal ya impormasyon. Diad ontan et onkontak met la iramay totoon makapangilukas ed satan. Saratan a Web site et popular ed saray kalangweran, tan walaray tobonbalo ed kongregasyon a manlulukas met ed saratan pian mitongtong ed arum a mankuan a Tasi nen Jehova.
Magmainomay ya itila na toon akabat labat ed Internet so tudtuan inkatoo to, say espiritualidad to, odino say getma to. (Sal. 26:4) Nayarin say sakey a toon mangibabaga a Tasi nen Jehova et sakey manayan agmananisia, adispelosip, odino aktibon apostata ni ingen. (Gal. 2:4) Base ed saray report, dakel a pedophile [odino maedad la a seksual a mangaabuso ed ugugaw] so manlulukas ed saratan a Web site pian makalmo na biktimaen.
Anggano kombinsido itayo a saramay katalosan tayo et maabig so reputasyon da ed kongregasyon, magmainomay ya onarap ed makapuy a tongtongan so ontan a pi-Internet. Say rason et agpokpokan na totoo so pananalita ra ed saramay agda ni personal ya akabat. Nayarin moriaen da a no gagawaen da itan et siksikara labat, kanian ipapasen da ya anggan antoy ibaga ra la et ag-itan makasabi ed saray atateng da odino ed saray mamatatken. Makapaermen ta apatitan so pigara ed saray Kristianon kalangweran tan pati sikara et nagmaliw lan mabanday so panagsalita ra. (Efe. 5:3, 4; Col. 3:8) Saray arum et angitekep ed saray makapaayat ed sekso a litrato ra, bastos iran pangaran, odino saray music video a misiglaotan ed bulgaran a pisesekso.
Lapu ed sayan nagagawa, nepeg a bantayan na atateng so panguusar na ananak da ed kompyuter. (Uli. 29:15) Delikado so pangimbita’d abung ed sakey ya agtayo kabat odino pangiyabuloy ed sikato a nasolo to iray anak tayo. Mipadpara ed satan, mapeligro so pikaaro tayo odino na saray anak tayo ed agkabat diad pan-Internet, anggano ibaga ra nin Tasi nen Jehova ira.—Uli. 22:3.