Balon Programa ed Sirkiton Asemblea

Makanepegan si Jehova ya igloria. Panon tayon iglogloria si Jehova? Antoran angat so aarapen na arum ed sayan pamaakaran? Antoran bendisyon so nagamoran na saramay mangigloria ed Dios natan? Say programa na sirkiton asemblea parad 2008 so mangiter na makapenek iran ebat ed sarayan tepet. Walaan itan na teman “Gawa Yo ya Amin ed Gloria na Dios.” (1 Cor. 10:31) Nonoten no anto so akatarya ed sikatayo ed loob na duay agew na daakan ya espiritual a panangibangat.

Ipaliwawa na manangasikaso na distrito so teman “Akin ya Igloria so Dios?” tan “Magmaliw ya Ehemplo ed Pangapet na Saray Kakaukolanen na Dios.” Iter to so publikon paliwawa a, “Siopa Iray Totoon Mangidadayew ed Dios?,” tan say pansampot a paliwawan, “Nankakasakey a Mangiglogloria ed Dios Diad Sankamundoan.” Ikondukta to met so Teokratikon Eskuelaan Parad Ministeryo. Ipaliwawa na manangasikaso na sirkito iray teman “Panliketan so Pangisindag na Gloria na Dios,” “Pangimano ed Saray Pankaukolan na Sirkito,” tan “Mansiansia ‘Kayon Maligen ed Katuaan,’” a nibase ed 2 Pedro 1:12. Niarum ni, naaralan tayo no panon a “Say Panagpayunir so Mangiglogloria ed Dios.” Say unonan makapaligsan simposium, “Pangigloria ed Dios Diad Amin ya Aspekto na Kabibilay Tayo,” so mangusisa ed aralem a kabaliksan na apuyanan iran salita a naromog ed 1 Corinto 10:31. Nasingbat ed simposium a “Pangiyapay na Sagradon Serbisyo Pian Dayewen si Jehova” so nanduruman aspekto na panagdayew tayo. Panggayagaan tayo so sumaryo na Say Panag-Bantayan tan say paningbat ed inagew-agew a teksto ed Simba. Wala met so pankanawnawa parad bautismo.

Karaklan ed katooan so agmamibidbir ed Dios. Dakel met so naabala ed saray nambabangil a gegemtan kanian agda la namomotektek so karlangan nen Jehova. (Juan 5:44) Balet kombinsido itayo ya importante ya usaren so panaon tayo diad pangonsidera no panon a ‘Gawaen so Amin ed Gloria na Dios.’ Iyareglo yoy pakaatendi yo tan sigpot a pakagunggona ed amin ya apatiran sesyon.