Balon Programa ed Sirkiton Asemblea

Panon itayon makatalindeg a malet ed saramay pirmin onsusumpa ed tuan panagdayew? Panon tayon naresistian so agmanundan panasali nen Satanas ya ipawil itayo ed marelmeng a mundo to? Sarayan importantin tepet et naebatan diad programa na sirkiton asemblea parad 2009. Say tema et “Itultuloy Mo a ‘Daegen na Maong so Mauges.’” (Roma 12:21) Imanoen pa no antoray manatalaran ed sikatayo.

Ipresenta na manangasikaso na distrito iray paliwawan “Pinabiskeg Pian Daegen na Maong so Mauges,” “Manalwar ed Sobran Kompiyansa ed Sarili!,” “Magano Lan Manampot so Kaugsan!,” tan “Pabiskegen so Pananisia Tayo Pian Nadaeg so Mundo.” Ipaliwawa met na manangasikaso na sirkito iray teman “Natan La so Panaon Pian Mansiansian Aliing!” a base ed Roma 13:11-13, tan “Agyo Pakakapuyen so Linawa Yo ed Agew na Segsegang,” a base’d Uliran 24:10. Talaranan tayo met so parte ton “Pangimano ed Saray Pankaukolan na Sirkito.” Say sananey nin makapakiwas a parte et say paliwawan “Sarag Tayo Kasin ‘Iter so Inkasikatayo ed Sayan Ministeryo’​—Panamegley na Panagpayunir?” Say unona ed duaran simposium et apauloan na “Ontalindeg a Malet Sumpad Masilib Iran Gawa na Diablo.” Ontulong iya ed sikatayon nabidbir tan ipulisay iray masilib a pakana na Diablo diad pamaakaran na teknolohiya, panagligliwaan, tan edukasyon. Say simposium ya “Onggamor na Biskeg Pian Naresistian si Satanas Diad Sayan Mauges a Panaon” so mangibangat ed sikatayo no panon a mas niyaplika so impuyan a simbawa a walad Efeso 6:10-18.

Direktan mansiglaotan so isusumpa ed lapuan na kaugsan tan say panangipulong ed mensahe na Panarian. (Apo. 12:17) Agla pankelawan ya ag-ontutunday Satanas diad pinasyan panangataki to ed saray Tasi nen Jehova! (Isa. 43:10, 12) Balet ta seguradon say Diablo et nadisdismaya labat ta determinado itayon itultuloy a ‘daegen na maong so mauges.’ Manggawa kayo sirin na saray seguradon plano pian naatendian yon amin iyan apatiran sesyon na sirkiton asemblea.