No Anto so Ibaga Nipaakar ed Saray Magasin

Say Panag-bantayan Set. 15

“Labay ko pan naamtaan so opinyon yo ed ibabaga na saya. [Basaen so Deuteronomio 32:4.] Kasin naumameng yo la, a no say Dios et makapanyarin amin tan makatunongan, akin et dakel so paniirap tan karelmengan ed mundo? [Abuloyan ya onebat.] Ipapaliwawa na sayan magasin no akin ya aabuloyan ni na Dios so karelmengan anggad panaon tayo.”

Awake! Set.

“Pilalek na maslak ed sikatayo so maabig a bunigas tan andukey a bilay. Diad padesir yo et say pansiansian positibo so mamarakep ed bunigas tayo? [Abuloyan ya onebat. Insan basaen so Uliran 17:22.] Sisingbaten na sayan artikulo no akin a say positibon awawey et makagunggonan paaligwasen.” Iparungtal so artikulo ed pahina 26.

Say Panag-bantayan Okt. 1

“Kasin nibaga yo la ed inkasikayo, ‘aliwan onman komon so ginawak’? [Abuloyan ya onebat.] Imanoey ibabaga na saya no akin a no maminsan et makapandedesisyon tayo a pagbabawian tayo ed saginonor. [Basaen so Jeremias 10:23.] Ipapaliwawa na sayan magasin no panon a say praktikal a simbawa a naromog ed Biblia so ontulong ed sikatayon manggawa na maabig a desisyon.”

Awake! Okt.

“Kasin diad padesir yo et mas walad kapeligroan iray ugugaw natan nen say nensaman? [Abuloyan ya onebat.] Iisipen na dakel a manbibilay itayo la ed panaon ya adeskribe dia. [Basaen so 2 Timoteo 3:1-5.] Sayan magasin so mangiiter na praktikal iran suhestion no panon a nasalimbengan na atateng iray ananak da ed saray manag-abuso ed sekso.”