Pangaligan Iran Presentasyon

Pangigapoy Panangiyaral na Biblia ed Unonan Sabado na Marso

“Ombibisita kamin magano lapud samay nagawa no Abril 14. Aya may petsa na anibersaryo na impatey nen Jesus. Selebraan iya na arum ta parad sikara et importante so impatey to. Balet say arum et agsegurado ed kaimportantian na impatey nen Jesus. Parad sika, wala kasi naitulong na impatey nen Jesus ed sikatayo?” Abuloyan ya onebat. Ipanengneng so beneg na Marso 1 ya Watchtower, tan pantongtongan so unonan tepet tan anggan sakey a teksto. Iyopresi iray magasin, tan iyeskedyul ya pantongtongan so onsublay ya tepet.

Say Panag-bantayan Marso 1

“Ombibisita kamin magano pian pantongtongan so sakey a bengatlan makakaapekto ed sikatayon amin​—say ipatey na inarod bilay. Miaabobon ka kasi ya say pakaandi na pinablin kaaro odino kanayon et sakey ed saray sankairapan ya awaten? [Abuloyan ya onebat.] Dakel so naliligliwa ed sayan bersikulo ed Biblia. [Basaen so Isaias 25:8.] Ipaliwawa na sayan magasin so makapabiskeg ya pormisa na Biblia ya naandi so ipapatey tan napaoli iray inad-aro tayon inaatey.”

Awake! Marso

“Ombibisita kamin magano pian ipaliwawa so lingon pakatalos ed sayan bersikulo na Biblia. [Basaen so Genesis 1:1.] Wala ray manisian say uniberso et pinalsa, balet ag-itan panisiaan na arum. Antoy opinyon mod saya ey? [Abuloyan ya onebat.] Dakel so agmanisia ed impamalsa lapud walay ibabangat na saray lider na relihyon ya agmet talaga ibabaga na Biblia. Walad sayan magasin so makatunongan tan napanmatalkan ya eksplinasyon na Biblia nipaakar ed inggapo na uniberso.”