Legan na Panaoy Memoryal, Kasin Aligen Moy Seseg nen Jehova tan Jesus?
1. Antoy pansasagpotan na saray Tasi nen Jehova no panaoy Memoryal?
1 Maseseg ya susumpalen nen Jehova so gagala to. Oniay ibabaga na Isaias 9:7 nipaakar ed saray bendisyon na Panarian na Dios: “Say paga [“seseg,” NW] nen Jehova na saray ehersito so manumpal ed saya.” Ontan met, impanengneng na Anak na Dios so seseg to parad dugan panagdayew legan na ministeryo tod dalin. (Juan 2:13-17; 4:34) Kada panaon na Memoryal, mansasagpot so minilyon ya manangipalapag ed interon mundo ya aligen so seseg nen Jehova tan Jesus diad pamapalaknab day ministeryo ra. Kasin sakey kad sikara?
2. Lapud seseg tayo, antoy gawaen tayo manlapud Marso 7?
2 Kampanya Parad Memoryal: Diad sayan taon, say kampanya tayon mangimbita parad Memoryal et onggapo no Sabado, Marso 7. Manplano la natan pian maseseg ya mibiang ed ministeryo. Seguradon malikeliket iray kongregasyon legan dan gagawaen so anggaay nayarian dan kimeyan so interon teritorya da. Pansagpotan ya imbitaan iray iyaaralan, papawilen, katrabaho, kakanayon, tan kaeskuela diad pangiter ed sikara na imbitasyon odino diad pangusar ed jw.org.
3. Panon tayon napalaknab so ministeryo tayo legan na Marso tan Abril?
3 Man-auxiliary Payunir: Pakiwasen itayo met na seseg ya palaknaben so ministeryo tayo. Seguradon dakel so makapan-auxiliary payunir legan na Marso tan Abril, lapud sarag tayon pilien so 30 oras ya aabeten. Diad panagdayew na pamilya odino personal ya panagaral yo, ipikasi tan ikonsidera no panon yon nagawaan iya. (Uli. 15:22) Lapud seseg mod sayan kampanya, ompan napakiwas so arum ya magmaliw met a maseseg. No i-adjust moy eskedyul mo pian mas dakel so nagawaan mo, aaligen moy inkaseseg nen Jesus.—Mar. 6:31-34.
4. Anto ray maabig a resulta no aligen tayoy seseg nen Jehova tan Jesus?
4 Dakel so maabig iran resulta no aligen tayoy seseg nen Jehova tan Jesus diad panaoy Memoryal. Mas dakel so napulongan ed teritorya tayo. Nalikna tayoy liket tan inkapnek ed panlingkor ed si Jehova tan pangiter ed arum. (Gawa 20:35) Tan say sankaimportantian, napaliket tayoy maseseg a Dios tayo tan say Anak to.