Panangusar ed Mikropono

BALEG a panaon tan sagpot so uusaren na saray Kristianon agagi tayo diad iyatendi ed saray Kristianon pantitipon. Ta pian nagunggonaan ira ed nibabaga, nakaukolan dan narengel a malinew.

Diad panaon na Israel nensaman, anggapo so de-koryentin panagpakasil na tanol. Sanen nansalitay Moises ed nasyon na Israel diad saray Patar na Moab sakbay na inloob da ed Insipan a Dalin, panon itan a narengelan na amin a dumerengel to, a manbilang na minilyon? Posiblin inusar nen Moises iray lalakin nantataluntonan ed matukoy iran pasen diad interon kampamento pian ipasabi da iray imbaga to. (Deut. 1:1; 31:1) Ag-abayag kayarin asamsam na Israelitas so dalin ed sagur na Jordan, tinipon nen Josue so nasyon diad arap na Palandey Gerizim tan Palandey Ebal, mapatnag a kaiba iray Levita ed alosadsar a nambaetan da. Diman et nadngel na amin a totoo tan inmebat ira ed saray madibinon bendisyon tan ayew a nipresenta ed sikara. (Jos. 8:33-35) Posibli a dia met ed sayan inkagawa, nausar so pangipasabi na sakey diad sananey a too, balet andi-duaruwan say sankaabigan a balandra na tanol ed saman a pasen so akatulong met.

Ngalngalin 1,500 taon ed saginonor sanen ‘nantitipon so abalbaleg ya ulop’ ed Dayat na Galilea pian ondengel ed si Jesus, sikato so linmugan ed baluto, intulak ton inyarawi ed aplaya, tan yinmurong a nansalita ed ulop. (Mar. 4:1, 2) Akin a si Jesus so nansalita manlapud baluto? Mapatnag lapud say boses na too so malinlinew a narengel diad idalan ed tapew na danum.

Anggad kagapo na koma-20 siglo, say kakasil tan kalinew na boses na mansasalita so mabetbet a nadetermina ed no kaunongan karakel ed saray dumerengel so makadngel ed nipapaliwawa. Anggaman ontan, diad inggapo na dekaday 1920, inanamot na saray lingkor nen Jehova so de-koryentin panagpakasil na tanol ed boses na too diad saray kombension da.

Saray Kagawaan a Parad Tanol. Nayarian na ontan a kagawaan a pakasilen a maong so boses na mansasalita ingen nakontrol so dugan kalidad tan tono na boses to. Agnakaukolan ya onulangab so manpaliwawa. Agla nairapan iray dumerengel ya ondengel ed walan nipapaliwawa. Imbes, nisentro so imano ra ed mensahe.

Dakel so gagawaen pian naseguron akaparaan so maabig iran kagawaan parad tanol diad saray kombension tan asamblea na Tastasi nen Jehova. Niarum ni, dakel a Kingdom Hall so manguusar na saray kagawaan a parad tanol pian pakasiley boses na saraman so manpaliwawa, mangikondukta ed saray miting, odino manbasa ed plataporma. Tan walaray kongregasyon a walaan met na saray mikroponon nausar na saray dumerengel diad pankomento legan na saray miting. No say kongregasyon yo so walaan na ontan iran kagawaan, aralen ya usaren itan a maong.

Pigaran Manunan Pananontonan. Pian susto so pakausar na saratan a kagawaan, nodnonoten iray onggendan a punto: (1) Nepeg a say kaarawi na mikropono ed sangim et anggad apatira odino anemiran pulgada. No masyadon asingger so mikropono, nayarin agnatalosan iray salitam. No masyadon arawi, aliwan malinew so boses mo. (2) Nepeg a say mikropono so walad arap mo, aliwan diad diking. No iyarap mo so ulom ed kawanan odino diad kawigi, mansalita labat sano akaarap ka la ed mikropono. (3) Ikakkasil mo na daiset so pansalitam nen say no mitotongtong ka. Balet agnakaukolan so pankulyaot. Mainomay ya ipasabi na saray kagawaan a parad tanol so boses mo anggad saramay sankaarawian ed dumerengel mo. (4) No kaukolan ya onsigam ka odino makaka-ukok odino makaka-basis ka, seguroen mon agka akatutob ed mikropono.

Sano Mandidiskurso. Sano onalagey ka la ed arap na podyum, kaslakan et ikompronta na sakey ya agin laki so mikropono. Onalagey a maptek ya akaarap ka ed saray dumerengel legan ya ikokompronta to. Itapew moray notam ed podyum, tan seguroen ya agnasaniban iratan na mikropono.

Sano onggapo ka lan mansalita, dengelen no panon so tanol na boses mo legan ya ompapaway ed loudspeaker. Kasin sobray kasil, odino maganalgal iray salitam? Nayarin onarawi na sakey odino duaran pulgada. No papasikmatan moray notam, tandaan a sika so mansalita tan manbasa lambengat sano say lupam so akaarap ed mikropono odino atagey na daiset, aliwan abeba.

Sano Manbasa ed Plataporma. Maabig no akaatagey so Biblia odino arum a publikasyon ta pian say lupam so akaarap ed saray dumerengel. Lapud say mikropono so nayarin akaarap ed sika, nayarin kaukolan mon bembenan so babasaen mo ed sakey a diking. Kabaliksan na saya a say ulom so medyo akadere ed sananey a diking na mikropono. Ta pian no manbasa ka et ondirekta so boses mo ed mikropono.

Maslak ya agagin lalakin manbasa ed Panag-aral na Panag-Bantayan so onalagey tan mansalita ed akakabit ed maptek a patoonan na mikropono. Sayan posisyon so manggawa ed sikaran makaingas na balibali tan manbasan lalon mabalikas. Tandaan a say pambasa ed saray parapo so manunan kabiangan na miting. Say gunggonan nagamoran na saray dumerengel so mandepende, a nagkalalon tuloy, diad pandengel ed materyal a babasaen.

Sano Mankomento ed Miting. No manguusar so kongregasyon yo na saray mikropono parad pibiang na saray dumerengel, tandaan a wala nin siansia so pankaukolan na pansalitan mabitar tan diad magenap a kakasil. Sano mankokomento, panggunaetan mon bembenan so aaralen a publikasyon odino say Bibliam. Saya so ontulong ed sika pian nanengneng mon malinew so materyal legan a mansasalita ka ed mikropono.

Saray agagin lalaki ed arum a kongregasyon so napabtangan a mangiderew na mikropono ed saray natawag a mankomento. No ontan so kipapasen ed kongregasyon yo, sano natawag ka, pansiansiam ya akaatagey so limam pian nanengneng na agin mandederew na mikropono so niyurongan mo pian niderew to’d sikan tampol. No say mikropono so eegnaan, akaparaan a mangawat ed satan. Agka ni mankokomento ya anggad akaposisyon la so mikropono. No asumpal ka lan nankomento, ipawil mon tampol so mikropono.

Sano Mibibiang ed Demostrasyon. Nakaukolan a nonoten mo nin unona so pangusar na mikropono ed sakey a demostrasyon. No say mikropono so walad patoonan, mainomay so duaran limam a manbukay ed Biblia tan ed saray notam. Say pangusar ed eegnaan a mikropono so nayarin mamainomay ed sikan makakiwas-kiwas, balet ta nayarin paegnaan mo itan ed kaibam. Diad ontan et mainomay mon naegnaan so Bibliam. Saya so nepeg ya ipasal mo tan say unabung mo ta pian naamtaan na kaibam no panon so manepeg a pangegna ed satan. Tandaan met, a sano walad plataporma, kaukolan ya agmo ibebeneg iray dumerengel, nagkalalo la sano mansasalita ka.

Diad saray demostrasyon ed Service Meeting, nayarin walaray pigaran mibibiang, tan nayarin sikara so onalis-alis diad plataporma. Sirin, nayarin nakaukolan so pigaran mikropono. Nepeg a saraya so akapasen lan masakbay odino niiter la ed saray mibibiang sano sikara so onla la’d plataporma. Pian naseguro a saray mikropono so walad suston pasen diad dugan panaon, nakaukolan so masakbay a panagplano. Nabangatan la iray mibibiang ya epektibon mangusar ed saray mikropono no ipasal la iray demostrasyon sakbay ya ipresenta. Sano agnagawa so panagpasal ed plataporma, nayarin makabat ed saray mibibiang so pamemben na bengatlan mipara ed kabaleg na mikropono ta pian nipasal so dugan panangiposisyon. Kayari na demostrasyon, nepeg a maalwar ya igaton na saray mibibiang iray mikropono, a maalwar ya agnasagor iray kuldon na arum a mikropono no sikara lay onalis ed plataporma.

Say pangimano tayo ed panangusar na saray mikropono so direktan misiglaotan ed sakey ed saray manunan gagala na saray miting tayo, salanti, nagunggonaan so balang sakey diad panisingbat tayo ed Salita na Dios. (Heb. 10:24, 25) Diad panaral ed epektibon panangusar ed mikropono, personal itayon makapanginabang ed sayan importantin gagala.