Say Panmoria Yo ed Kamarerwa So Mangapekta ed Bilay Yo
“Say too so nagmaliw a mabilay a kamarerwa.”—GENESIS 2:7.
1, 2. Anto so sisisiaen na maslak a relihyon nipaakar ed too tan say kamarerwa?
NGALNGALIN amin a relihyon so mangibabangat a say too so walaan na ag-ompatey a kamarerwa. Ibabaga na New Catholic Encyclopedia a say kamarerwa so “pinalsa na Dios tan intekep to ed laman diad nginew.” Ibabaga to met a say doktrina na ag-ompatey a kamarerwa “so sakey ed saray baton-panukong” na saray iglesia na Kakristianoan. Mipara, “say kaisipan na Moslem,” kuan na The New Encyclopædia Britannica, “so mangitantandoron say kamarerwa so niwala ed parehon panaon a singa say laman; kayari to, walaan na bilay ed inkasikaton dili, say inkikasakey to ed laman so temporaryon kipapasen.”
2 Saray ontan a relihyon so manisia a say kamarerwa so ontaynan ed laman diad kasikmat na patey tan manbilay a maando, a say destino to so mangatatawen a liket, temporaryon panayam ed purgatoryo, odino maandon kapairap ed mandarlang ya impierno. Say patey so impasen a puertan mamaarap ed maandon bilay ed espiritun ayaman. A singa imbaga na sakey a managsulat ed libron We Believe in Immortality: “Impasen ko so Patey a bilang baleg tan maglorian panagpasyar. Impasen ko so Patey a bilang sakey a madibinon promosyon.”
3. Anto so sisisiaen na saray nanduruman relihyon ed Bukig?
3 Saray Hindus, Budista, tan saray arum so manisia ed transmigrasyon. Saya so mangisasakup ed pananisia a diad patey et say kamarerwa so nareinkarnado, nianak-lamet a bilang sananey a too odino sananey a mabilay a bengatla. No say sakey a too so maong, nibaga a say kamarerwa to so nianak-lamet a bilang sakey a too ed atagtagey a puesto. Balet no sikato so mauges, sikato so nianak-lamet a bilang sakey a too ed abebbeban puesto odino anggan bilang sakey ya ayep odino sakey a bigis.
4, 5. Akin ya importante so pangamta ed katuaan nipaakar ed kamarerwa?
4 Anggaman kuan, anto no saray totoo so andian na ag-ompatey a kamarerwa? Anto no say patey so aliwan “sakey a madibinon promosyon,” aliwan asingger a puertan mamaarap ed maandon maespiritun bilay odino diad reinkarnasyon, ed amin ya ompatey? Sirin say ag-ompatey-a-kamarerwan pananisia so mangitonton ed sakey diad lingon direksion. Ibabaga na libron Official Catholic Teachings a say iglesia so mangipipilit ed ag-ompatey-a-kamarerwan pananisia lapud say agpanisia ed satan so “mangiter na andi-kabaliksan odino agnatalosan iray pikakasi to, saray ritual to ed ponpon tan saray relihyoson gawan iyapay ed saray inaatey.” Kanian say kurang na sakey ed bilay, panagdayew, tan maandon arapen so nalalanor.—Uliran 14:12; Mateo 15:9.
5 Importante so pakaamta ed katuaan nipaakar ed sayan sisisiaen. Inkuan nen Jesus: “Saramay mandadayew [ed Dios] so nepeg a mandayew ed espiritu tan katuaan.” (Juan 4:24) Say katuaan nipaakar ed kamarerwan too so naromog ed Salita na Dios, say Biblia. Say apuyanan a Kasulatan so nankarga ed panangiparungtal na Dios ed saray gagala to, kanian sikatayo so makapanmatalek ya ibabaga to ed sikatayo so katuaan. (1 Tesalonica 2:13; 2 Timoteo 3:16, 17) Inkuan nen Jesus ed pikakasi ed Dios: “Say salitam so katuaan.”—Juan 17:17.
Apalsan Walaan na Ag-ompatey a Kamarerwa?
6. Anto so malinlinew ya ibabaga na awaran na Biblia ed sikatayo nipaakar ed inkapalsa na too?
6 Ibabaga ed sikatayo na Genesis 2:7: “Intuloy nen Jehova a Dios a tibukelen so too a manlapud dabok na dalin tan isibok ed saray eleng to so linawa na bilay, tan say too so nagmaliw a mabilay a kamarerwa.” Ag-ibabaga na awaran ya intanem na Dios ed too so sakey ya ag-ompatey a kamarerwa. Ibabaga to a sanen say pakayari na Dios so amabiskeg ed laman nen Adan, sikato so “nagmaliw a mabilay a kamarerwa.” Sirin say too so sakey a kamarerwa. Sikato so andian na sakey a kamarerwa.
7. Akin a saray totoo so niiyan ed dalin?
7 Pinalsa na Dios si Adan pian manbilay ed dalin, aliwan diad tawen. Say dalin so aliwan basta panagsubokan a dalin pian nengnengen no kasin si Adan so kualipikado ed tawen. Tinibukel na Dios so dalin “pian panayaman,” tan si Adan so inmunan toon nanayam ed satan. (Isaias 45:18; 1 Corinto 15:45) Saginonor, sanen pinalsa na Dios si Eva bilang asawa nen Adan, say gagala na Dios ed sikara et say pamano ra ed dalin tan pagmaliwen dan sakey a paraiso bilang maandon ayaman na katooan.—Genesis 1:26-31; Salmo 37:29.
8. (a) Diad anto a say kiwawala nen Adan so kondisyonal? (b) No si Adan so agnankasalanan, iner komon so nantultuloyan ton nanayaman?
8 Anggapo so ibabaga na Biblia a say kabiangan nen Adan so ag-ompatey. Did kasuniyan, say kiwawala to so kondisyonal, niletneg diad katutulok ed ganggan na Dios. No satan a ganggan so sumlangen to, anto sirin? Maandon bilay ed espiritun ayaman? Andin balot. Imbes, sikato so “peteg ya ompatey.” (Genesis 2:17) Sikato so ompawil ed nanlapuan to: “Sika so dabok tan diad dabok sika so ompawil.” (Genesis 2:7; 3:19) Si Adan so andian na kiwawala sakbay na inkapalsa to, tan sikato so andian kayari na impatey to. Sirin sikato so walaan labat na duaran pampilian: (1) katutulok tan bilay odino (2) katutunganga tan patey. No si Adan so agnankasalanan, sikato komon so nambilay ed dalin na ando lan ando. Sikato so agbalot onla ed tawen.
9. Anto so dugan impanawag na Biblia ed patey, tan akin?
9 Tinmunganga si Adan, tan sikato so inatey. (Genesis 5:5) Patey so dusa to. Saman so aliwan puerta a mamaarap ed sakey a “maglorian panagpasyar” noagta puerta a mamaarap ed agkiwawala. Sirin, say patey so aliwan sakey a kaaro noagta sikato so tatawagen na Biblia, sakey a “kabusol.” (1 Corinto 15:26) No si Adan so walaan na sakey a kamarerwan ag-ompatey ya onla ed tawen no sikato so matulok, sirin say patey so sakey a bendisyon. Balet aliwan ontan. Sikato so sakey ya ayew. Tan diad kasalanan nen Adan, say ayew a patey so linmaknab ed amin a too lapud amin so kapolian to.—Roma 5:12.
10. Anton seryoson problema so onlesa diad panisia a si Adan so walaan na ag-ompatey a kamarerwa?
10 Niarum ni, no si Adan so apalsan walaan na ag-ompatey a kamarerwan napairap ed ando lan ando ed mandarlang ya impierno no sikato so mankasalanan, akin a sikato so agpinasakbayan ed saya? Akin a nibaga lambengat ed sikato a sikato so ompatey tan ompawil ed dabok? Agaylan aliwan makatunongan so pangondena ed si Adan ed maandon kapairap diad katutunganga, ingen ta agpinasakbayan ed satan! Anggaman ontan, diad Dios et “anggapo so ag-inkahustisya.” (Deuteronomio 32:4) Anggapo so pankaukolan na pamasakbay ed si Adan na nipaakar ed mandarlang ya impierno a para ed saray ag-ompatey a kakamarerwa na marelmeng. Say ontan ya impierno so anggapo, nisaray ag-ompatey a kakamarerwa so wala. (Jeremias 19:5; 32:35) Anggapo so maandon kapairap diad dabok na dalin.
Impangusar na Biblia ed “Kamarerwa”
11. (a) Diad Biblia et say Ingles a salitan “soul” so nanlapud antoran Hebreo tan Griegon salita? (b) Panoy impangipatalos na King James Version ed saray Hebreo tan Griegon salita a para ed “kamarerwa”?
11 Diad Hebreon Kasulatan, say Ingles a salitan “soul” so nanlapud Hebreon salita a neʹphesh, a pinmatnag ed masulok a 750 danay. Say kapetekan to ed Griegon Kasulatan so psy·kheʹ, a pinmatnag ed masulok a 100 danay. Say New World Translation of the Holy Scriptures so pareparehon impatalos to irayan salita a bilang “kamarerwa.” Arum a Biblia so nayarin angusar na nanduruman salita. Arum ed saray dalan ya impangipatalos na King James Version ed neʹphesh so: pilalek a mangan, ayep, laman, linawa, pinalsa, inatey (laman), pilalek, puso, bilay, too, nonot, persona, dilin-inkasika, kamarerwa, bengatla. Tan impatalos to so psy·kheʹ a bilang: puso, bilay, nonot, kamarerwa.
12. Panoy impangusar na Biblia ed saray Hebreo tan Griegon salita a para ed “kakamarerwa”?
12 Tinawag na Biblia iray pinalsa ed dayat a neʹphesh: “Amin a mabilay a kamarerwa a wala ed saray danum.” (Levitico 11:10) Say salita so nayarin manukoy ed saray ayayep ed dalin: “Komon ta say dalin so mamawala na saray mabilay a kamarerwa unong ed nengneng da, ayep ya amo tan onggalaw ya ayep tan atap ya ayep.” (Genesis 1:24) Nilasuslasus a danay a say neʹphesh et kabaliksan to so totoo. “Amin a kakamarerwan pinmaway ed tagtagey a banel nen Jacob so nagmaliw a pitumplon kakamarerwa.” (Exodo 1:5) Sakey ya ehemplon inkausar na psy·kheʹ ed onia so diad 1 Pedro 3:20. Ibabaga to so nipaakar ed biong nen Noe, “a pigpigaran totoo, salanti, waloran kakamarerwa, so nitarok a maligen ed danum.”
13. Diad antoran dalan so impangusar na Biblia ed salitan “kamarerwa”?
13 Uusaren na Biblia so salitan “kamarerwa” ed dakel iran arum a dalan. Ibabaga na Genesis 9:5: “Say dala na kamarerwa yo so kerewen ko.” Dia et nibagan say kamarerwa so walaan na dala. Ibabaga na Exodo 12:16: “Say nakaukolan lambengat a kanen na kada kamarerwa, satan lambengat so nayarin nagawa ed sikayo.” Diad onian kipapasen et say kamarerwa so nibagan mangan. Sasalitaen na Deuteronomio 24:7 so sakey a toon “manakew na sakey a kamarerwa na agagi to.” Seguradon aliwan sakey ya ag-ompatey a kamarerwa so atakew. Ibabaga na Salmo 119:28: “Say kamarerwak so agmakaugip a manlapud kaermenan.” Sirin say kamarerwa so makabalang na pakaugip. Ipapanengneng met na Biblia a say kamarerwa so ompatey. Ompatey. “Satan a kamarerwa so nepeg a napegpeg a manlapud totoo to.” (Levitico 7:20) “Sikato komon so ag-onasingger ed anggan anton inatey a kamarerwa.” (Numeros 6:6) “Saray kamarerwa tayo so ompatey.” (Josue 2:14) “Anggan dinan a kamarerwan ag-ontalineng ed satan a Propeta so sigpot a naderal.” (Gawa 3:23) “Amin a mabilay a kamarerwa so ompatey.”—Apocalipsis 16:3.
14. Anto so malinlinew ya ibabaga na Biblia a kipapasen na kamarerwa?
14 Malinew, say impangusar na Biblia ed neʹphesh tan psy·kheʹ so mangipapanengneng a say kamarerwa et say too odino, diad kipapasen na saray ayep, say pinalsa. Sikato so aliwan bengatlan ag-ompatey a kabiangan na sakey. Peteg, say neʹphesh so nausar ni ingen ed Dios a mismo: “Siopaman a mangaro ed karawalan peteg a gulaen na kamarerwa To.”—Salmo 11:5.
Dakel Iran Eskolar So Mipakna
15. Panoy impanbalikas na saray pigaran gawa na eskolar nipaakar ed bangat ya ag-ompatey a kamarerwa?
15 Dakel iran eskolar so mipakna ya agsasalitaen na Biblia so sakey ya ag-ompatey a kamarerwa. Ibabaga na The Concise Jewish Encyclopedia: “Ag-ibabaga na Biblia so sakey a doktrina na ag-ipapatey na kamarerwa, nisay saya so malinlinew a nanlapud asasakbay a rabinikon literatura.” Ibabaga na The Jewish Encyclopedia: “Say pananisian say kamarerwa so mantultuloy ed kiwawala to ed kayari katunaw na laman so sakey a pamaakaran na pilosopo odino teologon espekulasyon imbes a diad simplen pananisia, tan sirin anggapon nibalikas ed Masanton Kasulatan.” Inkuan na The Interpreter’s Dictionary of the Bible: “Say nephesh . . . so agmantultuloy a mabilay ya akasian ed laman, noagta ompatey a kaiba na satan. . . . Anggapoy biblikon teksto so mangautorisa ed balikas a say ‘kamarerwa’ so nisian a manlapud laman diad momento na patey.”
16. Panoy impanbalikas na pigaran autoridad nipaakar ed kamarerwa?
16 Ontan met, ibabaga na Expository Dictionary of the Bible Words: “Say ‘kamarerwa’ ed D[aan] a S[ipan], sirin, so agmangituturo na bengatlan aliwan materyal a kabiangan na totoon mantultuloy kayari na patey. Say [neʹphesh] et kabaliksan to so bilay a singa nikadkaduman naeksperiensia na personal a kiwawala. . . . Say manunan kabaliksan na [psy·kheʹ] so pinekderan na D[aan] a S[ipan] a kapetekan to, imbes a say kabaliksan to ed Griegon kultura.” Tan ibabaga na The Eerdmans Bible Dictionary a diad Biblia, say salitan kamarerwa “so mangituturo ed sakey a kabiangan na sakey a toon pinalsa, noagta imbes et say interon persona. . . . Diad sayan pantalos saray totoon pinalsa so andian na kakamarerwa—sikara so kakamarerwa.”—Kien mi so italiko.
17. Anto so binidbir na duaran Katolikon sengegan nipaakar ed “kamarerwa”?
17 Anggan say New Catholic Encyclopedia so amidbir: “Saray Biblikon salita a para ed kamarerwa so gendagendat a kabaliksan to so sigpot a persona.” Inyarum to: “Anggapo so dichotomy [dibisyon] na laman tan kamarerwa ed D[aan] a S[ipan]. . . . Say terminon [neʹphesh], anggaman nipatalos ed salita tayon kamarerwa, so agbalot mankabaliksan a kamarerwan miduma a manlapud laman odino say indibidual a persona. . . . Say terminon [psy·kheʹ] et say salita ed D[aan] a S[ipan] a mipetekan ed [neʹphesh]. . . . Say kanonotan ed kamarerwan mantultuloy a manbilay kayari na patey so agnatebek ed Biblia.” Tan si Georges Auzou, Pranses a Katolikon Propesor na Sagradon Kasulatan, so nansulat ed libro ton La Parole de Dieu (The Word of God): “Say kaisipan ed ‘kamarerwa,’ a kabaliksan to so puron espiritual, aliwan materyal a kapetegan, nisian a manlapud ‘laman,’ . . . so anggapo ed Biblia.”
18. (a) Panoy impankomento na sakey ya encyclopedia ed impangusar na Biblia ed salitan “kamarerwa”? (b) Iner so angalaan na saray teologo ed ideya na bengatlan makaliktar ed ipatey na laman?
18 Sirin, imbaga na The Encyclopedia Americana: “Say kaisipan ed Daan a Sipan ed too et say pankasakey, aliwan pankasakey na kamarerwa tan laman. Anggaman say Hebreon salita [neʹphesh] so mabetbet a nipatalos a bilang ‘kamarerwa,’ aliwan susto so pamasa ed satan diad Griegon kabaliksan. . . . Say [neʹphesh] so agbalot naisip a bilang onkukurang a nisian a manlapud laman. Diad Balon Sipan na Griegon salita a [psy·kheʹ] so mabetbet a nipatalos a bilang ‘kamarerwa’ balet nepeg ya aglamet talosan a walaan na kabaliksan ed salita a singa kaisipan na saray Griegon pilosopo. . . . Say Biblia so agmangiter na malinew a deskripsion ed no panon so pakaliktar na sakey a too diad kayari na patey.” Inyarum to: “Saray teologo so nakaukolan ya ontepleg ed saray diskusyon na pilosopo a para ed magenap a kabaliksan na paneskribe ed kililiktar na sakey diad kayari na patey.”
Aliwan Say Biblia noagta Pilosopya
19. Panoy inkisiglaot na Griegon pilosopya ed pananisian ag-ompatey a kamarerwa?
19 Tua a saray teologo so angadapta ed saray ideya na paganon pilosopo diad pangimbento na ag-ompatey-kamarerwan doktrina. Kuan na Pranses a Dictionnaire Encyclopédique de la Bible (Encyclopedic Dictionary of the Bible): “Say kaisipan ed ag-ipapatey so sakey a produkto na Griegon panag-isip.” Pinekderan na The Jewish Encyclopedia: “Say pananisia ed ag-ipapatey na kamarerwa so sinmabi ed saray Judios a manlapud inkiarap ed Griegon kaisipan tan manuna ed panamegley na pilosopya nen Plato, say prinsipal a manangiyalibansa to,” a nambilay ed komapat a siglo sakbay nen Kristo. Sinisia nen Plato: “Say kamarerwa so ag-ompatey tan agnatawtaw, tan saray kamarerwa tayo so tuan wala ed sananey a mundo!”—The Dialogues of Plato.
20. Kapigan tan panon so inloob na paganon pilosopya ed Inkakristiano?
20 Kapigan so inloob na sayan paganon pilosopya ed Inkakristiano? Kuan na The New Encyclopædia Britannica: “Manlapud kapegleyan na koma-2 siglo AD a saray Kristianon walaan na inkipasal ed Griegon pilosopya so ginmapon manlikna ed pankaukolan na pangibalikas na pananisia ra ed saray termino to, namparan diad dili ran kapenek ed katudioan tan pian kumbertien iray edukadon pagano. Say pilosopyan tinmukoy ed sikaran maong et say Platonismo.” Sirin, singa ibabaga na Britannica, “saray inmunan Kristianon pilosopo so angadapta ed Griegon kaisipan ed ag-ipapatey na kamarerwa.” Anggan si Papa Juan Paulo II so amidbir a say ag-ompatey-kamarerwan doktrina so anginkorpora ed “saray teorya na eskuelaan ed Griegon pilosopya.” Balet say pangawat ed saray teorya na Griegon pilosopya so mankabaliksan a say Kakristianoan so angikaindan ed simplen katuaan a nibalikas ed Genesis 2:7: “Say too so nagmaliw a mabilay a kamarerwa.”
21. Panon kabayag la so pananisia ed ag-ompatey a kamarerwa?
21 Say ag-ompatey-kamarerwan bangat, anggaman kuan, so akauna nin arawi ed sakbay nen Plato. Diad libron The Religion of Babylonia and Assyria, nen Morris Jastrow, nabasa tayo: “Say problema ed ag-ipapatey . . . so angisiglaot ed seryoson imano na saray teologon Babilonia. . . . Say patey so dalan a mamaarap ed sananey a nengneng na bilay.” Ontan met, say libron Egyptian Religion, nen Siegfried Morenz, so angikuan: “Saray inmunan Ehipsios so angipasen ed bilay kayari na patey a simplin singa katuloyan na bilay ed dalin.” Inkuan na The Jewish Encyclopedia nipaakar ed sarayan kadaanan a relihyon tan si Plato sanen inkuanto a si Plato so nitonton ed ideya na ag-ompatey-kamarerwa “diad panamegley na saray misteryo nen Orphic tan Eleusinia a saray panmoria na Babilonia tan Ehipsios so makapakelaw ya impantekep.”
22. Akin a nibagan saray bukel na doktrinan ag-ompatey a kamarerwa so peteg a nitanem diad palbangon na awaran na too?
22 Sirin, say ideya na ag-ompatey a kamarerwa so kadaanan. Diad tua, saray lamut to so ompawil ed palbangon na awaran na too! Kayarin nibaga ed si Adan a sikato so ompatey no sikato so ontunganga ed Dios, nibalikas so kasuniyan a panmoria ed asawa nen Adan, si Eva. Nibaga ed sikato: “Sika so peteg ya ag-ompatey.” Dia et saray bukel na doktrinan ag-ompatey a kamarerwa so nitanem. Tan nanlapulad saman, sakey a kultura ed kayari na sananey so angadapta ed paganon panmoria a ‘sika so agpeteg ya ompatey noagta mantultuloy a manbilay.’ Saya so mangisasakup ed Kakristianoan, ya angipaarap ed saray patumbok to diad apostasya ya onsumlang ed saray gagala tan linawa na Dios.—Genesis 3:1-5; Mateo 7:15-23; 13:36-43; Gawa 20:29, 30; 2 Tesalonica 2:3, 7.
23. Siopa so anibukel ed bangat ya ag-ompatey a kamarerwa, tan akin?
23 Siopa so angitonton ed totoon manisia ed satan a katilaan? Sikato so impabidbir nen Jesus sanen inkuanto ed saray relihyoson papangulo ed agew to: “Sikayo so nanlapud ama yo a Diablo, tan kaliktan yon gawaen iray pilalek nen ama yo. . . . Sano sikato so mansalita na tila, sikato so mansalita unong ed dilin kanonotan to, lapud sikato so sakey a matila tan say ama na tila.” (Juan 8:44) On, si Satanas so anibukel ed ideya na ag-ompatey a kamarerwa pian pabenegen to so totoo a manlapud tuan panagdayew. Sirin say kurang na sakey ed bilay tan ilalo ed arapen so niiyan ed lingon basbas diad panisia ed saray doktrinan tinmalubo a nanlapud inmunan tila a nikurit ed Biblia, anggamano diad saman a panaon et si Eva so andi-duaruwan nantalos ed uleg a kabaliksan to lambengat a sikato so ag-ompatey lamlamang diad laman.
24. Antoran tepet so nayarin manepeg ya itepet nipaakar ed maandon bilay tan ag-ipapatey?
24 Ag-ibabangat na Biblia a saray totoo so walaan na ag-ompatey a kamarerwa. Akin, sirin, a sasalitaen to so nipaakar ed ilalo ed arapen? Nagkalalo ni, agta ibabaga na Biblia, ed 1 Corinto 15:53: “A sayan ompatey so nakawesan na ag-ipapatey”? Tan agta si Jesus so linma ed tawen diad kayari na inkioli to, tan agta imbangat to ya arum so makakar met ed tawen? Saraya tan arum niran tepet so nausisa ed ontumbok ya artikulo tayo.
Tepetepet ed Panrepaso
◻ Anto so sisisiaen na maslak a relihyon nipaakar ed kamarerwa?
◻ Panoy pangipanengneng na Biblia a say too so agpinalsan walaan na ag-ompatey a kamarerwa?
◻ Anto so malinew a manlapud impangusar na Biblia ed saray Hebreo tan Griegon salita a para ed “kamarerwa”?
◻ Anto so ibabaga na dakel ya eskolar nipaakar ed panmoria na Biblia ed kamarerwa?
◻ Panon kabayag la ed awaran so doktrinan ag-ompatey a kamarerwa?
[Litrato ed pahina 15]
Sikaran amin so kakamarerwa