Padaaken So Deen Yo Diad Panamegley na Suston Pikakabat

“Komon ta say agkanepegan a panangasi tan kareenan so napadaak ed sikayo diad suston pikakabat ed Dios tan ed si Jesus a Katawan tayo.”​—2 PEDRO 1:2.

1, 2. (a) Akin a say mareen a relasyon ed Dios so nipareng ed panangasawa? (b) Panon tayon napabiskeg so kareenan tayo ed Dios?

SAY mareen a relasyon ed si Jehova a Dios diad bautismo yo, diad arum a pamaakaran, so singa sakey a panangasawa. Anggaman say agew na kasal so makapaliket, satan lambengat so gapowan na sakey a mablin relasyon. Tekep na sagpot, panaon, tan eksperiensia, say relasyon ed panangasawa so lalon ombulaslas a maarowan, magmaliw a salimbengan legan na panaon na gonigon. Sirin, met, diad gunaet tan diad tulong nen Jehova, nayarian yon padaaken so kareenan yo ed sikato.

² Impaliwawa nen apostol Pedro no panon a saraman so “akagamor na pananisia” so makapabiskeg na kareenan da ed Dios. Insulat to: “Komon ta say agkanepegan a panangasi tan kareenan so ondaak ed sikayo diad suston pikakabat ed Dios tan ed si Jesus a Katawan tayo.”​—2 Pedro 1:1, 2.

“Suston Pikakabat ed Dios”

3. Say pakawalaan na suston pikakabat ed si Jehova tan si Jesus so mankabaliksan na anto?

³ Say Griegon salita a para ed “suston pikakabat” (e·piʹgnosis) a nausar ed sayan konteksto et kabaliksan to so araddalem, lalon maapit a pikakabat. Say porman berbo so nayarin manukoy ed pikakabat ya agamoran diad personal ya eksperiensia tan nipatalos a “kabaten a nagnap” diad Lucas 1:4. Ipapaliwawa nen Griegon eskolar a si Culverwel a dia ed sikato et say salita so manutukoy diad pagmaliw a “magmaong a mikakabat ed sakey a bengatlan kabat ko la nensaman, lalon eksakton panmoria ed sakey a bengatla ya anengneng ko ed arawi.” Say pakagamor na ontan a “suston pikakabat” so manasaglawi na pikakabat ed si Jehova tan si Jesus a nagkalalon maapit a bilang persona, magmaliw a lalon mikabat ed saray kalidad da.

4. Panon tayon napadaak so pikakabat tayo ed Dios, tan akin a saya so mamaaligwas na pikakareenan tayo ed sikato?

⁴ Saray duaran dalan na pakagamor ed sayan pikakabat so diad panamegley na maabig ya ugali ed personal a panagaral tan say maparanay ya iyaatendi ed saray pantitipon na totoo na Dios. Diad sarayan dalan et naaralan yon lalon malinew no panon so pangikikiwas na Dios ed inkasikato tan no anto so iisipen to. Natibukel yo so sakey a nagkalalon mabitar a pangiretrato ed nonot diad personalidad to. Balet say pikabat ed Dios a lalon maapit et kabaliksan to so pangalig tan pangisindag ed sayan indengan. Alimbawa, dineskribe nen Jehova so sakey a toon angipatnag na singa-dios ya agkasibletan, tan insan inkuanto: “Agta satan so sakey a kipapasen na panangamta ed siak?” (Jeremias 22:15, 16; Efeso 5:1) Say pangalig ed Dios a nagkalalon maapit so mamadaak na pikakareenan yo ed sikato lapud papaaligwasen yo so impangisulong ed balon personalidad a, “diad panamegley na suston pikakabat et agawan balo unong ed indengan na samay Sakey ya amalsa ed satan.” Lalon sikayo so magmaliw a makapaliket ed Dios.​—Colosas 3:10.

5. (a) Panon so intulong na suston pikakabat ed sakey a Kristianon bii? (b) Diad antoran dalan a sikatayo so lalon maapit a makaalig ed si Jehova?

⁵ Sakey a Kristianon biin manngaran na Lynn so nairapan a mamerdona lapud pibabalingaan ed sakey a kaparan Kristiano. Balet say maalwar a personal a panagaral nen Lynn so anagdag ed sikaton mangusisa ed awawey to. “Anonotan ko no anton nengneng na Dios si Jehova, no panon a sikato so agmamupoot,” so inkuanto. “Inisip ko so amin na saray angkelag a bengatlan gagawaen mi ed si Jehova a kada agew, ingen ta sikara so agto ikukuenta. Sayan pamaakaran ed Kristianon agik a bii so melmelanting a tuloy no ikumpara. Sirin kapiganman a say Kristianon agik a bii so nanengneng ko, ikuan ko ed inkasiak, ‘Sikato so inaro nen Jehova a singa panangaro to ed siak.’ Saya so tinmulong ed siak ya analona ed problema.” Kasin nanengneng yoray pasen a pankaukolan met na pangalig yo ed si Jehova a nagkalalon maapit?​—Salmo 18:35; 103:8, 9; Lucas 6:36, Gawa 10:34, 35; 1 Pedro 1:15, 16.

Suston Pikakabat ed Kristo

6. Panon nen Jesu-Kristo ya impanengneng a say kimey na panagpulong so sankaimportantian ed sikato?

⁶ Say pakawalaan na suston pikakabat ed si Jesus so mankaukolan “na pakawalaan na kanonotan nen Kristo” tan say pangalig ed sikato. (1 Corinto 2:16) Si Jesus so entusiastikon manangiyabawag na katuaan. (Juan 18:37) Say ampetang ya espiritu to ed panag-ebanghelyo so ag-inamper na panaggula na komunidad. Anggaman saray arum a Judios so nambusol ed saray Samaritano, sikato so nantasi ed sakey a biin Samaritana diad sakey a bobon. Akin, anggan say pitongtong na andukey ed publiko ed anggan siopan bii nayarin sibangotan!a Balet ag-inabuloyan nen Jesus so liknaan na komunidad a mangamper ed panangiter to na pantasi. Say kimey na Dios so makarepresko. Inkuanto: “Say taganok et say panggawa ed linawa na saman so angibaki ed siak tan say panumpal ed kimey to.” Say gayaga ed pakanengneng na ikikiwas na totoo, a singa samay Samaritanan bii tan diad dakel iran kabaleyan to, so amabiskeg ed si Jesus a singa tagano.​—Juan 4:4-42; 8:48.

7. (a) Say pikakabat ed si Jesus so nepeg a mamakiwas ed sikatayon manggawa na anto? (b) Kasin iilaloan na Dios so amin ya ariripen to a manggawa na parehon karakel na panagpulong? Ipaliwawa.

⁷ Kasin nalikna yo so singa alikna nen Jesus? Ipasen, say pangigapo na pitongtong ed sakey ya estranghero nipaakar ed Biblia so mairap na dakel a gawaen tan mabetbet a sibangotan na arum ed komunidad. Ingen, no walaan itayo na parehon awawey na kanonotan a singa si Jesus, sayan katuaan so agtayo napaliisan. Nepeg tayo so mantasi. Siempre, aliwan amin so makagawa na parehon karakel na panagpulong. Saya so manduruma unong ed saray abilidad tan sirkumstansya tayo. Sirin agliknaen a say Dios so agbalot napenek ed sagradon serbisyo yo. Say pikakabat tayo ed si Jesus, anggaman kuan, so nepeg a managdag ed sikatayon manggawa na anggaan na nayarian tayo. Kinomendaan nen Jesus so sigpot-kamarerwan serbisyo.​—Mateo 13:18-23; 22:37.

Say Pankaukolan na Panggula ed Karelmengan

8, 9. Anto so arum ed saray bengatlan kagula na Dios, tan panon so pakapangipanengneng tayo na parehon panggula?

⁸ Say suston pikakabat so ontulong met ed sikatayon mangapresya ed no antoray bengatlan ginula nen Jesus tan si Jehova. (Hebreos 1:9; Isaias 61:8) “Walaray anemiran bengatla a kagula nen Jehova, on, pitora so bengatlan makaparimdimla ed kamarerwa to: mapangtan mata, tilan dila, tan saray liman manangibong na andi-kasalanan a dala, puson mannonot na makapasakit a getma, salisali a mangganat ya ombatik ed kaugsan, tilan panagtasi a mangipaakar na katilaan, tan siopaman a mangibaki na pankukulkol ed limog na agagi.” (Uliran 6:16-19) Sarayan awawey tan nengneng na kondukta so “makapadimla ed kamarerwa to.” Say Hebreon salitan nipatalos dia a “makapadimla” so nanlapu ed sakey a salitan kabaliksan to “so panimla, pambusol,” “panggula, a singa ed saman so makapasyudot ed amin a liknaan, panimla, panggula a tekep na sanok.” Sirin pian walad kareenan ed Dios, nakaukolan tayon bayuboan so mipadparan panggula.

⁹ Alimbawa, paliisan so “mapangtan mata” tan anggan anton panangipanengneng na inkakinon. Liknaen na arum a kayari na bautismo et agda la nakaukolan so maparanay a pananulong na saraman so angibangat ed sikara. Balet saray balon Kristianos so nepeg a maapabeban mangawat na tulong legan a sikara so niligen a maong ed katuaan. (Galacia 6:6) Ontan met, paliisan so panagtalabutob, a magmainomay a pansengegan na “pankukulkol ed limog na agagi.” Diad pangikayat na mauges a dengeldengel, agmakatunongan a panagbalaw, odino katilaan, nayarin sikatayo so “agmangipapaagos” na andi-kasalanan a dala,” balet sikatayo so seguradon maneral ed maabig a kagalangan na too. Agtayo nayarian so mikareenan ed Dios no sikatayo so agmikakareenan ed saray agagi tayo. (Uliran 17:9; Mateo 5:23, 24) Ibabaga met na Dios ed Salita to a “kagula to so panagsian.” (Malaquias 2:14, 16) No walaan na asawa, kasin kikimeyan mon pansiansiaen a mabiskeg so panamaley mo? Kasin say panagkarinyo tan panangayat ed asawa na sananey so makapadimla ed sikayo? Kasin sikayo, singa si Jehova, so manggula ed seksual ya imoralidad? (Deuteronomio 23:17, 18) Say panggula ed ontan iran gawa so aliwan mainomay, lapud saraya so nayarin makapasagyat ed makasalanan a laman tayo, tan sikara so imisan na mundo.

10. Panon so pakabayubo tayo na panggula ed karelmengan?

¹⁰ Bilang katulongan diad pamayubo na panggula ed karelmengan, paliisan so pambantay ed saray sine, programa ed TV, odino literaturan mangipapabitar na espiritismo, imoralidad, odino karawalan. (Deuteronomio 18:10-12; Salmo 11:5) Diad panggawa ed gawan-mauges a singa ‘aliwan ontan inkauges’ odino makapaliket ni, saray ontan a panligliwaan so maneral na sagpot diad panamayubo ed maridios a panggula ed satan. Diad biek a dapag, say magunaet a panagpikasi so ontulong, lapud imbaga nen Jesus: “Mantultuloy a manpikasi, pian agkayo komon onloob ed tukso. Say espiritu, siempre, so magunaet, balet say laman so maletey.” (Mateo 26:41,) Nipaakar ed kidunget diad mabiskeg a pilalek na laman, imbaga na sakey a Kristiano: “Siak so manpikasi. No maminsan et liknaen kon agak makana ya onasingger ed si Jehova, balet diad impanagdag ko ed inkasiak a manggawa ed satan, diad inyapelo ed sikato, siak so akagamor na biskeg a nakaukolan ko.” Natalosan yon magmaong no akin a kagula nen Jehova so gawan-mauges no repasoen yo ed kaisipan yo iray makapautot a pansumpalan.​—2 Pedro 2:12, 13.

11. Antoran bengatla so nayarin mangonigon ed sikatayo no maminsan?

¹¹ Anggaman walaan na kareenan ed Dios, sikayo no maminsan so nagonigon diad inagew-agew a pakadesdesan tan tukso tan anggan diad saray dili yon kaleteyan. Nonoten, ginawam so inkasikan puntirya nen Satanas. Sikato so mibabakal a sumpad saraman so manusumpal ed ganggan na Dios tan sikara so Tastasi nen Jehova! (Apocalipsis 12:17) Panon, sirin, so pakabemben yo ed akindalem a kareenan yo?

Panalona ed Saray Makadisturboy-Kareenan a Desyang

12. (a) Anto so letnegan na Salmo 34? (b) Panon so panideskribe na Kasulatan ed saray liknaan nen David legan na sayan eksperiensia?

¹² “Dakel iray desyang na matunong,” so insulat nen David ed Salmo 34:19. Unong ed paunan-paliwawa na sayan salmo, satan so insulat nen David diad kayari na maapit ya inkidunget to ed patey. Binmatik a nanlapud si Saul, si David so nansalimbeng ed si Akis, say Pilisteon ari na Gat. Saray ariripen na ari so akabidbir ed si David tan, anonotan da so apalabas iran agawaan to ed militar a para ed Israel, so nanreklamo ed si Akis. Sanen naamingaw nen David so tongtongan, sikato “so angipapuso ed sarayan salita, tan sikato so tinmakot a tuloy lapud si Akis ya ari na Gat.” (1 Samuel 21:10-12) Tutal, saman so baley nen Goliat tan si David so amatey ed bayani ra​—tan sikato ni ingen so angawit ed kampilan na saman ya alan! Kasin sayan baleg a kampilan so usaren da natan a pamugot ed ulo to? Anto so nayarin gawaen nen David?​—1 Samuel 17:4; 21:9.

13. Anto so ginawa nen David legan na sayan desyang, tan panon so pakatumbok tayo ed uliran to?

¹³ Si David so nampikasi ed Dios a tekep na mabiskeg a kerew na tulong. “Sayan apairap so tinmawag, tan nadngel nen Jehova. Tan manlapud amin a gonigon to et sikato so inliktar To,” so inkuan nen David. Inkuan to met: “Diad amin a kakebbiewan ko et siak so inliktar to.” (Salmo 34:4, 6, 15, 17) Kasin naaralan yo met so manpikasi ed si Jehova, ya ikalbo yo so puso yo legan na saray panaon na gonigon? (Efeso 6:18; Salmo 62:8) Anggaman say partikular a kairapan yo so nayarin aliwan singa dramatiko a singa asagmak nen David, siansian naromog yon iter nen Jehova ed sikayo so tulong diad manepeg a panaon. (Hebreos 4:16) Balet mas ni so ginawa nen David nen say impanpikasi.

14. Panon nen David ya inusar so “pakayari na panagnonot,” tan anto so intarya na Dios ya ontulong ed sikatayo a manggawa met na ontan?

¹⁴ “Sikato [David] so nanpaisano ed kalakal to diad leksab na saray mata ra tan ginmapon kinmiwas a makulangkulang. . . . Diad kaunoran et imbaga nen Akis ed saray ariripen to: ‘Nia nanengneng yo so sakey a toon ambagel. Akin a sikato so iyakar yo ed siak?’” (1 Samuel 21:13-15) Kinanonotan nen David so sakey ya estratehya a pakaliktaran to. Pinapalar nen Jehova iray sagpot to. Ontan met, no sikatayo so nidunget ed mairap iran problema, sikatayo so ilaloan nen Jehova a mangusar ed saray pakultad na nonot tayo tan aliwa lambengatlan basta sikato so ilaloan a mangekal lan amin ed saratan ed sikatayo. Inikdan to itayo na apuyanan a salita to, a “pangiteran to na pikakabat ed saray agni atalitali, . . . pikakabat tan pakayari na panagnonot.” (Uliran 1:4; 2 Timoteo 3:16, 17) Intarya met na Dios iray mamatatken ed kongregasyon, ya ontulong ed sikatayon mangamta ed no panon so pamemben ed saray estandarte na Dios. (1 Tesalonica 4:1, 2) Mabetbet, sarayan lalaki so makayarin ontulong ed sikayo diad pansukimat ed saray palapagan na Watch Tower Society a makatulong diad panggawa na maptek a desisyon odino panalona ed sakey a problema.

15. Akin a say Salmo 34:18 so makaligliwa?

¹⁵ Anggan sano sikatayo so pautoten na puso tayo lapud saray dilin kaleteyan tayo odino insaew, no sikatayo so walaan na dugan awawey, nabembenan tayo so kareenan tayo ed Dios. Insulat nen David ed Salmo 34:18: “Si Jehova so asingger ed saraman so maermen ed puso, tan saraman so agonigon ed espiritu so iliktar to.” No sikatayo so onkerew na panamerdona tan gawaen so nakaukolan a kundang diad pametek ed saray bengatla (nagkalautla ed kipapasen na seryoson impakalukso), si Jehova so mansiansian maapit ed sikatayo, a pabiskegen to so emosyon tayo.​—Uliran 28:13; Isaias 55:7; 2 Corinto 7:9-11.

Say Personal a Pikakabat So Mangiter na Kareenan

16. (a) Anto so sananey a dalan a pakagamoran tayo na suston pikakabat ed Dios? (b) Ipaliwawa so balikas nen David, “Tawayan tan nengnengen a si Jehova so maong.”

¹⁶ Sananey a pakagamoran tayo na pikakabat ed Dios, nilikud ed panangasol na espiritual ya impormasyon, so diad panamegley na personal a pakasagmak tayo na maaron tulong. (Salmo 41:10, 11) Say kiliktar a manlapud kairapan so aliwan naynay a mankabaliksan na tampol odino sigpot ya anggaan na sakey a problema, nayarin nakaukolan yon pantultuloyen a sungdoan itan. (1 Corinto 10:13) Anggaman say bilay nen David so niliktar ed Gat, sikato so nansiansian pugante ed pigaran taon, ya inarap to so kaatapan a nantutumbokan. Diad panamegley na amin na satan, alikna nen David so panangasikaso tan panamabiskeg nen Jehova. Inanap to tan nalmo to so kareenan ed Dios, tan naaralan to a saraman so manggawa na ontan “et ag-onkulang na antokaman a bengatlan maabig.” Diad impakabidbir ed panamegley na personal ya eksperiensia no panon so impanuporta nen Jehova ed sikato legan na kalamidad, nayarian nen David ya ibelyaw: “Tawayan tan nengnengen a si Jehova so maong, O sikayon totoo, maliket so makayarin too a mansalimbeng ed sikato.”​—Salmo 34:8-10, 14, 15.

17. Legan na desyang, anto so epekto ed pamilya na pansalimbeng ed si Jehova?

¹⁷ Say pansalimbeng ed si Jehova legan na saray kairapan so ontulong met ed sikayon “manaway tan makanengneng a si Jehova so maong.” Nisengeg ed sakey ya aksidente, abalang na sakey a Kristiano ed pegley-sagur ya Estados Unidos so atagey-sueldon trabaho a walad sikato ed loob na 14 taon. Lapud sikato so andian na anapan, sikato tan say pamilya to so akikasi ed Dios.. Diad parehon panaon, anggaman kuan, et pinegpegan da so gastos, nantudtor ed asingger iran uma, tan nansigay a para ed tagano. Diad tulong na arum ed kongregasyon tan diad panapanaon a trabaho no wala, sayan pamilya na apatira so manbibilay. Sakey taon kayari na aksidente, inkuan na ina: “Nayarian min palikdoen so inkasikami ed panisip a sikami so manmamatalek ed si Jehova sano sikami so peteg a manmamatalek ed saray dilin pakayari mi, diad kapareha mi, odino diad trabaho mi. Sikami, anggaman kuan, so peteg ya akaaral a manmatalek ed sikato lambengat. Sarayan arum a bengatla so nayarin naandi, balet sikami so agbalot tinaynanan nen Jehova​—aliwan anggan diad sakey a bekta. Anggaman sikami lambengat so walaan na inagew-agew a nakakaukolan, say relasyon mi ed si Jehova bilang pamilya so lalon maapit.”

18. Anto so ontulong ed sikatayon mansungdo ed anggan saray mantultuloy a problema?

¹⁸ On, say kairapan ed pinansyal so nayarin mantultuloy. Odino nayarin say sakey so nasalot na largolargon sakit ed pisikal; pibalingaan na personalidad ed sananey; kagonigon ed emosyon, a singa say kagulo na liknaan; odino sakey ed saray dakerakel nin arum a problema. Ingen, diad tuan pakapikabat ed Dios, et nawalaan kayo na pananisia ed pananulong to. (Isaias 43:10) Sayan agnabuyak a talek so ontulong ed sikayon mansungdo tan nawalaan “na kareenan ed Dios a talonaan to so amin a kanonotan.”​—Filipos 4:7.

19. Panoy pikabat tayo ya agleglemewen nen Jehova iray paniirap tayo?

¹⁹ Sano ondalan ed makagonigon ya eksperiensia, agbalot lilingwanan a kabat nen Jehova a sikayo so maniirap. Diad sakey a salmo a tinibukel met sanen nanmorekdek ed asagmak to diad Gat, si David so nankerew ed si Jehova: “Ikargam iray luak ed botelyam. Agta sikara so wala ed librom?” (Salmo 56:8) Peteg, say Dios so tinmalineng ed kerew nen David. Agaylan makaligliwa so pakaamta a tiponen na Dios so ontan iran lua a pinawala na kairapan tan kapagaan tan saraya so ikarga, a singa panangibaga, ed botelya to, a singa say pangikalbo na sakey ed ontan a kargaan na mablin alak odino iinumen a danum! Saray ontan a lua so naynay a nanonotan, on, nisulat ed libro na Dios. Agaylan matamoy so panangasikaso nen Jehova!

20. Panon tayon napadaak so kareenan tayo ed Dios?

²⁰ Sirin say bautismo yo so gapowan lambengat na mareen a relasyon ed Dios. Diad pagmaliw a lalon nikabisado ed saray personal a kalidad na Dios tan si Jesus, tan personal a nasagmak so pananuporta nen Jehova legan na saray subok, napadaak yo so kareenan yo ed Dios. Aliwa lambengat a nawalaan kayo na relasyon ed si Jehova a magmaliw a pasen na kaligenan natan noagta nawalaan kayo met na mablin ilalo diad pambilay na ando lan ando ed Paraiso, a ditan et naromog yo so “liket diad inkadaakan na kareenan.”​—Salmo 37:11, 29.

[Paimano ed Leksab]

Kasin Nanonotan Yo?

◻ Diad antoran dalan so pakagamoran tayo na suston pikakabat ed Dios tan si Jesus?

◻ Say pangalig ed Dios tan si Jesus so managdag ed sikatayon manggawa na anto?

◻ Panon so pangalig tayo ed panaggula na Dios ed mauges?

◻ Panon tayon napansiansia so kareenan anggaman ed saray kairapan?

[Litrato ed pahina 15]

Agnilabay nen Jesus ya abuloyan so panggula na komunidad a mangamper diad panagtasi to. Kasin aaligen yo so seseg to ed panagpulong?

[Saray Litrato ed pahina 16]

Sanen nidunget ed sakey a seryoson problema, si David so nampikasi ed si Jehova . . .

. . . tan nankunwari ed kalakal diad impangiplano ed kiliktar. Dinengel nen Jehova iray pikakasi nen David