“Say Salita na Dios . . . Mabiskeg”
1 Onia so insulat nen apostol Pablo: “Say salita na Dios sikatoy mabilay tan mabiskeg.” (Heb. 4:12) Antoy labay ton ibaga ed satan? Say salita, odino mensahe na Dios, a naromog ed Biblia so walaan na mabiskeg ya impluensia ed totoo. Say kakabatan a lugan na Biblia so walaan na pakayari a manguman ed bilay na sakey parad magmaong a bilay. Say ligliwa tan ilalo ya iyoopresi na satan so mamaapit ed totoo ed Manangiter-Bilay, si Jehova a Dios. Say mensahe na satan so mamakiwas ed saray matuan-impanpuso ed dalan a mamaarap ed andi-anggaan a bilay. Balet, pian nanengneng irayan resulta, nepeg tayon usaren so Biblia sano pulongan tayoy arum.
2 Mangibasa na Teksto ed Amin a Pankanawnawa: Ompatnag a dakel a manangipalapag so matalag a mangusar ed Biblia diad panagkabkaabungan. Kasin tua met itan ed sika? Lapud dakel a totoo so singa andian na malaem ya oras a mitongtong, nayarin kalkalnan nipasal yoy mangiyopresi labat na literatura odino panalambit labat ed lugan na teksto. Pasesegen min amin a manangipalapag a panggunaetay pangibasa na anggan sakey labat a bersikulo manlapud Biblia sano iprepresenta so maong a balita, diad ontan et namoria na too a say mensahe tayo so talagan naromog ed Salita na Dios.
3 Anggaman daiset a totoo so manbabasa ed Biblia, siansian inkalapagan a rerespetoen itan. Anggan saray okupadon totoo so mabetbet a mangusar na pigaran minuto pian ondengel ed mensahe a direktan ibasa manlapud Salita na Dios. Sano ibasa so matukoy a teksto tekep na ligsa tan isalaysay itan a magano, say pakayari na salita nen Jehova so mamawala na maabig ya epekto ed dumerengel. Balet panon yon ituloy so impangigapo yoy tongtongan ed pangibasa na sakey a bersikulo manlapud Biblia?
4 Salien Iya ed Panagmagasin a Kimey: Sakey a managbiahen manangasikaso so epektibon angusar ed Kasulatan sanen akibiang ed panagmagasin. Sikatoy mangibubulsa na melag a Biblia. Kayari ton ipresenta iray magasin tan iparungtal ed antikey so sakey ya artikulo, agmasuyat a lukasan toy Biblia tan ibasay sakey a bersikulo a misiglaotan ed artikulo. Saya so nagawaan diad simplin pangitepet na, “Antoy nibaga yo ed sayan makapaseseg a sipan?” insan ituloy a basaen so pinilin teksto.
5 Gawaen yon kalat so panginabang na sakey odino duaran bersikulo manlapud Biblia ed kada nakatongtong yo. Say manamakiwas a pakayari na satan so nayarin mangilukas na dalan parad dakel nin totoo a napaapit ed Dios.—Juan 6:44.