Mangusar na Nitukoy-tukoy a Metodo

Say masimoon ya interes ed totoo so mamakiwas ed sikatayon panggunaetan a tebeken iray pankaukolan da tan ibangat ed sikara no panon a sigpot a solbaren na Panarian iray kipapaarapan dan problema. (Fil. 2:4) Say sakey a nitukoy-tukoy a manangigapoy tongtongan a nalmoan na dakel a manangipalapag ya epektibo et say pangerew ed komento na unabung ed saray litrato na Paraiso diad saray publikasyon tayo, a singa naromog ed saray nilista ed nikawanan ya egpang na sayan pahina. Nayarin nagawaan yo iya panamegley na onggendan iran introduksion:

◼ “Diad padesir yo nanengneng tayo ni kasi iray katooan a manggayaga ed oniaran kipapasen?”

◼ “Labay tayon amin a napanggayagaan na saray anak tayo so onian itsura na mundo. Anto tay padesir yon nakaukolan pian nagawa iya?”

◼ “Ipapanengneng na nilitrato dia no antoy magmaliw ya itsura na mundo sano nagawa la so linawa na Dios ed dalin no panon ya ontan met ed tawen. Wala tay naiimano yo dia a miduma ed bilay natan?”

◼ “Labay yo ta so manbilay ed saray kipapasen a singa nilitrato dia? [Abuloyan ya onebat.] Padesir yo nagawa kasi iya legay pambibilay tayo?”

Talinengen a maong so ebat na too, insan mapangasin paibalikas so punto-de-bista to diad pangitepet ni na duara odino talora. No walaray inmebat ya agda labay so manbilay ed saray kipapasen a nilitrato odino agda panisiaan a posible itan a bengatla, agtampol iisipen ya anggapoy interes da. Mataktikan tepeten no akin ya ontan so nalilikna ra. Nayarin napatnagan ed komento ra so pakapapagaan dan tuloy ed singa agla nasolbar iran problema a kipapaarapan na katooan.​—Eze. 9:4.

Legan a natetebek yo iray kapagaan na unabung, itukoy-tukoy yo iray presentasyon yo. Ipabitar so aspekto na mensahe na Panarian a direktan manasaglawi ed pankaukolan to. Mangibasa na sakey odino duaran teksto a mitukoyan ed bengatlan pampapagaan to. (Nengnengen iray suhestion ed nikawanan ya egpang.) Ipanengneng a mismo ed sikato no antoy ibabaga na Salitay Dios. No angipanengneng na interes, iyopresi so publikasyon tan iyuksoy so ipawil. Sagyaten a nagkalalo so interes to ed apantongtongan la.

[Kahon ed pahina 6]

Saray Alimbawa na Itsura na Paraiso

Libron Creation: pahina 237, 243, 251

Libron Managbangat: pahina 251-4

Libron Pikakabat: pahina 4-5, 188-9

Brosyur a Kakaukolanen: pahina 11, 13

Libron True Peace: pahina 98

Libron Dayewen so Dios: pahina 92-3

[Kahon ed pahina 6]

Saray Pamaakaran a Pakapapagaan na Totoo

Ayaman, problema ed ekonomya

Isaias 65:21, 22

Depresyon

Salmo 34:8;

Isaias 65:17-19

Diskriminasyon, ag-inkaparparehoy kipapasen ed bilay

Isaias 11:3-5;

Gawa 10:34, 35

Guerra, terorismo

Salmo 46:8, 9;

Miqueas 4:3, 4

Ikukusbo na moralidad

2 Timoteo 3:1-5

Inkakurakot, ag-inkahustisya

Isaias 9:6, 7;

2 Pedro 3:13

Kadederal na dalin

Apocalipsis 11:18

Kairapay bilay, panaglames

Salmo 72:12-14;

Eclesiastes 8:9

Kakisiran na tagano, malnutrasyon

Salmo 72:16;

Isaias 25:6

Krimen, karawalan

Salmo 37:10, 11;

Uliran 2:21, 22

Makapuy ya uley na gobierno

Salmo 146:3, 4;

Daniel 2:44

Panagmaltrato ed ayayep

Uliran 12:10

Patey, ermen

Isaias 25:8;

Apocalipsis 21:3, 4

Sakisakit, deperensya ed laman

Isaias 33:24; 35:5, 6