“Manparaan Parad Balang Maabig a Kimey”
1 Sanen ginapoan nen Jesus so balon kampanya na panagpulong, sikatoy angigana na panaon pian iparaan iray babangatan to. (Mat. 10:5-14) Anggaman okupado itayon amin, say pangigana tayo na anggan pigaran minuto pian manparaan antis a manpulong et ontulong ed sikatayon manani na maabig iran resulta.—2 Cor. 9:6.
2 No Panon so Pamparaan: Say maabig a preparasyon so onggapo ed pangikabisado ed literatura ya iyopresi tayo. Kaukolan tayo met a nonoten so totoo ed teritorya tayo. Antoray pakakaaburidoan da? Antoray relihyoson sisiaen ed satan a lugar? Nayari tayon nengnengen so pangaligan iran presentasyon ed Ministeryo Tayo ed Panarian tan Reasoning From the Scriptures parad saray ideya.
3 Say maalwar ya italineng ed saray demostrasyon ed Pantitipon Parad Panagserbi so ontulong met ed sikatayo. Legan a naaaruman so eksperiensya tayo diad panangusar ed presentasyon tayo, magmainomay tayo lay manparaan. Balet, kada onla itayon manpulong, no isipen tayo so ibaga tayo tan itultuloy tayon parakepen so presentasyon tayo, lalo itayon magmaliw ya epektibo. Kaukolan tayo met a seguroen a walaray literatura ya usaren tayo.
4 Panon tayon natandaan so presentasyon tayo? Say sakey a paraan et say pampasal pian niyapasakey tayoy kanonotan tayo ed labay tayon ibaga. Gagawaen na arum so panagpasal legan na panagaral da bilang pamilya. Naiimano na arum a makatulong so pangisulat na antikey a sumaryo na presentasyon da ed index card tan nengnengen itan antis ya ontoktok.
5 No Akin a Makagunggona: No akaparaan itayon maong, lalo itayon epektibo tan maliket ed ministeryo. Ontulong itan ed sikatayon magmaliw a relaks tan agtanto nanenerbiyos sano mitongtong. Tan niyapasakey tayoy imano tayo ed unabung imbes a sankanonot tayoy ibaga tayo. Niarum ni, no kabisado tayoy literatura et lalo tayon maligsan mangiyopresi ed satan.
6 Papasesegen itayo na Kasulatan a “manparaan parad balang maabig a kimey.” (Tito 3:1, NW) Anggapo lay magmaong a kimey nen say pangipulong ed maong a balita. Diad pamparaan a maong, nipanengneng tayoy respeto ed unabung a malabay ya ondengel, tan ed si Jehova, say Dios ya irerepresenta tayo.—Isa. 43:10.