Akatarya ed Sikayo Iray Kayamanan!
1. Akin ya ikonsidera so panregular payunir?
1 Kasin panggugunaetan yo so mas maliket tan makapenek a bilay? Kasin naliliketan tan napepenek kayo diad panutulong ed arum? Kasin pipilaleken yon napalaknab so serbisyo yo ed si Jehova? No say ebat yo et on ed dinanman ed sarayan tepet, sirin et ompan sarag yo so manregular payunir. Siempre, nepeg ya ikonsidera iray responsabilidad ed pamilya tan arum niran Makasulatan a responsabilidad, ontan met ed bunigas tan pisikal iran limitasyon.
2. Mamitla na pigaran espiritual a kayamanan a nagagamoran na saray regular payunir.
2 Diad apuyanan iran sulat nen Solomon, impankonektaan to so panamendisyon nen Jehova ed materyal iran kayamanan. (Uli. 10:22) Natan, saray bendisyon nen Jehova et manreresulta a manuna ed espiritual iran kayamanan. Saratan a kayamanan so daakan ya akatarya ed saray regular payunir. Singa bilang, naeeksperiensya ra so liket diad pangiiter ed arum legan a ‘sasaliwen da so panaon’ manlapud personal iran bengatla. (Col. 4:5, NW; Gawa 20:35) Say maaron pansasagpot da so naiimano tan aapresyaen nen Jehova. Saratan a “kaykayamanan ed tawen” et agbalot nabawasan na balor. (Mat. 6:20; Heb. 6:10) Sakey ni, legan a pansiasiansiaen na saray payunir so simplin mata tan manmamatalek ya itarya nen Jehova iray nakaukolan da, lalon onelet so relasyon da ed sikato.—Mat. 6:22, 25, 32; Heb. 13:5, 6.
3. Anto so pandumaan na pananap ed espiritual iran kayamanan tan pananap ed materyal iran kayamanan?
3 Say pambubunek a pananap na materyal iran kayamanan so mabetbet a mansumpal ed “andiay kabaliksan tan makapasakit a pilpilalek.” (1 Tim. 6:9, 10, NW; Sant. 5:1-3) Miduma a tuloy ed satan so bendisyon nen Jehova. Lapud lanang a manpupulong iray regular payunir, ontutulong itan ed sikara a napansiansia so espiritual ya inkabalanse ra tan akasentro ed mas importante iran bengatla. (Fil. 1:10, NW) Sakey ya agin laki so nan-resign ed manguupot na panaon a trabaho to bilang enhinyero pian manpayunir. Inkuan to: “Naimanok a makapakesaw so trabahok. Duma ed panagpayunir. Natan et natutulongan ko iray totoo tan ibabangat ko ed sikara so katuaan. Saya so nagkalalo lan makapenek tan makapainteres.”
4. Panon a nabebendisyonan iray regular payunir legan da met ya ipapagamor so bendisyon ed arum?
4 Saray Bendisyon ed Arum: Natan, amin so onaarap ed “saray panaon a maatap.” (2 Tim. 3:1) Kakkaukolan na saray totoo ed amin a pasen so ilalo. Saray manangiyabawag na Panarian so naliliketan sano natutulongan da iray totoon naaandian na ilalo a makaaral tan onkiwas ed maong a balita. Nagkalalon maliket iray regular payunir a manguusar na masulok a 800 ya oras kada taon ed sayan manangisalbay bilay a kimey!—1 Tim. 4:16.
5, 6. Anto so makatulong ed sikayo pian makapanregular payunir?
5 Kasin ninonot yo la so panlingkor bilang regular payunir? Nayarin mankaukolan iya na ‘panganamot ed panaon’ manlapud agtanto importante iran kimey. (Efe. 5:15, 16) Dakel so nanggawa la ed satan tan pinasimpli day bilay da, a tinikeyan da so panaon da ed trabaho ta pian mas dakel a panaon so nausar da ed kimey ed Panarian. Kasin niyuksoy yo iray kimey yo pian makapanyunir kayo met?
6 Kerew kayo na kakabatan ed si Jehova pian makagawa kayo na praktikal ya eskedyul. (Sant. 1:5) Antoran bendisyon so nailaloan yo? Daakan iray espiritual a kayamanan! Bendisyonan kayo met nen Jehova ed materyal a nakaukolan yo. (Mat. 6:33) Saramay manubok ed si Jehova ed sayan pamaakaran so makaawat na “bendisyon anggad anggapo lay pankulangan.”—Mal. 3:10, NW.