Usaren Iray Tract Pian Ikayat so Maong a Balita
1. Panon ya inusar na saray totoo na Dios iray tract?
1 Abayag lan uusaren na saray Tasi nen Jehova iray tract pian ikayat so maong a balita. Nen 1880, ginapoan nen C. T. Russell tan saray kakaiba to so mangipalapag na Bible Students’ Tracts, tan inter iratan ed saray managbasa na Watch Tower pian ibunog dad publiko. Importanted sikara iray tract kanian nen 1884, sanen inrehistro nen C. T. Russell so sakey ya legal a korporasyon pian nipalaknab so interes na Panarian, say salitan “tract” so impila ed ngaran, say Zion’s Watch Tower Tract Society, ya natan et tatawagen lan Watch Tower Bible and Tract Society of Pennsylvania. Nen 1918, masulok ya 300 milyon ya tract so imbunog na saray Estudyante na Biblia. Saray tract et siansia nin epektibon uusaren ed panagpulong.
2. Akin ya epektibo iray tract?
2 No Akin ya Epektibo: Saray tract et makolor tan makaalay imano. Say antikey ya mensahe na saratan et mainomay ya natalosan tan napnoy impormasyon. Makapainteres iratan ed saray householder ya nayarin nangingirasan ya manbasa na saray magasin odino libro. Anggan saray balo nin manangipalapag tan ugugaw et mainomay dan iyopresi iray tract. Sakey ni, saratan et melag labat kanian mainomay ya awiten.
3. Mangisalaysay na personal odino manlapud publikasyon ya eksperiensya a mangipapanengneng ed kablian na saray tract.
3 Dakel so akaamtad katuaan lapud tract. Alimbawa, naimano na sakey ya bii ed Haiti so sakey ed saray tract tayo diad karsada. Dinukdok to itan, binasa to, insan to imbagan “nalmok lay katuaan!” Sinmabi panaon, inmatendid Kingdom Hall, nanaral na Biblia, tan abautismoan—amin et lapud pakayari na Salita na Dios ya walad tract.
4. Antoy nepeg a gagala tayo no say opresin literatura ed bulan et saray tract?
4 Diad Kabkaabungan: Lapud epektibon usaren iray tract diad panagpulong, manlapu lad Nobyembre, sagpaminsan et saratan so opresin literatura. Say gagala tayo et aliwa labat lan mangiter na saray tract noagta usaren met iratan pian nigapoy tongtongan. No interesado so householder ed unonan impitongtong odino diad ipawil, nayari tayon idemostra so panangiyaral na Biblia ya usarey libron Ibabangat na Biblia odino arum nin publikasyon ya uusaren ed pangiyaral na Biblia. Panon so nayarin pangiyopresid saray tract ed kaabungan? Nanduruma iray tract, kanian kaukolan tayon kabisadoen iray iyopresi tayo.
5. Panon so nayarin pangiyopresi tayod saray tract ed kaabungan?
5 Nepeg ya itukoy tayoy presentasyon tayo ed teritorya tan ed tract ya iyopresi. Nayarin igapo tayoy tongtongan diad pangiderew na tract ed householder. Say makapasagyat ya apis so nayarin mamawalay interes to. Odino sarag tayon mangipanengneng na arum ya tract tan pampilien so householder no antoy makapainteres ed sikato. No mankikimey ed teritorya ya ngalngali anggapoy mangilukas na puerta, nayarin bembenan tayoy tract ya sankanengneng na householder so apis, odino tepeten tayo no sarag toy mangiseksek ed puerta da tan alaey opinyon dad satan. No say title na tract et sakey a tepet, nayarin tepetan tayo no antoy nibaga tod satan. Odino nayari tayon manggaway tepet ya paninteresan to tan makapangigapoy tongtongan. Insan sarag tayoy mangibasa ed householder na antikey manlapud karga na tract, ontundad saray tepet tan kerewen so opinyon to. Nayarin basaen ed Biblia iray manunan teksto. Kayarin apantongtongan so pigaran impormasyon ed tract, nayarin sampotan lay tongtongan tan mangiyeskedyul na espisipikon agew na ipawil. No kaslakan lan mangititilak so kongregasyon na literatura ed saray abung ya anggapoy too, nayarin mangitilak na tract ya agsankanengneng na arum.
6. Panon tayon nayarin usaren iray tract ed panag-street witnessing?
6 Panag-street Witnessing: Asalim ta lan inusar iray tract ed panag-street witnessing? Wala ray ondadalan ya manaapura kanian agda labay so mitongtong ed sikatayo. Ompan mairap tayon nadetermina no kasin interesado ra. Imbes ya ikdan iray balon magasin anggano agtayo seguradon basaen da itan, akin ta no tract so iter ed sikara? Lapud makapasagyat so apis tan antikey labat so mensahe na satan, nayarin napakiwas iran basaen so tract no walay bakante ra anggano pigaran minuto labat. Siempre no agmet ira manapura, sarag tayon ipaliwawad sikaray arum ya karga na tract.
7. Mangisalaysay na saray eksperiensya ya mangipanengneng no panon ya usaren iray tract ed impormal ya panagpulong.
7 Impormal ya Panagpulong: Mainomay so manpulong ya impormal no usaren iray tract. Walay sakey ya brother ya mangibubulsa na pigara kada no walay laen to. No walay nakatongtong to, singa bilang managlako, ibaga labat na brother ya ikdan toy babasaen insan to iderew so tract. Nen pinmasyar so sakey ya sanasawa ed New York City, naisip dan nayarin wala ray nakatongtong dan nanlapud nanduruman bansa. Kanian angawit iray bokleta ya Nations tan pigaran tract ed nanduruman lenguahe. Insan no walay narengel dan mansasalitay arum a lenguahe ya manlalakod dalan odino akayurong ed parke o restawran, opresian day tract diad lenguahe to.
8. Panon ya nibagan saray tract et singa bini?
8 “Itanem Mo so Binim”: Saray tract et singa bini. Basta labat isisibwag na dumaralos iray bini ta agto amta no dinan ed saratan so ontubo tan onsimit. Ibabaga na Eclesiastes 11:6: “Diad kabuasan et mangisibwag kay binim tan agmo pampapainawaen so limam anggad labi; ta agmo amta no iner so tuboan to, balanglan dia odino diman, odino kasin pareho iran ontubo.” Kanian, komon ta itultuloy tayoy “mangikayat na pikakabat” panamegley na sayan epektibon uusaren ed panagpulong.—Uli. 15:7.
[Blurb ed pahina 3]
Lapud epektibon usaren iray tract diad panagpulong, manlapu lad Nobyembre, sagpaminsan et saratan so opresin literatura